ഗാസ നഗരത്തിന്റെ നിയന്ത്രണം ഏറ്റെടുക്കാനുള്ള ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ പദ്ധതി വെള്ളിയാഴ്ച രാജ്യത്തെ സുരക്ഷാ മന്ത്രിസഭ അംഗീകരിച്ചു. ഹമാസുമായുള്ള ഏകദേശം രണ്ട് വർഷമായി നീണ്ടുനിൽക്കുന്ന സംഘർഷത്തിലെ മറ്റൊരു പ്രധാന ചുവടുവയ്പ്പായാണ് ഈ തീരുമാനത്തെ കാണുന്നത്. യുദ്ധം ഇതിനകം ആയിരക്കണക്കിന് പലസ്തീനികളെ കൊല്ലുകയും ഗാസയുടെ വലിയൊരു ഭാഗം അവശിഷ്ടങ്ങളാക്കി മാറ്റുകയും ചെയ്തിരിക്കെ, മരണസംഖ്യ ഇനിയും വർദ്ധിപ്പിക്കുമെന്ന ആശങ്ക ഈ നീക്കത്തോടെ കൂടുതൽ വർദ്ധിച്ചു.
ഗാസ നഗരത്തിന്റെ നിയന്ത്രണം ഏറ്റെടുക്കാൻ ഇസ്രായേൽ പ്രതിരോധ സേന (ഐഡിഎഫ്) തയ്യാറെടുക്കുമെന്നും യുദ്ധമേഖലയ്ക്ക് പുറത്തുള്ള സിവിലിയൻ പ്രദേശങ്ങളിലേക്ക് മാനുഷിക സഹായം എത്തിക്കുമെന്നും പ്രധാനമന്ത്രിയുടെ ഓഫീസ് പുറത്തിറക്കിയ പ്രസ്താവനയിൽ പറയുന്നു.
യുദ്ധം അവസാനിപ്പിക്കുന്നതിനുള്ള നെതന്യാഹുവിന്റെ അഞ്ച് തത്വങ്ങളും സുരക്ഷാ മന്ത്രിസഭ അംഗീകരിച്ചു. ഹമാസിന്റെ നിരായുധീകരണം, എല്ലാ ബന്ദികളുടെ തിരിച്ചുവരവ്, മേഖലയിലെ സൈനികവൽക്കരണം അവസാനിപ്പിക്കുക, ഗാസ മുനമ്പിലെ ഇസ്രായേലിന്റെ നിയന്ത്രണം, ഒരു ബദൽ സിവിലിയൻ ഗവൺമെന്റ് രൂപീകരിക്കുക എന്നിവയാണ് ഇവയിൽ ചിലത്.
ഫോക്സ് ന്യൂസിന് നൽകിയ അഭിമുഖത്തിൽ നെതന്യാഹു ഇത്തരമൊരു നീക്കത്തെക്കുറിച്ച് സൂചന നൽകിയിരുന്നു. എന്നാല്, പ്രദേശത്തിന്റെ ഭരണപരമായ നിയന്ത്രണം ഇസ്രായേൽ നിലനിർത്താൻ ആഗ്രഹിക്കുന്നില്ലെന്നും അത് അറബ് സേനയ്ക്ക് കൈമാറാൻ ആഗ്രഹിക്കുന്നുവെന്നും അദ്ദേഹം പറഞ്ഞു. “ഹമാസിന്റെ ഭീകരതയിൽ നിന്ന് നമ്മളെയും ഗാസയിലെ ജനങ്ങളെയും മോചിപ്പിക്കാൻ ഞങ്ങൾ ആഗ്രഹിക്കുന്നു… അത് ഞങ്ങളോടൊപ്പം സൂക്ഷിക്കാൻ ഞങ്ങൾ ആഗ്രഹിക്കുന്നില്ല. ഞങ്ങൾക്ക് ഒരു സുരക്ഷാ വലയം മാത്രമേ ആവശ്യമുള്ളൂ. ഞങ്ങൾ അത് ഭരിക്കാൻ ആഗ്രഹിക്കുന്നില്ല” എന്ന് നെതന്യാഹു പറഞ്ഞു.
സുരക്ഷാ മന്ത്രിസഭയുടെ തീരുമാനം ഇനി പൂർണ്ണ മന്ത്രിസഭയുടെ അംഗീകാരത്തിനായി വിടും, ഞായറാഴ്ച യോഗം ചേരാൻ സാധ്യതയുണ്ട്. എന്നാല്, ഈ നിർദ്ദേശത്തിന് ഇസ്രായേലിനുള്ളിൽ നിന്ന് എതിർപ്പും നേരിടുന്നുണ്ട്.
ഒക്ടോബർ 7 ലെ ആക്രമണത്തിൽ ഹമാസ് തട്ടിക്കൊണ്ടുപോയ ബാക്കിയുള്ള ബന്ദികളുടെ കുടുംബങ്ങൾ പറയുന്നത് ഈ നീക്കം തങ്ങളുടെ പ്രിയപ്പെട്ടവരുടെ ജീവൻ അപകടത്തിലാക്കുമെന്നാണ്.
