വയനാട്: ആര്ടി ഓഫീസിലെ ഉദ്യോഗസ്ഥ ജീവനൊടുക്കിയ സംഭവത്തില് വകുപ്പുതല നടപടി. മാനന്തവാടി സബ് റീജിയണല് ട്രാന്സ്പോര്ട്ട് ഓഫീസിലെ ജൂനിയര് സൂപ്രണ്ട് പി.പി. അജിത കുമാരിയെ കോഴിക്കോട് ആര്ടി ഓഫീസിലേക്ക് സ്ഥലം മാറ്റി.
ട്രാന്സ്പോര്ട്ട് കമ്മീഷണര് എം.ആര്. അജിത്കുമാറാണ് ഇതുസംബന്ധിച്ച് ഉത്തരവിറക്കിയത്. നേരത്തെ ഡെപ്യുട്ടി ട്രാന്സ്പോര്ട്ട് കമ്മീഷണര് നടത്തിയ വകുപ്പ് തല അന്വേഷണത്തില് മാനന്തവാടി എസ്ആര്ടി ഓഫിസിലെ 11 ജീവനക്കാരെ സ്ഥലം മാറ്റണമെന്ന ശിപാര്ശ മുന്നോട്ട് വെച്ചിരുന്നു.
എന്നാല് സിന്ധുവിന്റെ ആത്മഹത്യ കുറുപ്പിലുള്പ്പെടെ പേര് പരാമര്ശിക്കപ്പെട്ട പി.പി. അജിതകുമാരിക്കെതിരെയാണ് ആദ്യഘട്ട നടപടി വന്നിട്ടുള്ളത്. ഏപ്രില് ആറിന് രാവിലെയാണ് മാനന്തവാടി സബ് ആര്ടിഒ ഓഫിസ് സീനിയര് ക്ലാര്ക്ക് എടവക എള്ളുമന്ദം പുളിയാര്മറ്റത്തില് സിന്ധു (42) ജീവനൊടുക്കിയത്. മരണത്തിന് പിന്നില് ദുരൂഹതയുണ്ടെന്നായിരുന്നു കുടുംബത്തിന്റെ ആരോപണം. മാനസിക പീഡനം കാരണമാണ് സിന്ധു ജീവനൊടുക്കിയതെന്ന് സഹോദരന് ആരോപിച്ചിരുന്നു.
