ന്യൂഡൽഹി/മലപ്പുറം: ദേശീയപാത 66 ലെ നിർമ്മാണത്തിലെ പിഴവുകൾക്കെതിരെ കേന്ദ്ര റോഡ് ഗതാഗത, ഹൈവേ മന്ത്രി നിതിൻ ഗഡ്കരി കർശന നടപടി സ്വീകരിച്ചു. നാഷണൽ ഹൈവേ അതോറിറ്റി ഓഫ് ഇന്ത്യ (എൻഎച്ച്എഐ) സൈറ്റ് എഞ്ചിനീയറെ പിരിച്ചുവിടുകയും പ്രോജക്ട് ഡയറക്ടറെ സസ്പെൻഡ് ചെയ്യുകയും ചെയ്തു. മലപ്പുറം കൂരിയാട് തകർന്ന ഭാഗം കെഎൻആർ കൺസ്ട്രക്ഷൻസ് പൊളിച്ചുമാറ്റി 80 കോടി രൂപ ചെലവിൽ പുനർനിർമിക്കണം. അവിടെ ഒരു വയഡക്റ്റ് (തൂണുകൾ താങ്ങിനിർത്തുന്ന ഒരു പാലം) നിർമ്മിക്കണം, നാല് മാസത്തിനുള്ളിൽ പണി പൂർത്തിയാക്കണം.
സുരക്ഷാ, ഡിസൈൻ പിഴവുകൾക്ക് ഉത്തരവാദികളായ കൺസൾട്ടൻസി സ്ഥാപനങ്ങൾക്ക് കാരണം കാണിക്കൽ നോട്ടീസ് നൽകിയിട്ടുണ്ട്. മുംബൈ ആസ്ഥാനമായുള്ള സ്ട്രാറ്റ ജിയോ സിസ്റ്റംസ്, ഹൈദരാബാദ് ആസ്ഥാനമായുള്ള എച്ച്ബിഎസ് ഇൻഫ്രാ എഞ്ചിനീയേഴ്സ്, ശ്രീ ഇൻഫോടെക് എന്നിവർക്കാണ് നോട്ടീസ് നൽകിയിരിക്കുന്നത്.
കേരളത്തിലുടനീളമുള്ള ഹൈവേയുടെ മറ്റ് ഭാഗങ്ങളിൽ പിഴവുകൾ ഉണ്ടായിട്ടുണ്ടോ എന്ന് പരിശോധിക്കാൻ ഐഐടി ഡൽഹിയിൽ നിന്ന് വിരമിച്ച പ്രൊഫസർ ജിവി റാവു നേതൃത്വം നൽകുന്ന മൂന്നംഗ വിദഗ്ധ സമിതിയെ നിയോഗിച്ചു. കൂടുതൽ അന്വേഷണത്തിനായി, പാലക്കാട് ഐഐടി, ജിയോളജിക്കൽ സർവേ ഓഫ് ഇന്ത്യ, സെൻട്രൽ റോഡ് റിസർച്ച് ഇൻസ്റ്റിറ്റ്യൂട്ട് എന്നിവിടങ്ങളിൽ നിന്നുള്ള പ്രതിനിധികൾ ഉൾപ്പെടുന്ന ഒരു സാങ്കേതിക സംഘത്തെയും രൂപീകരിച്ചു.
