ചെന്നൈ: രണ്ടാമതും വിവാഹം കഴിക്കാന്‍ താല്പര്യം പ്രകടിപ്പിച്ച ഭർത്താവിനെതിരെ പ്രകോപിതയായ ഭാര്യ ഭര്‍ത്താവിനെ വെട്ടിക്കൊന്ന് പോലീസ് സ്റ്റേഷനില്‍ കീഴടങ്ങി.

ശനിയാഴ്ച പുലർച്ചെ കോവില്‍‌പ്പട്ടി ഈസ്റ്റ് പോലീസ് സ്റ്റേഷന്‍ പരിധിയിലാണ് സംഭവം നടന്നത്. കോവില്‍‌പ്പട്ടി ലോയൽ മിൽ കോളനിയിലെ പ്രഭു (38) ആണ് മരിച്ചത്. ഭാര്യ ഉമാ മഹേശ്വരി (30), അവരുടെ നാലും ഏഴും വയസ്സുള്ള ആണ്‍കുട്ടിയും പെണ്‍കുട്ടിയുമോടൊപ്പമാണ് പ്രഭു താമസിച്ചിരുന്നത്.

തൂത്തുക്കുടിയിലെ ഒരു സ്വകാര്യ മില്ലിലെ ജോലിക്കാരനായിരുന്ന പ്രഭു, ജോലി കഴിഞ്ഞ് മദ്യപിച്ചാണ് വീട്ടിലെത്താറുള്ളത്. ഭാര്യയുമായി പ്രഭു വഴക്കുണ്ടാക്കുക പതിവായിരുന്നു. വെള്ളിയാഴ്ച്ച രാത്രി വൈകി പതിവുപോലെ മദ്യപിച്ചെത്തിയ പ്രഭു ഭാര്യയുമായി വഴക്കിട്ടു. വഴക്കിനിടയിൽ മറ്റൊരു സ്ത്രീയെ വിവാഹം ചെയ്യാനുള്ള തീരുമാനം പ്രഭു ഉമാ മഹേശ്വരിയോട് പറയുകയുണ്ടായി. പ്രഭുവിന്റെ ബന്ധു കൂടിയായ അടുത്ത ഗ്രാമത്തിലുള്ള സ്ത്രീയെ വിവാഹം കഴിക്കുമെന്നാണ് പ്രഭു പറഞ്ഞത്.

പ്രഭു വീണ്ടും വിവാഹം കഴിക്കുമെന്ന് കേട്ട ഉമാമേശ്വരി വീട്ടിലുള്ള മടവാൾ എടുത്ത് പ്രഭുവിന്റെ കഴുത്തിന് വെട്ടുകയായിരുന്നു. ആഴത്തിൽ മുറിവേറ്റ പ്രഭു സംഭവ സ്ഥലത്തു തന്നെ വീണു മരണപെട്ടു. തന്റെ കൈകൊണ്ട് ഭർത്താവ് കൊല്ലപ്പെട്ടു എന്ന് മനസ്സിലായതോടെ ഉമാ മഹേശ്വരി കോവിൽപട്ടി ഈസ്റ്റ് പൊലീസ് സ്റ്റേഷനിലെത്തി തുടർന്ന് കീഴടങ്ങി. സ്റ്റേഷനിലെത്തിയ ഉമാ മഹേശ്വരി നടന്ന സഭാവങ്ങൾ പോലീസിനോട് പറഞ്ഞു.

കൊലയെപ്പറ്റി ഉമാ മഹേശ്വരി പറഞ്ഞറിഞ്ഞ പോലീസ് ഇവരുടെ വീട്ടിലെത്തിയപ്പോൾ പ്രഭുവിന്റെ രക്തത്തിൽ കുളിച്ച മൃതദേഹമാണ് കണ്ടത്. മൃതദേഹം പോസ്റ്റുമോർട്ടത്തിനായി കോവില്‍‌പ്പട്ടി സര്‍ക്കാര്‍ ആശുപത്രിയിലേക്ക് മാറ്റി. ഉമാ മേശ്വരിക്കെതിരെ കൊലക്കുറ്റത്തിന് കേസെടുത്തിട്ടുണ്ട്.