തിരുവനന്തപുരം: മഴക്കാല മാസങ്ങളിൽ മത്സ്യത്തൊഴിലാളികളെ സഹായിക്കുന്നതിനായി നടപ്പിലാക്കുന്ന സേവിംഗ്സ് റിലീഫ് സ്കീമിന് കീഴിലുള്ള കേന്ദ്ര, സംസ്ഥാന ഫണ്ടുകളുടെ വിതരണം അംഗീകരിക്കുന്നതിന് ഉത്തരവ് പുറപ്പെടുവിച്ചതായി ഫിഷറീസ് മന്ത്രി സജി ചെറിയാൻ അറിയിച്ചു.
മത്സ്യത്തൊഴിലാളികളുടെ സമ്പാദ്യശീലം പ്രോത്സാഹിപ്പിക്കുന്നതിനും പഞ്ഞമാസങ്ങളിൽ അവരുടെ വരുമാനം നിലനിർത്തുന്നതിനും വേണ്ടിയാണ് സമ്പാദ്യ സമാശ്വാസ പദ്ധതി നടപ്പിലാക്കുന്നത്. ആകെ 41.90 കോടി രൂപ ഗുണഭോക്താക്കൾക്ക് വിതരണം ചെയ്യുന്നതിനാണ് സർക്കാർ അനുമതി നൽകിയിരിക്കുന്നത്. കേന്ദ്ര വിഹിതമായ 1500 രൂപയും സംസ്ഥാന വിഹിതമായ 1500 രൂപയും ഉൾപ്പെടെ ആകെ 3000 രൂപ വീതം ഗുണഭോക്താക്കൾക്ക് വിതരണം ചെയ്തു തുടങ്ങിയിട്ടുണ്ട്. പദ്ധതിയിൽ അംഗങ്ങളായ 1,49,755 മത്സ്യത്തൊഴിലാളികൾക്കാണ് ഇതിന്റെ പ്രയോജനം ലഭിക്കുക.
നേരത്തെ കേന്ദ്ര അനുമതി ലഭിക്കാത്തതിനാൽ വിഹിതം വിതരണം ചെയ്യാൻ കഴിയാത്ത സാഹചര്യമുണ്ടായിരുന്നു. കേന്ദ്ര ഭരണാനുമതിയും വിഹിതവും ഉടൻ നൽകണമെന്ന് ഫിഷറീസ് മന്ത്രി സജി ചെറിയാൻ കേന്ദ്ര സർക്കാരിനോട് പലതവണ അഭ്യർത്ഥിച്ചിരുന്നു. ഇപ്പോൾ ഭരണാനുമതി ലഭിക്കുകയും വിഹിതം അനുവദിക്കുകയും ചെയ്തിരിക്കുന്നത് മത്സ്യത്തൊഴിലാളികൾക്ക് വലിയ ആശ്വാസമാണ്.
പിആര്ഡി, കേരള സര്ക്കാര്
