ഹൂസ്റ്റണ്‍ : വിശപ്പകറ്റാന്‍ ആഹാരം ലഭിക്കാതെ മാലിന്യം ഭക്ഷിക്കേണ്ടി വന്ന മൂന്നു പിഞ്ചുകുഞ്ഞുങ്ങളുടെ മാതാവിനെ പോലീസ് അറസ്റ്റു ചെയ്തു. നവംബര്‍ 22 രാത്രിയില്‍ ഈസ്റ്റ് ഹൂസ്റ്റണിലെ മാക്സി റോഡിലുള്ള അപ്പാര്‍ട്ട്മെന്റിലാണ് മനുഷ്യമനസ്സാക്ഷിയെ മരവിപ്പിക്കുന്ന സംഭവം നടന്നത്.

22-കാരിയും 5 കുട്ടികളുടെ മാതാവുമായ കിംബര്‍ലി റോഡ്രിഗ്സ് ആണ് ഒന്നും, രണ്ടും, മൂന്നും വയസ്സുള്ള മൂന്നു കുട്ടികളെ അപ്പാര്‍ട്ട്മെന്റില്‍ തനിച്ചാക്കി രാത്രി ജോലിക്കു പോയത്‌. ആഹാരം ലഭിക്കാതെ വിശന്നു വലഞ്ഞ മൂന്നു കുട്ടികളും പുറത്തിറങ്ങി എത്തിയത്‌ അപ്പാര്‍ട്ട്‌മെന്റിനു പുറകില്‍ മാലിന്യങ്ങള്‍ നിക്ഷേപിക്കുന്ന കുപ്പത്തൊട്ടിക്കരികിലാണ്‌. ആര്‍ത്തിയോട അതില്‍ നിന്നും ചീഞ്ഞു നാറിയ ഭക്ഷണപദാര്‍ത്ഥങ്ങള്‍ എടുത്തു കഴിക്കുന്നത്‌ സമീപവാസിയുടെ ശ്രദ്ധയില്‍പെട്ടു. പോലീസില്‍ വിവിരം അറിയിച്ചതിനെ തുടര്‍ന്ന്‌ പോലീസ്‌ എത്തി കുട്ടികളെ ചൈല്‍ഡ് പ്രൊട്ടക്‌ഷന്‍ സര്‍‌വീസി (സി.പി.എസ്‌)നെ ഏല്‌പിക്കുകയും മാതാവിനെ അറസ്റ്റ്‌ ചെയ്‌തു കോടതിയില്‍ ഹാജാരാക്കുകയും ചെയ്‌തു.

നവംബര്‍ 27 ബുധനാഴ്‌ച വീണ്ടും കോടതില്‍ ഹാജരാക്കിയ മാതാവിന്റെ കേസ് ഡിസംബര്‍ 4ന്‌ വാദം കേള്‍ക്കും. 35,000 ഡോളറാണ്‌ ജാമ്യ തുകയായി നിശ്ചയിച്ചിരിക്കുന്നത്‌.

അമേരിക്കയില്‍ വിഭവസമൃദ്ധമായ താങ്ക്‌സ്‌ഗിവിംഗ് പാര്‍ട്ടിക്ക്‌ തയ്യാറെടുക്കുന്ന ജനങ്ങള്‍ സമൂഹത്തില്‍ ദാരിദ്ര്യം അനുഭവിക്കുന്ന സാധാരാണക്കാരെ വിസ്‌മരിക്കുന്നു. തീന്‍മേശയില്‍ ഭക്ഷണപദാര്‍ത്ഥങ്ങള്‍ നിറച്ചു അതിനു ചുറ്റുമിരുന്ന്‌ ഫോട്ടോയ്‌ക്ക്‌ പോസ്‌ ചെയ്യുന്നതില്‍ ആനന്ദം കണ്ടെത്തുന്നവര്‍ ഒരു ഒരു നേരത്തെ ആഹാരത്തിനായി കുപ്പത്തൊട്ടികളെ അഭയം പ്രാപിക്കേണ്ടി വരുന്ന പിഞ്ചു പൈതങ്ങളുടെ വേദനയകറ്റുവാന്‍ ശ്രമിക്കുന്നതിലും വലിയ ഒരു താങ്ക്‌സ്‌ ഗിവിങ്ങ്‌ വേറെയില്ലതന്നെ.