ഷാര്ജയില് പിറന്നാള് ദിനത്തില് അതുല്യ ശേഖർ എന്ന മലയാളി യുവതിയുടെ ദുരൂഹ മരണത്തില് ഭർത്താവ് സതീഷിനെതിരെ കൊലപാതകത്തിനും സ്ത്രീധന പീഡനത്തിനും കേസെടുത്തു. അതുല്യയുടെ 30-ാം ജന്മദിനത്തിലും പുതിയ ജോലിയിൽ പ്രവേശിച്ച ആദ്യ ദിവസത്തിലുമാണ് മരണം സംഭവിച്ചത്. സ്ത്രീധനത്തിന്റെ പേരിൽ തുടർച്ചയായി പീഡിപ്പിച്ചതായി കുടുംബം ആരോപിച്ചെങ്കിലും ഭർത്താവ് എല്ലാ ആരോപണങ്ങളും നിഷേധിച്ചു.
യുഎഇയിലെ ഷാർജയിലുള്ള അപ്പാർട്ട്മെന്റിൽ ശനിയാഴ്ചയാണ് മലയാളിയായ അതുല്യ ശേഖറിനെ മരിച്ച നിലയിൽ കണ്ടെത്തിയത്. തുടർന്ന് ഭർത്താവിനെതിരെ കേരള പോലീസ് കൊലപാതകക്കുറ്റം ചുമത്തി. റിപ്പോർട്ടുകൾ പ്രകാരം അതുല്യയുടെ 30-ാം ജന്മദിനവും പുതിയ ജോലിയുടെ ആദ്യ ദിവസവും ആയിരുന്നു മരണം.
അതുല്യയുടെ മരണത്തെത്തുടര്ന്ന് ഭർത്താവ് സതീഷിനെ ജോലിയിൽ നിന്ന് പിരിച്ചുവിട്ടു. ഷാർജയിലെ സ്വകാര്യ കമ്പനിയിൽ സൈറ്റ് എഞ്ചിനീയർ ആയിരുന്നു കൊല്ലം ശാസ്താംകോട്ട സ്വദേശിയായ സതീഷ്. ഇക്കാര്യം കമ്പനി സതീഷിനെ അറിയിച്ചിട്ടുണ്ട്. ഒരു വർഷം മുൻപാണ് സതീഷ് ജോലിയിൽ പ്രവേശിച്ചത്.
അതുല്യയുടെ മരണത്തിന് പിന്നിൽ ഭർത്താവായ സതീഷെന്നാണ് കുടുംബത്തിൻ്റെ പരാതി. ഷാർജയിലെ ഫ്ലാറ്റിൽ വെച്ച് സതീഷിൽ നിന്ന് അതുല്യ നേരിട്ടിരുന്ന ക്രൂരതയുടെ ദൃശ്യങ്ങൾ ഉൾപ്പടെയുള്ള തെളിവുകൾ പുറത്തുവന്നതോടെ ചവറ തെക്കുംഭാഗം പൊലീസ് കൊലക്കുറ്റത്തിനും സ്ത്രീധന, ശാരീരിക പീഡനത്തിനും കേസെടുത്തത്. കേസ് അന്വേഷണത്തിന് കരുനാഗപ്പളളി എ.എസ്.പി അഞ്ജലി ഭാവനയുടെ മേൽനോട്ടത്തിൽ പ്രത്യേക സംഘം രൂപീകരിച്ചു. തെക്കുംഭാഗം എസ്എച്ച്ഒയുടെ നേതൃത്വത്തിലുള്ള എട്ടംഗ സംഘത്തിനാണ് അന്വേഷണ ചുമതല.
ജൂലൈ 18 നും 19 നും ഇടയിൽ ഭർത്താവ് സതീഷ് അതുല്യയെ കഴുത്തു ഞെരിച്ച് കൊലപ്പെടുത്തി, വയറ്റിൽ ചവിട്ടി, തലയിൽ പ്ലേറ്റ് കൊണ്ട് അടിച്ചു, അങ്ങനെയാണ് മരണം സംഭവിച്ചതെന്ന് അതുല്യയുടെ അമ്മ നൽകിയ പരാതിയിൽ പറയുന്നു. ഷാർജയിൽ താമസിക്കുന്ന അതുല്യയുടെ സഹോദരിയും സഹോദരീഭർത്താവും പറയുന്നതനുസരിച്ച്, റോള പ്രദേശത്തെ ഫ്ലാറ്റിലാണ് അതുല്യയെ മരിച്ച നിലയിൽ കണ്ടെത്തിയത്.
പീഡന ദൃശ്യം ചിത്രീകരിച്ച അതുല്യയുടെ മൊബൈൽ ഫോൺ കണ്ടെടുക്കണം. അതുല്യയുടെ കുടുംബത്തിൻ്റെയും സുഹൃത്തുക്കളുടെയും മൊഴി രേഖപ്പെടുത്തും. ഷാർജയിൽ നിന്ന് സതീഷിനെ നാട്ടിൽ എത്തിക്കാൻ പൊലീസ് നടപടി തുടങ്ങിയിട്ടുണ്ട്. ആവശ്യമെങ്കിൽ ലുക്കൗട്ട് നോട്ടീസ് പുറത്തിറക്കാനും തീരുമാനമായിട്ടുണ്ട്. അതുല്യ മറ്റുള്ളവരുമായി സഹകരിക്കുന്നത് ഭർത്താവ് സതീഷ് വിലക്കിയിരുന്നെന്ന് ബന്ധു വ്യക്തമാക്കി. അതുല്യ ആത്മഹത്യ ചെയ്യില്ലെന്നും ബന്ധു ജിഷ രജിത്ത് പറഞ്ഞു.
