കാരന്തൂർ: വിദ്യാർത്ഥികൾക്കിടയിൽ സേവനമനസ്കതയും സാമൂഹ്യക്ഷേമ ബോധവും വളർത്തുകയെന്ന ലക്ഷ്യത്തോടെ നരിക്കുനി കേന്ദ്രമായി പ്രവർത്തിക്കുന്ന ‘അത്താണി’ സാന്ത്വന ഭവനം സന്ദർശിച്ച് മർകസ് ഐഷോർ വിദ്യാർത്ഥികൾ. ക്യാമ്പസ് ലൈഫ് ഫെസ്റ്റിവൽ വൈസെലീസിയത്തിന്റെ ‘ഹീൽ ദി ഹേർട്ട്’ എന്ന പദ്ധതിയുടെ ഭാഗമായി അദ്ധ്യാപകർക്കൊപ്പം വിദ്യാർത്ഥികൾ അത്താണി സന്ദർശിച്ചത്. ഉപേക്ഷിക്കപ്പെട്ടവർക്കും കിടപ്പിലായവർക്കും അവശതയനുഭവിക്കുന്നവർക്കുമായി 2005 ൽ സ്ഥാപിതമായ ഈ സ്ഥാപനം നിരാലംബരായ നിരവധി പേർക്കാണ് ആശ്വാസമാകുന്നത്.
വിദ്യാർത്ഥികൾക്കും അദ്ധ്യാപകർക്കും ഹൃദ്യമായ സ്വീകരണമാണ് ജീവനക്കാർ നൽകിയത്. വിദ്യാർത്ഥികൾ അന്തേവാസികളുമായി ആശയവിനിമയം നടത്തുകയും പലഹാരങ്ങൾ കൈമാറുകയും ചെയ്തു. നശീദയും മൗലിദും പാട്ടുകളും അവതരിപ്പിച്ചു. അത്താണിയുടെ പ്രവർത്തനത്തെയും ആവശ്യകതയെയും കുറിച്ച് മജീദ് മാസ്റ്റർ സംസാരിച്ചു. ഐഷോർ അദ്ധ്യാപകരായ മൊയ്തീൻകുട്ടി സഖാഫി, ജാബിർ സിദ്ദീഖി, സഫ്വാൻ നൂറാനി, മുഹമ്മദ് അഹ്സനി, അൽ അമീൻ, സ്റ്റുഡൻസ് യൂണിയൻ പ്രതിനിധികളായ സ്വാദിഖ് അലി, മുസമ്മിൽ, റിയാൻ സന്ദർശനത്തിന് നേതൃത്വം നൽകി.