പ്രൊഫ. റാവുവിന്റെ നേതൃത്വത്തിലുള്ള മൂന്നംഗ സമിതി നേരത്തെ കൂരിയാട് ഒരു കിലോമീറ്റർ ഭാഗം പൊളിച്ചുമാറ്റി പുനർനിർമിക്കാൻ ശുപാർശ ചെയ്തിരുന്നു. ഈ ശുപാർശയാണ് ഇപ്പോഴത്തെ നടപടികളിലേക്ക് നയിച്ചത്. അന്വേഷണ റിപ്പോർട്ട് പ്രകാരം മണ്ണിന്റെ ഗുണനിലവാരം ശരിയായി പരിശോധിച്ചില്ല. ചെലവ് കുറയ്ക്കുന്നതിനായി നെൽവയൽ പ്രദേശത്ത് ഒരു പാലം ഒഴിവാക്കി. പ്രദേശത്ത് വെള്ളം കയറിയപ്പോൾ മണ്ണിലെ മർദ്ദം റോഡ് തകരാൻ കാരണമായി. സർവീസ് റോഡിൽ നിന്ന് 40 അടി ഉയരത്തിൽ മതിൽ കെട്ടി മണ്ണ് നിറച്ചാണ് ഹൈവേ നിർമ്മിച്ചത്. 400 മീറ്റർ നീളമുള്ള ഒരു പാലം നിർമ്മിച്ച് കൂരിയാട് അണ്ടർപാസിനെ നെൽവയലിന്റെ മധ്യത്തിലുള്ള അണ്ടർപാസുമായി ബന്ധിപ്പിക്കാൻ ശുപാർശ ചെയ്തിരുന്നു.
കൂടുതൽ തകർച്ച
വ്യാഴാഴ്ച ദേശീയപാതയിലെ കൂരിയാട് ഭാഗത്താണ് കൂടുതൽ നാശനഷ്ടമുണ്ടായത്. പ്രധാന റോഡിന്റെ ഒരു വശത്തെ മതിൽ ഇടിഞ്ഞു സർവീസ് റോഡിലേക്ക് വീണു. നേരത്തെ അപകടം നടന്ന സ്ഥലത്തിന് സമീപമാണിത്.
വ്യാഴാഴ്ച ഡൽഹിയിൽ നടന്ന പബ്ലിക് അക്കൗണ്ട്സ് കമ്മിറ്റി (പിഎസി) യോഗത്തിൽ ദേശീയപാതയുടെ തകർച്ച ഗുരുതരമാണെന്ന് എൻഎച്ച്എഐ ചെയർമാൻ സന്തോഷ് കുമാർ യാദവ് വിലയിരുത്തി. മൂന്ന് ദിവസത്തെ പരിശോധനയ്ക്കായി ശനിയാഴ്ച കേരളം സന്ദർശിക്കാൻ എൻഎച്ച്എഐ ചെയർമാൻ സന്തോഷ് കുമാർ യാദവിനോട് നിർദ്ദേശിച്ചിട്ടുണ്ട്. ഏഴ് ജില്ലകളിലെ പ്രശ്നബാധിത പ്രദേശങ്ങൾ അദ്ദേഹം സന്ദർശിക്കുകയും നിർമ്മാണ പുരോഗതി വിലയിരുത്തുകയും ചെയ്യും. നിർമ്മാണ നിലവാരവും പുരോഗതിയും വിലയിരുത്താൻ സാങ്കേതിക വിദഗ്ധർ ആരും ഉണ്ടായിരുന്നില്ലെന്ന് പിഎസി ചൂണ്ടിക്കാട്ടി. പെർഫോമൻസ് ഓഡിറ്റ് നടത്തി മൂന്നാഴ്ചയ്ക്കുള്ളിൽ റിപ്പോർട്ട് സമർപ്പിക്കാൻ കംപ്ട്രോളർ ആൻഡ് ഓഡിറ്റർ ജനറലിനോട് (സിഎജി) ആവശ്യപ്പെട്ടു. കേന്ദ്ര ഗതാഗത സെക്രട്ടറി ഉമാശങ്കറും യോഗത്തിൽ പങ്കെടുത്തു.
കോൺട്രാക്ടർമാർ ക്രമക്കേടുകൾ നടത്തിയതായി NHAI സമ്മതിച്ചിട്ടുണ്ട്. യഥാർത്ഥ ചെലവിനേക്കാൾ 40% വരെ കുറഞ്ഞ വിലയ്ക്ക് ഉപകരാറുകൾക്ക് അനുമതി നൽകി, ടെൻഡർ വ്യവസ്ഥകൾ പാലിച്ചിരുന്നില്ല.
