റഷ്യയിൽ നിന്ന് എണ്ണ വാങ്ങുന്നതിന് ഇന്ത്യയ്ക്ക് മേലുള്ള തീരുവ വർദ്ധിപ്പിക്കുമെന്ന് ഭീഷണിപ്പെടുത്തിയ അമേരിക്കൻ പ്രസിഡന്റ് ഡൊണാൾഡ് ട്രംപിന്റെ പ്രസ്താവനയെ റഷ്യ വിമർശിച്ചു. “നിയമവിരുദ്ധമായ സമ്മർദ്ദം” എന്നാണ് അവര് ഇതിനെ വിശേഷിപ്പിച്ചത്. ഓരോ പരമാധികാര രാജ്യത്തിനും അതിന്റെ വ്യാപാര പങ്കാളികളെ തിരഞ്ഞെടുക്കാൻ അവകാശമുണ്ടെന്നും അവര് പറഞ്ഞു.
റഷ്യ-ഉക്രെയ്ൻ യുദ്ധം മൂലം ആഗോള രാഷ്ട്രീയത്തിൽ പല മേഖലകളിലും സംഘർഷങ്ങളാണ്. ഈ സാഹചര്യത്തിൽ, റഷ്യയിൽ നിന്ന് എണ്ണ വാങ്ങുന്നത് തുടർന്നാൽ അമേരിക്ക ഇന്ത്യൻ ഉൽപ്പന്നങ്ങൾക്ക് കനത്ത തീരുവ ചുമത്തുമെന്ന് ഡൊണാൾഡ് ട്രംപ് ഇന്ത്യയ്ക്ക് മുന്നറിയിപ്പ് നൽകിയ നടപടിയെയാണ് റഷ്യ ചോദ്യം ചെയ്തത്. ഇന്ത്യയെ ന്യായീകരിച്ചുകൊണ്ട്, ഇന്ത്യയ്ക്ക് ആരുമായി വ്യാപാരം നടത്തണമെന്ന് തിരഞ്ഞെടുക്കാൻ സ്വാതന്ത്ര്യമുണ്ടെന്ന് റഷ്യ പറഞ്ഞു. ആഗോള വേദിയിൽ ഇന്ത്യയുടെ പരമാധികാര അവകാശങ്ങൾക്കുവേണ്ടിയുള്ള ഒരു പ്രധാന വാദമാണ് റഷ്യയുടെ ഈ നിലപാട്.
“റഷ്യയിൽ നിന്ന് ഇന്ത്യ വൻതോതിൽ എണ്ണ വാങ്ങുകയും ആഗോള വിപണിയിൽ ഉയർന്ന വിലയ്ക്ക് അത് വിറ്റ് ലാഭം നേടുകയും ചെയ്യുന്നു” എന്നാണ് ട്രംപ് തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യൽ’ ലെ ഒരു പോസ്റ്റിൽ എഴുതിയത്. ഉക്രെയ്നിലെ മരണങ്ങളിൽ ഇന്ത്യ ശ്രദ്ധിക്കുന്നില്ലെന്നും അതുകൊണ്ടാണ് ഇന്ത്യയ്ക്ക് മേൽ അധിക തീരുവ ചുമത്തുന്നതെന്നുമാണ് ട്രംപിന്റെ ന്യായീകരണം. അതുകൊണ്ട് ഇന്ത്യൻ ഉൽപ്പന്നങ്ങളുടെ തീരുവ “ഗണ്യമായി വർദ്ധിപ്പിക്കുമെന്നും” അദ്ദേഹം പറഞ്ഞു.
ട്രംപിന്റെ ഭീഷണികളോട് ക്രെംലിൻ വക്താവ് ദിമിത്രി പെസ്കോവ് രൂക്ഷമായി പ്രതികരിച്ചു, “ഇത്തരം പ്രസ്താവനകൾ നിയമാനുസൃതമാണെന്ന് ഞങ്ങൾ കരുതുന്നില്ല. ഇത് ഒരു പരമാധികാര രാജ്യത്തിനുമേലുള്ള നിയമവിരുദ്ധമായ സമ്മർദ്ദമാണ്” എന്ന് പറഞ്ഞു. ആരുമായി, എങ്ങനെ വ്യാപാരം നടത്തണമെന്ന് തിരഞ്ഞെടുക്കാൻ ഓരോ രാജ്യത്തിനും അവകാശമുണ്ടെന്നും അദ്ദേഹം കൂട്ടിച്ചേർത്തു. ഇന്ത്യയുടെ തീരുമാനങ്ങളെ പിന്തുണയ്ക്കുന്നുവെന്നും അത്തരം വിദേശ സമ്മർദ്ദം അംഗീകരിക്കില്ലെന്നും റഷ്യ വ്യക്തമാക്കി.
ട്രംപിന്റെ പരാമർശങ്ങൾ അന്യായമാണെന്നും റഷ്യയിൽ നിന്നുള്ള എണ്ണ ഇറക്കുമതിയെക്കുറിച്ചുള്ള അദ്ദേഹത്തിന്റെ വിമർശനം “അന്യായവും പക്ഷപാതപരവു”മാണെന്നും ഇന്ത്യ പറഞ്ഞു. യുഎസും യൂറോപ്യൻ രാജ്യങ്ങളും റഷ്യയുമായി വ്യാപാരം നടത്തുന്നുണ്ടെങ്കിലും ഇന്ത്യയെ മാത്രമാണ് ലക്ഷ്യമിടുന്നതെന്ന് ഇന്ത്യ വാദിച്ചു. ഊർജ്ജ ആവശ്യകതകൾ കണക്കിലെടുത്താണ് തീരുമാനങ്ങൾ എടുക്കുന്നതെന്നും ഇന്ത്യ വ്യക്തമാക്കി.
ആഗോള സമ്മർദ്ദത്തിന് ഇന്ത്യ ഇനി വഴങ്ങില്ലെന്ന വ്യക്തമായ സൂചനയാണ് വീണ്ടും നല്കുന്നത്. റഷ്യയും ഇന്ത്യയും തമ്മിലുള്ള തന്ത്രപരമായ പങ്കാളിത്തം നോക്കുമ്പോൾ, ഊർജ്ജ, സുരക്ഷാ മേഖലകളിൽ ഇരു രാജ്യങ്ങളും തുടർന്നും സഹകരിക്കുമെന്ന് വ്യക്തമാണ്. അതേസമയം, അമേരിക്കയുടെ ഭീഷണികൾ ഇന്ത്യയെ തീരുമാനങ്ങളിൽ നിന്ന് പിന്നോട്ട് വലിക്കുന്നതിൽ ഇനി വിജയിക്കില്ലെന്ന സന്ദേശവും നല്കുന്നു.
