തിരുവനന്തപുരം: പമ്പയിൽ നടന്ന ആഗോള അയ്യപ്പ സംഗമത്തിൽ പങ്കെടുത്ത് മടങ്ങുകയായിരുന്ന ഓർക്കസ്ട്ര ടീം സഞ്ചരിച്ചിരുന്ന വാഹനം അപകടത്തിൽ പെട്ട് ഒരു യുവാവ് മരിച്ചു. നെടുമങ്ങാട് എള്ളുവിളയിലെ കൊങ്ങംകോട് അനുഗ്രഹ ഭവനിൽ ബെന്നറ്റ് രാജ് (21) ആണ് മരിച്ചത്. മറ്റ് രണ്ട് പേർക്ക് പരിക്കേറ്റു. നെടുമങ്ങാട് സ്വദേശിയും ഓർക്കസ്ട്ര ടീമിലെ ഡ്രമ്മറുമായ രതീഷ് (കിച്ചു, 35), തിരുവനന്തപുരം സ്വദേശിയും ഗിറ്റാറിസ്റ്റുമായ ഡോണി (25) എന്നിവർക്ക് പരിക്കേറ്റു. ഇവരെ ആദ്യം റാന്നി താലൂക്ക് ആശുപത്രിയിലും പിന്നീട് കോട്ടയം മെഡിക്കൽ കോളേജിലും പ്രവേശിപ്പിച്ചു.
ഇന്ന് ഉച്ചകഴിഞ്ഞ് 3.20 നാണ് അപകടം നടന്നത്. പുനലൂർ-മൂവാറ്റുപുഴ സംസ്ഥാന പാതയിൽ മന്ദിരം ജംഗ്ഷനും വാലിപ്ലാക്കൽ പടിക്കും ഇടയിൽ മറ്റൊരു വാഹനവുമായി നേർക്കുനേർ കൂട്ടിയിടിക്കുകയായിരുന്നു. ബെന്നറ്റാണ് വാഹനം ഓടിച്ചിരുന്നത്. അപകടത്തിൽപ്പെട്ട കാറിൽ കുടുങ്ങിയ മൂന്ന് പേരെ നാട്ടുകാരും ഫയർഫോഴ്സും ചേർന്ന് കാർ വെട്ടിപ്പൊളിച്ചാണ് പുറത്തെടുത്തത്.
