തിരുവനന്തപുരം: കേരള ടെയ്ലറിംഗ് തൊഴിലാളി ക്ഷേമനിധി ബോർഡിന്റെ ആർട്ടിഫിഷ്യൽ ഇന്റലിജൻസ് അധിഷ്ഠിത മൊബൈൽ ആപ്ലിക്കേഷന്റെ ഉദ്ഘാടനവും ആനുകൂല്യ വിതരണത്തിന്റെ സംസ്ഥാനതല ഉദ്ഘാടനവും തിരുവനന്തപുരത്തെ ടാഗോർ തിയേറ്ററിൽ തൊഴിൽ മന്ത്രി വി. ശിവൻകുട്ടി നിർവഹിച്ചു.
ക്ഷേമനിധി ബോർഡിലൂടെ തയ്യല് മേഖലയിലെ നിരവധി ക്ഷേമ പ്രവർത്തനങ്ങൾ നടത്താൻ സർക്കാരിന് കഴിഞ്ഞിട്ടുണ്ടെന്നും തൊഴിലാളികളുടെ സമഗ്രമായ പുരോഗതിക്ക് സർക്കാർ പ്രതിജ്ഞാബദ്ധമാണെന്നും മന്ത്രി പറഞ്ഞു.
കുടിശ്ശിക നിവാരണവും അധിക വരുമാനവും ഉൾപ്പടെ തൊഴിൽ മേഖലയിൽ സമഗ്രമായ പരിഷ്ക്കാരങ്ങൾ സർക്കാർ നടപ്പിലാക്കി വരികയാണ്. സമ്പൂർണമായ ക്ഷേമ വ്യവസ്ഥയിലേക്ക് കടക്കുവാൻ കുടിശ്ശിക നിവാരണം അത്യന്താപേക്ഷിതമാണ്. അതിനാൽ സംസ്ഥാനത്തെ എല്ലാ ജില്ലകളിലും കുടിശ്ശിക നിവാരണ ക്യാമ്പുകൾ സംഘടിപ്പിക്കുകയാണ്. പുതിയ മൊബൈൽ ആപ്പിന്റെ സേവനം ഉപയോഗിച്ച് കുടിശ്ശിക സംബന്ധിച്ച വിവരങ്ങൾ നേരിട്ട് തൊഴിലാളികളുടെ ഫോണിലേക്ക് എത്തിക്കുകയും അതുവഴി അംശാദായ കളക്ഷനിൽ കാര്യമായ പുരോഗതി ഉറപ്പാക്കുകയും ചെയ്യും. ഈ നടപടിയിലൂടെ പ്രതിവർഷം ബോർഡിന് കോടിക്കണക്കിന് രൂപയുടെ അധിക വരുമാനം ലഭിക്കുമെന്ന് പ്രതീക്ഷിക്കുന്നു. ആപ്പിലൂടെ ബോർഡിന്റെ പ്രവർത്തനത്തിൽ സ്വാതന്ത്ര്യവും സുതാര്യതയും കാര്യക്ഷമതയും ഉറപ്പാക്കാൻ കഴിയും. ക്ഷേമനിധി ബോർഡിന്റെ പ്രവർത്തനങ്ങൾ ഡിജിറ്റൽവത്കരിച്ച് തൊഴിലാളികൾക്ക് സേവനങ്ങൾ കൂടുതൽ സുഗമമാക്കുന്നതിനായുള്ള ചുവടുവയ്പ്പാണ് മൊബൈൽ ആപ്പിലൂടെ സാധ്യമാകുന്നതെന്ന് മന്ത്രി പറഞ്ഞു.
മൂന്ന് ലക്ഷത്തിലധികം വരുന്ന അംഗങ്ങളുടെയും ഒരു ലക്ഷത്തിലധികം വരുന്ന പെൻഷൻകാരുടെയും ജീവിതത്തിൽ ആശ്വാസവും സംരക്ഷണവും തയ്യൽ തൊഴിലാളി ക്ഷേമനിധി ബോർഡിന്റെ പ്രവർത്തനത്തിലൂടെ സാധ്യമാകുന്നുണ്ട്. വിവാഹാനുകൂല്യം, പെൻഷൻ, മെഡിക്കൽ സഹായം, സ്കോളർഷിപ്പ് തുടങ്ങി നിരവധി ആനുകൂല്യങ്ങൾ ബോർഡിലൂടെ എത്തിച്ചുകൊണ്ടിരിക്കുന്നതിൽ സർക്കാർ അഭിമാനിക്കുന്നതായും മന്ത്രി പറഞ്ഞു.
ഡിജിറ്റൽ ഇടപാടുകൾ വഴിയുള്ള ഓഹരി കുടിശ്ശിക വിതരണത്തിന്റെ ഉദ്ഘാടനം മന്ത്രി നിർവഹിച്ചു. തിരുവനന്തപുരം ജില്ലയിലെ വിവിധ വിഭാഗങ്ങളിലായി 50 ഗുണഭോക്താക്കൾക്ക് 10 ലക്ഷം രൂപയിലധികം വരുന്ന ധനസഹായം ചടങ്ങിൽ വിതരണം ചെയ്തു.
തയ്യൽ തൊഴിലാളി ക്ഷേമനിധി ബോർഡ് ചെയർപേഴ്സൺ എലിസബത്ത് അസിസി അദ്ധ്യക്ഷത വഹിച്ച ചടങ്ങിൽ ബോർഡ് ചീഫ് എക്സിക്യൂട്ടീവ് ഓഫീസർ രഞ്ജിത്ത് പി മനോഹർ സ്വാഗതം പറഞ്ഞു. ബോർഡ് അംഗങ്ങളായ ഇ ജി മോഹനൻ, സുന്ദരൻ കുന്നത്തുള്ളി, കെ കെ ഹരിക്കുട്ടൻ, സതികുമാർ, ബിന്ദു സി, ലിയ ലത്തീഫ് എന്നിവർ പങ്കെടുത്തു.
പിആര്ഡി, കേരള സര്ക്കാര്
