ഹൈദരാബാദ്: മാതൃകാ പെരുമാറ്റച്ചട്ടം (എംസിസി) ലംഘിച്ച കേസിൽ നിന്ന് കേന്ദ്ര ആഭ്യന്തര മന്ത്രി അമിത് ഷാ, കൽക്കരി, ഖനി മന്ത്രി ജി കിഷൻ റെഡ്ഡി എന്നിവരുടെ പേരുകൾ മൊഗൽപുര പൊലീസ് ഒഴിവാക്കി.
അടുത്തിടെ നടന്ന ലോക്സഭാ തെരഞ്ഞെടുപ്പിൽ പ്രായപൂർത്തിയാകാത്ത ഏതാനും പെൺകുട്ടികൾക്കൊപ്പം അമിത് ഷായും ബിജെപി തെലങ്കാന അദ്ധ്യക്ഷൻ കിഷൻ റെഡ്ഡിയും എത്തിയെന്നാരോപിച്ച് കോൺഗ്രസ് നേതാവ് ജി നിരഞ്ജൻ തിരഞ്ഞെടുപ്പ് കമ്മീഷന് അയച്ച പരാതിയിൽ മേയിൽ കേസെടുത്തിരുന്നു. തിരഞ്ഞെടുപ്പ് കമ്മീഷൻ്റെ മാതൃകാ പെരുമാറ്റച്ചട്ടത്തിൻ്റെ മാർഗ്ഗനിർദ്ദേശങ്ങൾ ലംഘിച്ച് പാർട്ടി പതാകയും ഉപയോഗിച്ചിരുന്നു.
സംഭവത്തിൽ മേയ് മാസത്തിൽ അന്വേഷണം നടത്താൻ സിറ്റി പോലീസ് കമ്മീഷണർ കൊതക്കോട്ട ശ്രീനിവാസ് റെഡ്ഡിയോട് തിരഞ്ഞെടുപ്പ് കമ്മീഷൻ ഉത്തരവിട്ടിരുന്നു. അന്വേഷണം നടത്തി റിപ്പോർട്ട് സമർപ്പിക്കാൻ ദക്ഷിണമേഖലാ ഡിസിപി സ്നേഹ മെഹ്റയോട് കമ്മിഷണർ നിർദേശിച്ചു. തുടർന്ന്, മൊഗൽപുര പോലീസ് ഐപിസി സെക്ഷൻ 188 (പൊതുപ്രവർത്തകൻ യഥാവിധി പ്രഖ്യാപിച്ച ഉത്തരവിൻ്റെ അനുസരണക്കേട്) പ്രകാരം കേസെടുത്തു .
ഗോഷാമഹൽ എംഎൽഎ ടി രാജ സിംഗ്, ഹൈദരാബാദ് ലോക്സഭയിലെ ബിജെപി സ്ഥാനാർത്ഥി കൊമ്പല്ല മാധവി ലത, പാർട്ടി നേതാവ് ടി യമൻ സിംഗ് എന്നിവർക്കെതിരെയും എംസിസി നിയമലംഘനത്തിന് കേസെടുത്തിരുന്നു.
