ന്യൂയോര്ക്ക്: അമേരിക്കയിലെ മലയാളി സംഘടനകളുടെ മാതൃസംഘടനയായ ഫെഡറേഷന് ഓഫ് കേരള അസ്സോസിയേഷന്സ് ഇന് നോര്ത്ത് അമേരിക്ക (FOKANA) യുടെ സ്ഥാപക പ്രസിഡന്റ് ഡോ. എം അനിരുദ്ധൻ അന്തരിച്ചു.
ഫൊക്കാന രൂപീകൃതമായതിനു ശേഷം മൂന്നു തവണ അതിന്റെ പ്രസിഡന്റ് പദം അലങ്കരിച്ചിട്ടുള്ള ഡോ. അനിരുദ്ധന് സംഘടനയുടെ ഏറ്റവും മികച്ച പ്രസിഡന്റ് എന്ന ഖ്യാതിയും നേടിയിട്ടുണ്ട്. ഫൊക്കാനയെ കേരളത്തിൽ പരിചയപ്പെടുത്തിയതും 2001-ൽ ആദ്യമായി കേരളാ കൺവൻഷൻ സംഘടിപ്പിച്ചതും ഡോ. അനിരുദ്ധനായിരുന്നു.
1983-ൽ കെ.ആർ. നാരായണൻ അമേരിക്കയിലെ ഇന്ത്യന് അംബാസഡറായിരിക്കെയാണ്, അദ്ദേഹത്തിന്റെ ആശീര്വാദത്തോടെ അമേരിക്കയിലെമ്പാടും ചിതറിക്കിടന്നിരുന്ന മലയാളി സംഘടനകളെ ഒരു കുടക്കീഴില് കൊണ്ടുവരാനുള്ള ശ്രമത്തിന്റെ ഭാഗമായി ഫെഡറേഷന് ഓഫ് കേരള അസ്സോസിയേഷന്സ് ഇന് നോര്ത്ത് അമേരിക്ക (ഫൊക്കാന) എന്ന കൂട്ടായ്മയ്ക്ക് ഡോ. അനിരുദ്ധന് രൂപം നല്കിയത്. തുടര്ന്ന് രണ്ട് പതിറ്റാണ്ടോളം അദ്ദേഹം ഫൊക്കാനയുടെ നേതൃനിരയിൽ തുടരുകയും, ഫൊക്കാനയെ ലോകം അറിയുന്ന പ്രവാസി സംഗമ വേദിയാക്കി മാറ്റുകയും ചെയ്തു.
നോർക്ക ഡയറക്ടര് ബോർഡ് അംഗം, മാതൃഭൂമി ഡയറക്ടർ ബോർഡ് അംഗം എന്നീ നിലകളിൽ പ്രവർത്തിച്ചിരുന്ന അദ്ദേഹം അമേരിക്കയിലെ അറിയപ്പെടുന്ന ബിസിനസുകാരൻ കൂടിയാണ്. ചിക്കാഗോ മലയാളി അസോസിയേഷന്റെ മുൻ പ്രസിഡന്റുകൂടിയാണ് ഡോ. അനിരുദ്ധൻ.
ഓച്ചിറ സ്വദേശിയായ ഡോ. അനിരുദ്ധൻ കൊല്ലം എസ്.എൻ. കോളേജിൽ നിന്നാണ് എം.എസ്.സി ബിരുദം കരസ്ഥമാക്കിയത്. രസതന്ത്രത്തിൽ ഗവേഷണത്തിനായാണ് 1973-ൽ അമേരിക്കയിലെത്തിയത്. ടെക്സസിലെ എ. ആൻഡ് എം. സർവകലാശാലയിൽ ആണവ രസതന്ത്രം (ന്യൂക്ലിയർ കെമിസ്ട്രി) അദ്ധ്യാപകനായിരിക്കെ ന്യൂട്രീഷ്യൻ മേഖലയിലേക്ക് തിരിഞ്ഞു. പിന്നീട് ഈ വിഷയത്തിലും പിഎച്ച്.ഡി. എടുത്തു. തുടർന്ന് ലോകത്തിലെ ഏറ്റവും വലിയ പോഷകാഹാര ഉത്പാദകരായ സാൻഡോസിൻ്റെ ഗവേഷണവിഭാഗം തലവനായി 10 വർഷം സേവനം ചെയ്തു.
കുട്ടികൾക്കായുള്ള പോഷകങ്ങൾ വികസിപ്പിച്ചെടുക്കുന്നതിൽ ഏറെ വർഷം ഗവേഷണം നടത്തി. പിന്നീടാണ് സ്വന്തമായി വ്യവസായ ശൃംഖല വികസിപ്പിച്ചെടുത്തത്. സാൻഡോസിന് വേണ്ടി അമേരിക്കയിലെ ആദ്യത്തെ സ്പോർട്സ് ന്യൂട്രീഷ്യൻ ഉല്പന്നമായ ‘ഐസോ സ്റ്റാർ’ വികസിപ്പിച്ചെടുത്തത് ഡോ. അനിരുദ്ധനടങ്ങുന്ന സംഘമായിരുന്നു. പോഷക ഗവേഷണ, ഉത്പാദന രംഗത്തും പ്രവാസി ഇന്ത്യക്കാരുടെ സാമൂഹികക്ഷേമത്തിനും നൽകിയ സംഭാവനകൾ പരിഗണിച്ച് അദ്ദേഹത്തിന് പ്രവാസി ഭാരതീയ സമ്മാൻ പുരസ്കാരം ലഭിച്ചിട്ടുണ്ട്.
നിരവധി ഭക്ഷ്യോത്പാദന കമ്പനികളുടെ കൺസള്ട്ടന്റായിരുന്ന ഡോ. അനിരുദ്ധന്, അമേരിക്കൻ ഫുഡ് ആൻഡ് ഡ്രഗ് അഡ്മിനിസ്ട്രേഷൻ്റെ (എഫ്.ഡി.എ) ഫുഡ് ലേബൽ റെഗുലേറ്ററി കമ്മിറ്റിയിലും അംഗമായിരുന്നു. അമേരിക്കയിലെ നാഷണൽ ഫുഡ് പ്രൊസസേഴ്സ് അസ്സോസിയേഷൻ മികച്ച ആർ.ആൻഡ്.ഡി ശാസ്ത്രജ്ഞനുള്ള പുരസ്കാരം നൽകി അദ്ദേഹത്തെ ആദരിച്ചിട്ടുണ്ട്. അതുപോലെ, പ്രവാസി ഭാരതീയ പുരസ്കാരം നൽകി കേന്ദ്ര സർക്കാരും അദ്ദേഹത്തെ ആദരിച്ചിട്ടുണ്ട്.
