ന്യൂഡല്ഹി: 2024 ലോക്സഭാ തെരഞ്ഞെടുപ്പിൽ ‘വോട്ട് മോഷണ’ത്തിനെതിരെ ഇന്ന് പാർലമെന്റ് മുതൽ തിരഞ്ഞെടുപ്പ് കമ്മീഷൻ വരെ പ്രതിപക്ഷ പാർട്ടികളുടെ വലിയ പ്രകടനം നടക്കും. 25 ലധികം പാർട്ടികളിൽ നിന്നുള്ള 300 ലധികം എംപിമാർ ഇന്ന് രാവിലെ 11:30 ന് പാർലമെന്റ് പരിസരത്തുനിന്ന് മാർച്ച് ആരംഭിക്കും. കോൺഗ്രസ്, സമാജ്വാദി പാർട്ടി, ടിഎംസി, ഡിഎംകെ, എഎപി, ഇടതുപക്ഷ പാർട്ടി, ആർജെഡി, എൻസിപി (ശരദ് പവാർ വിഭാഗം), ശിവസേന (ഉദ്ധവ് താക്കറെ വിഭാഗം), നാഷണൽ കോൺഫറൻസ് തുടങ്ങിയ പാർട്ടികൾ ഈ മാർച്ചിൽ ചേരും.
ബീഹാറിൽ നടന്നുകൊണ്ടിരിക്കുന്ന സ്പെഷ്യൽ ഇന്റൻസീവ് റിവിഷൻ (എസ്ഐആർ) പ്രക്രിയയും ലോക്സഭാ തെരഞ്ഞെടുപ്പിലെ വോട്ടെടുപ്പിലെ കൃത്രിമത്വവുമാണ് മാർച്ചിന്റെ പ്രധാന വിഷയം. വോട്ട് മോഷണം ജനാധിപത്യത്തിന്റെ അടിത്തറ ഇളക്കുന്നുവെന്ന് പ്രതിപക്ഷ എംപിമാർ ആരോപിക്കുന്നു. തിരഞ്ഞെടുപ്പ് കമ്മീഷനിൽ നിന്ന് സുതാര്യത ആവശ്യപ്പെടുന്നതിനായി സാധാരണക്കാർക്ക് പിന്തുണ രേഖപ്പെടുത്താൻ കഴിയുന്ന ഒരു വെബ് പോർട്ടലും കോൺഗ്രസ് ഞായറാഴ്ച ആരംഭിച്ചു.
കർണാടകയിലെ ബെംഗളൂരു സെൻട്രലിലെ മഹാദേവപുര നിയമസഭാ സീറ്റിൽ ഒരു ലക്ഷത്തിലധികം വോട്ടുകൾ മോഷ്ടിക്കപ്പെട്ടുവെന്ന് രാഹുൽ ഗാന്ധി അടുത്തിടെ ആരോപിച്ചിരുന്നു. ‘അഞ്ച് വ്യത്യസ്ത രീതികളിൽ ഏകദേശം 1,00,250 വോട്ടുകൾ മോഷ്ടിക്കപ്പെട്ടു’ എന്ന് അദ്ദേഹം ഒരു പത്രസമ്മേളനത്തിൽ പറഞ്ഞു. എന്നാല്, തിരഞ്ഞെടുപ്പ് കമ്മീഷൻ ഈ ആരോപണങ്ങൾ പൂർണ്ണമായും തള്ളുകയും രാഹുൽ ഗാന്ധിയോട് തെളിവു സഹിതം സത്യവാങ്മൂലം നൽകാൻ ആവശ്യപ്പെടുകയും ചെയ്തു.
കഴിഞ്ഞ മാസം ആം ആദ്മി പാർട്ടി ഇന്ത്യ സഖ്യം വിട്ടിരുന്നെങ്കിലും, ഈ മാർച്ചിൽ അവരും പങ്കെടുക്കുന്നുണ്ട്. പ്രതിപക്ഷ ഐക്യത്തിന്റെ ഭാഗമായി, ആം ആദ്മി പാർട്ടിക്കും ഇതിൽ പങ്കെടുക്കാൻ കഴിയുന്ന തരത്തിൽ ഒരു സഖ്യ ബാനറും ഇല്ലാതെയാണ് ഈ പരിപാടി സംഘടിപ്പിക്കുന്നതെന്ന് ടിഎംസി എംപി സാഗരിക ഘോഷ് പറഞ്ഞു.
അതേസമയം, ഈ മാർച്ചിന് ഡൽഹി പോലീസ് ഇതുവരെ അനുമതി നൽകിയിട്ടില്ല. പ്രതിപക്ഷം ഔദ്യോഗിക അനുമതി തേടിയിട്ടില്ലെന്ന് പേര് വെളിപ്പെടുത്താത്ത ഒരു മുതിർന്ന പോലീസ് ഉദ്യോഗസ്ഥൻ പറഞ്ഞു. ഇംഗ്ലീഷ്, ഹിന്ദി, തമിഴ്, ബംഗാളി, മറാത്തി എന്നീ ഭാഷകളിലുള്ള ബാനറുകളുമായി പ്രതിഷേധക്കാർ തിരഞ്ഞെടുപ്പ് കമ്മീഷനിലെത്തി ‘വോട്ട് മോഷണം നിർത്തുക’ എന്ന മുദ്രാവാക്യം വിളിക്കും.
