തലവടി : ഒന്നാം വിവാഹ വാർഷികാഘോഷത്തിന് ജോലി സ്ഥലത്തുനിന്ന് വീട്ടിലേക്ക് പുറപ്പെട്ട ആരോഗ്യ പ്രവർത്തക വഴിമദ്ധ്യേ കെഎസ്ആർടിസി ബസ്സിടിച്ച് മരണമടഞ്ഞു. തലവടി ആനപ്രമ്പാൽ തെക്ക് യു.പി.സ്കൂളിന് സമീപം കണിച്ചേരിൽ ചിറ മെറീന ഷാനോ (24) ആണ് മരിച്ചത്. ബുധനാഴ്ച രാത്രി 8 മണിയോടുകൂടി അമ്പലപ്പുഴ – തിരുവല്ല സംസ്ഥാന പാതയിൽ കേളമംഗലത്ത് വെച്ചാണ് അപകടം. ബൈക്കും ബസും കൂട്ടിയിടിച്ചതിനെ തുടർന്ന് റോഡിലേക്ക് തെറിച്ചുവീണ മെറീനയുടെ മുകളിലൂടെ ബസ് കയറിയിറങ്ങിയാണ് ദാരുണാന്ത്യം സംഭവിച്ചത്.
എറണാകുളം മാതാ അമ്യതാനന്ദമയി ആശുപതിയിൽ നഴ്സാണ് മെറീന. അമ്പലപ്പുഴ റെയിൽവേ സ്റ്റേഷനിൽ ട്രയിനിൽ എത്തിയ മെറീനയെ ഭർത്താവ് ഷാനോ കെ ശാന്തപ്പൻ ബൈക്കിലെത്തി വീട്ടിലേക്ക് കൊണ്ടുപോകുന്നതിനിടെയാണ് അപകടം. ഗുരുതരമായി പരിക്കേറ്റ ഷാനോ കെ ശാന്തപ്പനെ സ്വകാര്യ ആശുപത്രിയിലേക്ക് മാറ്റി. എടത്വാ പോലീസ് മേൽനടപടി സ്വീകരിച്ചു.
ഇന്ന് (വെള്ളിയാഴ്ച 12-12- 2025) രാവിലെ 8 മണിക്ക് പൊതുദര്ശനത്തിന് വെച്ച മൃതദേഹം, വിലാപയാത്രയായി ഭർത്താവിന്റെ വസതിയായ തലവടി ആനപ്രമ്പാൽ തെക്ക് കണിച്ചേരിചിറ വീട്ടിൽ ഷാനോ കെ ശാന്തപ്പന്റെ വസതിയിൽ എത്തിച്ച് ഭവനത്തിലെ ശുശ്രൂഷകള്ക്ക് ശേഷം 2.30ന് തലവടി വെള്ളക്കിണർ ഐപിസി ഫിലഡൽഫിയ ചർച്ച് സെമിത്തേരിയിൽ സംസ്ക്കരിക്കും.
