ഉക്രൈനിലേക്ക് കൂടുതൽ ആയുധങ്ങൾ അയച്ചാൽ ‘നേരിട്ട് സൈനിക ഏറ്റുമുട്ടൽ’ നടത്തുമെന്ന് റഷ്യയുടെ മുന്നറിയിപ്പ്

വാഷിംഗ്ടണ്‍: ഉക്രെയ്നിലേക്ക് കൂടുതൽ ആയുധങ്ങൾ അയയ്ക്കാനുള്ള അമേരിക്കയുടെ തീരുമാനം മോസ്കോയുടെ താൽപ്പര്യങ്ങൾക്ക് “ഉടൻ ഭീഷണി” ഉയർത്തുകയും റഷ്യയും പടിഞ്ഞാറും തമ്മിലുള്ള നേരിട്ടുള്ള സൈനിക ഏറ്റുമുട്ടലിന്റെ അപകടസാധ്യത വർദ്ധിപ്പിക്കുകയും ചെയ്യുന്നുവെന്ന് റഷ്യ പറഞ്ഞു.

“യുഎസും സഖ്യകക്ഷികളും സൈനിക ആയുധങ്ങളും ഉൽപ്പന്നങ്ങളും വിതരണം ചെയ്യുന്നത് നീണ്ടുനിൽക്കുന്ന രക്തച്ചൊരിച്ചിലിനും പുതിയ അപകടങ്ങൾക്കും കാരണമാകുമെന്നു മാത്രമല്ല, റഷ്യയും പാശ്ചാത്യ രാജ്യങ്ങളും തമ്മിലുള്ള നേരിട്ടുള്ള സൈനിക ഏറ്റുമുട്ടലിന്റെ അപകടവും വർദ്ധിപ്പിക്കുന്നു,” യുഎസിലെ റഷ്യൻ അംബാസഡർ അനറ്റോലി അന്റനോവ് ബുധനാഴ്ച ടെലിഗ്രാം സന്ദേശത്തിൽ പറഞ്ഞു. ഇത് ഞങ്ങളുടെ രാജ്യത്തിന്റെ തന്ത്രപരമായ താൽപ്പര്യങ്ങൾക്ക് ഭീഷണിയായി ഞങ്ങൾ കാണുന്നു എന്നും അദ്ദേഹം കൂട്ടിച്ചേര്‍ത്തു.

യുഎസ് പ്രസിഡന്റ് ജോ ബൈഡൻ ചൊവ്വാഴ്ച ഉക്രെയ്‌നിന് 625 മില്യൺ ഡോളർ സൈനിക സഹായ പാക്കേജ് വാഗ്ദാനം ചെയ്തതിന് ശേഷമാണ് അദ്ദേഹത്തിന്റെ പ്രസ്താവന പുറത്തുവന്നത്.

യുഎസ് പാക്കേജിൽ ഹൈ മൊബിലിറ്റി ആർട്ടിലറി റോക്കറ്റ് സിസ്റ്റം (ഹിമാർസ്) ലോഞ്ചറുകൾ ഉൾപ്പെടും. റഷ്യൻ സേനയ്‌ക്കെതിരെ ഉക്രെയ്‌ൻ നടത്തിയ സമീപകാല പ്രത്യാക്രമണങ്ങളിൽ ഹിമാര്‍സ് ഉപയോഗിച്ചതായി റിപ്പോർട്ടുണ്ട്. അത് റഷ്യയുടെ പിന്‍‌വാങ്ങലിലേക്ക് നയിച്ചു.

കഴിഞ്ഞയാഴ്ച, വാഷിംഗ്ടൺ ഉക്രെയ്നിനായി $1.1 ബില്യൺ ആയുധ പാക്കേജ് പ്രഖ്യാപിച്ചിരുന്നു. അതിൽ 18 HIMARS ലോഞ്ചർ സിസ്റ്റങ്ങൾ, അനുബന്ധ യുദ്ധോപകരണങ്ങൾ, വിവിധ തരം കൗണ്ടർ ഡ്രോൺ സംവിധാനങ്ങൾ, റഡാർ സംവിധാനങ്ങൾ എന്നിവ ഉൾപ്പെടുന്നു.

എന്നാൽ, കഴിഞ്ഞ ആഴ്‌ചത്തെ ആയുധ പാക്കേജിന് ധനസഹായം നൽകിയത് യുക്രെയ്ൻ സെക്യൂരിറ്റി അസിസ്റ്റൻസ് ഇനിഷ്യേറ്റീവ് (യുഎസ്എഐ) ആണ്. അതായത്, നിലവിലുള്ള യുഎസ് ആയുധ സ്റ്റോക്കുകളിൽ നിന്ന് ആയുധങ്ങൾ പിൻവലിക്കുന്നതിന് പകരം വ്യവസായങ്ങളില്‍ നിന്ന് സർക്കാർ ആയുധങ്ങൾ വാങ്ങണം.

ഫെബ്രുവരിയിൽ ഉക്രെയ്‌നിൽ “പ്രത്യേക സൈനിക ഓപ്പറേഷൻ” എന്ന് റഷ്യ വിളിക്കുന്ന അധിനിവേശം മുതൽ കിയെവിന് 16.8 ബില്യൺ ഡോളറിലധികം മൂല്യമുള്ള യുഎസ് സുരക്ഷാ സൈനിക സഹായം നല്‍കിയിട്ടുണ്ട്.

നാല് മുൻ ഉക്രേനിയൻ പ്രദേശങ്ങൾ – അതായത് ഡൊനെറ്റ്സ്ക്, ലുഹാൻസ്ക്, കെർസൺ, സപ്പോരിജിയ – റഷ്യൻ ഫെഡറേഷനിൽ പ്രവേശിപ്പിച്ച് റഫറണ്ടം നടത്തിയതിന് ശേഷമുള്ള ആദ്യത്തെ സഹായ പാക്കേജാണ് ഇപ്പോള്‍ ബൈഡന്‍ പ്രഖ്യാപിച്ചത്.

Print Friendly, PDF & Email

Please like our Facebook Page https://www.facebook.com/MalayalamDailyNews for all daily updated news

Leave a Comment

Related News