അതുല്യയുടെ മൃതദേഹം നാട്ടിൽ റീ പോസ്റ്റ്മോർട്ടം നടത്തേണ്ടി വന്നാൽ സഹകരിക്കുമെന്ന് കുടുംബം വ്യക്തമാക്കി. റീ പോസ്റ്റ്മോർട്ടത്തിൻ്റെ സാധ്യത പൊലീസ് സൂചിപ്പിച്ചിട്ടുണ്ടെന്നും അച്ഛൻ രാജശേഖരൻ പിള്ള ഷാർജയിലുള്ള അതുല്യയുടെ ബന്ധുക്കൾ വഴി അവിടെയും നിയമ നടപടികൾ തുടരും.
പത്ത് വയസ്സുള്ള ഒരു പെൺകുട്ടിയുടെ അമ്മയായ അതുല്യയുടെ മരണം യുഎഇയിലെ ഇന്ത്യൻ സമൂഹത്തിൽ ഞെട്ടൽ തരംഗങ്ങൾ സൃഷ്ടിച്ചിട്ടുണ്ടെന്ന് റിപ്പോർട്ട് പറയുന്നു. ഷാർജയിൽ 32 വയസ്സുള്ള മറ്റൊരു മലയാളി സ്ത്രീയും 16 മാസം പ്രായമുള്ള മകളും കൊല്ലപ്പെട്ട സംഭവത്തിന് ഏതാനും ആഴ്ചകൾക്കുള്ളിലാണ് ഈ സംഭവം. കൊലപാതക-ആത്മഹത്യ എന്നാണ് പോലീസ് ഇതിനെ വിശേഷിപ്പിച്ചത്. ജൂലൈ 8 ന് യുവതി കുട്ടിയെ കഴുത്ത് ഞെരിച്ച് കൊലപ്പെടുത്തിയ ശേഷം തൂങ്ങിമരിച്ചതായി ഫോറൻസിക് റിപ്പോർട്ട് സ്ഥിരീകരിച്ചു. ദാമ്പത്യത്തിലെ പ്രശ്നങ്ങളാണ് സംഭവത്തിന് കാരണമെന്ന് റിപ്പോർട്ടുണ്ട്.
2014-ൽ വിവാഹസമയത്ത് മതിയായ സ്ത്രീധനം കൊണ്ടുവരാത്തതിന്റെ പേരിൽ അതുല്യയെ നിരന്തരം പീഡിപ്പിച്ചിരുന്നുവെന്നും, ഒരു ബൈക്കും 43 സ്വർണ്ണ നാണയങ്ങളും നൽകിയിരുന്നതായും അതുല്യയുടെ കുടുംബം ആരോപിച്ചതായി റിപ്പോർട്ടിൽ പറയുന്നു.
ഇന്ത്യൻ നീതിന്യായ നിയമത്തിലെ (ബിഎൻഎസ്) നിരവധി വകുപ്പുകൾ പ്രകാരവും 1961 ലെ സ്ത്രീധന നിരോധന നിയമപ്രകാരവും സതീഷിനെതിരെ കേസെടുത്തിട്ടുണ്ട്. സ്ത്രീധനം ആവശ്യപ്പെട്ട് വർഷങ്ങളായി അവർ മാനസികമായും ശാരീരികമായും പീഡനം അനുഭവിച്ചുവെന്ന് അതുല്യയുടെ കുടുംബം ആരോപിച്ചു.
മാധ്യമങ്ങളോട് സംസാരിച്ച സതീഷ്, ആരോപണങ്ങൾ നിഷേധിച്ചു. അതുല്യയുടെ മരണത്തിൽ തനിക്ക് പങ്കില്ലെന്ന് അവകാശപ്പെട്ടു. അവൾ ആത്മഹത്യ ചെയ്യുമെന്ന് താൻ കരുതുന്നില്ലെന്നും ഉത്തരങ്ങൾ വേണമെന്നും സതീഷ് പറഞ്ഞു.
അതേസമയം, മകളുടെ മരണത്തിന്റെ സാഹചര്യങ്ങൾ സംശയാസ്പദമാണെന്ന് പിതാവ് പറഞ്ഞു. “എന്റെ മകൾ ആത്മഹത്യ ചെയ്യുമെന്ന് ഞാൻ കരുതുന്നില്ല. അവളുടെ മരണം ദുരൂഹമാണ്. അവള്ക്ക് എന്താണ് സംഭവിച്ചതെന്ന് കണ്ടെത്തണം. ഭര്ത്താവ് സതീഷ് ഒരു മദ്യപാനിയാണ്. അയാൾ എപ്പോഴും അക്രമാസക്തനാകും. എല്ലാ പീഡനങ്ങളും അവള് സഹിച്ചു. ഇത്തരം സംഭവങ്ങൾ മുമ്പും ഉണ്ടായിട്ടുണ്ട്, പോലീസിൽ ഒരു കേസ് രജിസ്റ്റർ ചെയ്തിട്ടുണ്ട്. അവൾക്ക് എന്ത് സംഭവിച്ചുവെന്ന് ഞങ്ങൾക്ക് അറിയണം” എന്ന് അദ്ദേഹം പറഞ്ഞു.
