ശ്രീവല്ലഭന്റെ “പച്ച” ഏറ്റവും മികച്ച പരിസ്ഥിതി ചിത്രത്തിനുള്ള അവാര്‍ഡ് കരസ്ഥമാക്കി

J & B പ്രൊഡക്ഷൻസിന്റെ ബാനറിൽ ജയചന്ദ്രൻ നിർമ്മിച്ച, ശ്രീവല്ലഭൻ സംവിധാനം ചെയ്ത “പച്ച” എന്ന ചിത്രം ന്യൂയോർക്ക് ഫിലിം ഫെസ്റ്റിവൽ IO – യിൽ മികച്ച പരിസ്ഥിതി ചിത്രമായി തെരഞ്ഞെടുത്തു. കൂടാതെ “പച്ച” ഫെസ്റ്റിവലിലെ ഗ്രാൻഡ് പ്രൈസ് അവാർഡും കരസ്ഥമാക്കി.

പരിസ്ഥിതി പ്രമേയമാക്കി നിര്‍മ്മിച്ച “പച്ച” ഇതിനോടകം തന്നെ പതിനഞ്ചോളം അന്താരാഷ്ട്ര ഫെസ്റ്റിവലിൽ പ്രദർശിപ്പിക്കുകയും ഫ്രാൻസ്, ഇറ്റലി, അമേരിക്ക (ബോസ്റ്റൺ) തുടങ്ങിയ രാജ്യങ്ങളിൽ മികച്ച ചിത്രത്തിനുളള അന്താരാഷ്ട്ര പുരസ്‌കാരം കരസ്ഥമാക്കുകയും ചെയ്തു.

പാലക്കാട് രാമശ്ശേരി എന്ന ഗ്രാമത്തിലെ പത്തു വയസ്സുളള അപ്പുവിന്റെ ജീവിത നേർക്കാഴ്ചയാണ് പച്ചയുടെ ഇതിവൃത്തം. മനുഷ്യരെക്കാളും മരങ്ങളെയും പ്രകൃതിയെയും സ്നേഹിക്കുന്ന അപ്പു മരങ്ങളെ മുത്തശ്ശനായും മുത്തശ്ശിയായും സങ്കല്പിച്ച് അവരോടു തന്റെ സുഖദുഃഖങ്ങള്‍ പങ്കു വെക്കുന്നു.

മനുഷ്യന്റെ ഇടപെടൽ മൂലം പ്രകൃതിയിലുണ്ടാകുന്ന മാറ്റങ്ങൾ കാരണം വരുംകാലങ്ങളിൽ നേരിടാൻ പോകുന്ന ഏറ്റവും വലിയ വെല്ലുവിളിയായ ജലക്ഷാമമാണ് ഈ ചിത്രത്തിലൂടെ വരച്ചു കാട്ടുന്നത്.

നെടുമുടി വേണു, കെ.പി.എ.സി. ലളിത, മേനക, ജി സുരേഷ്കുമാർ (നിർമ്മാതാവ്) തുടങ്ങിയവർ ഈ ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നു. മാസ്റ്റർ മിഥുൻ ആണ് അപ്പുവിന്റെ വേഷം കൈകാര്യം ചെയ്തിരിക്കുന്നത്.

Print Friendly, PDF & Email

Leave a Comment