വാഷിംഗ്ടണ്‍: മുൻ പ്രസിഡന്റ് ഡൊണാൾഡ് ട്രംപ് നവംബർ 3 ലെ പ്രസിഡന്റ് തിരഞ്ഞെടുപ്പ് ഫലങ്ങൾ അസാധുവാക്കാൻ ശ്രമിക്കുന്നതിനിടെ മൗനം പാലിച്ച യുഎസ് പോസ്റ്റൽ സർവീസിലെ ഉദ്യോഗസ്ഥരെ പിരിച്ചുവിടാൻ യുഎസ് പ്രസിഡന്റ് ജോ ബൈഡന്‍ സമ്മര്‍ദ്ദം ചെലുത്തണമെന്ന് ന്യൂജെഴ്സിയില്‍ നിന്നുള്ള കോണ്‍ഗ്രസ്മാന്‍ ബില്‍ പാസ്ക്രല്‍ ആവശ്യപ്പെട്ടു.

“ട്രം‌പിനോട് ആഭിമുഖ്യം പുലര്‍ത്തി തെരഞ്ഞെടുപ്പ് അട്ടിമറിക്കാനും പോസ്റ്റോഫീസിനെ നശിപ്പിക്കാനും ശ്രമിച്ച എല്ലാ തപാല്‍ ബോര്‍ഡ് ഗവര്‍ണ്ണര്‍മാരേയും ജീവനക്കാരെയും പിരിച്ചുവിടാന്‍ ഇന്ന് ഞാൻ പ്രസിഡന്റ് ബൈഡനോട് ആവശ്യപ്പെടുന്നു,” ന്യൂജഴ്സിയില്‍ നിന്നുള്ള ഡമോക്രാറ്റിക് പ്രതിനിധി ബിൽ പാസ്ക്രൽ ട്വീറ്റ് ചെയ്തു. പോസ്റ്റ് മാസ്റ്റർ ജനറൽ ലൂയിസ് ഡിജോയിയെ ലക്ഷ്യമാക്കിയാണ് അദ്ദേഹത്തിന്റെ ട്വീറ്റ്.

കടുത്ത ട്രംപ് വിമർശകനായ അദ്ദേഹം ഒരു കത്തും എഴുതിയിട്ടുണ്ട്. ബാലറ്റുകള്‍ അട്ടിമറിച്ചെന്നും മോഷ്ടിച്ചെന്നും ട്രം‌പ് ഇടതടവില്ലാതെ പ്രചരിപ്പിച്ചിട്ടും തപാല്‍ വകുപ്പിലെ ബോര്‍ഡ് ഓഫ് ഗവര്‍ണ്ണര്‍മാര്‍ മൗനം പാലിച്ചു. അതേസമയം, പോസ്റ്റ്മാസ്റ്റര്‍ ജനറല്‍ ലൂയിസ് ഡിജോയ് ആകട്ടേ മെയിൽ സോർട്ടിംഗ് മെഷീനുകൾ പൊളിച്ചുമാറ്റാനും ഓവർടൈം വെട്ടിക്കുറയ്ക്കാനും ഡെലിവറികൾ നിയന്ത്രിക്കാനും മെയിൽ ബോക്സുകൾ നീക്കം ചെയ്യാനുമുള്ള ശ്രമങ്ങൾ നടത്തി. തപാൽ സേവനത്തിന് ഇതുവരെ സംഭവിച്ചതിൽ വച്ച് ഏറ്റവും മോശമായ നാശത്തെ എതിർക്കാൻ ബോർഡ് അംഗങ്ങൾ വിസമ്മതിച്ചത് അവരുടെ കടമകളെ ഒറ്റിക്കൊടുക്കുന്നതായിരുന്നു, അവരെ നീക്കം ചെയ്യുന്നതിന് ഈ
കാരണങ്ങള്‍ തന്നെ ധാരാളമാണ്,” പാസ്ക്രൽ എഴുതി.

വൈറ്റ് ഹൗസ് പ്രസ് സെക്രട്ടറി ജെൻ സാകി ഇക്കാര്യത്തിൽ പ്രതികരിക്കാൻ വിസമ്മതിച്ചു.