തിരുവനന്തപുരം: എഐ-അധിഷ്ഠിത സാങ്കേതിക വിദ്യ, ഡിസൈൻ, എഞ്ചിനീയറിംഗ് എന്നിവയിൽ വൈദഗ്ദ്ധ്യമുള്ള ആഗോള ഡിജിറ്റൽ പരിവർത്തന കമ്പനിയായ യു എസ് ടി യുമായി പ്രമുഖ വാഹന നിർമ്മാതാക്കളായ ഔഡി ഗ്രൂപ്പ് തന്ത്രപ്രധാനമായ പങ്കാളിത്തത്തിൽ ഏർപ്പെട്ടു. ഔഡി ഗ്രൂപ്പിന്റെ ഭാഗമായ ലംബോർഗിനിയുടെ സഹസ്ഥാപനമായ ഇറ്റാൽഡിസൈനിൽ ഭൂരിപക്ഷ ഓഹരി സ്വന്തമാക്കികൊണ്ടുള്ള കരാറിൽ യു എസ് ടി ഒപ്പുവച്ചു. ദീർഘകാലാടിസ്ഥാനത്തിൽ ഇറ്റാൽഡിസൈനിന്റെ തന്ത്രപരമായ പങ്കാളിയായും കമ്പനിയുടെ സുപ്രധാന ഉപഭോക്താവായും ഔഡി തുടരും.
ഇറ്റാൽഡിസൈനിന്റെ ഭൂരിഭാഗം ഓഹരികളും ഏറ്റെടുക്കുന്നതിലൂടെ, യുഎസ് ടി യുടെ ഓട്ടോമോട്ടീവ് എഞ്ചിനീയറിംഗ്, ആർട്ടിഫിഷ്യൽ ഇന്റലിജൻസ്, സോഫ്റ്റ്വെയർ അധിഷ്ഠിത വാഹന വികസന സങ്കേതങ്ങൾ, ഡിജിറ്റൽ ആവാസവ്യവസ്ഥ, ഡിസൈൻ എന്നിവയിലെ വൈദഗ്ധ്യവും വാഹന രൂപകൽപ്പന, എഞ്ചിനീയറിംഗ്, പ്രോട്ടോടൈപ്പിംഗ്, ചെറുകിട സീരീസുകളുടെ ഉൽപ്പാദനം, ഓട്ടോമോട്ടീവ് ഇലക്ട്രോണിക്സ് എന്നിവയിൽ ഇറ്റാൽഡിസൈനിന്റെ മികവും സംയോജിപ്പിക്കുന്ന ശക്തമായ ഒരു പങ്കാളിത്തമാണ് ഈ കരാറിലൂടെ സാധ്യമാകുന്നത്. ആശയ രൂപീകരണവും രൂപകൽപ്പനയും മുതൽ ഹാർഡ്വെയർ, സോഫ്റ്റ്വെയർ വികസനം, ഉൽപ്പാദന സങ്കേതങ്ങൾ വരെയുള്ള സമഗ്രവും സംയോജിതവുമായ സേവനങ്ങൾ വാഗ്ദാനം ചെയ്യാൻ ഇരു കമ്പനികൾക്കും ഒരുമിച്ച് സാധിക്കും. പൂർണ്ണമായും ആധുനിക രീതിയിൽ ഡിജിറ്റൽ സാങ്കേതിക വിദ്യയിലൂടെ വാഹന വികസനം ശക്തിപ്പെടുത്തുന്നതിനായാണ് ഈ പങ്കാളിത്തം വിഭാവനം ചെയ്യുന്നത്.
കൂടാതെ, യുഎസ് ടിയും ഇറ്റാൽഡിസൈനും ഒരുമിച്ച് ആഗോള വ്യാപനം സാധ്യമാക്കാനുള്ള പ്രയത്നങ്ങൾക്ക് തുടക്കമാകും. ഒപ്പം, മുപ്പതിലധികം രാജ്യങ്ങളിലെ ആഗോള സാന്നിധ്യം വിപുലീകരിക്കാൻ ഇറ്റാൽഡിസൈനിനുമായുള്ള പങ്കാളിത്തം യുഎസ് ടിയെ പ്രാപ്തമാക്കും. പുതിയ ഭൂരിപക്ഷ ഓഹരി ഉടമ എന്ന നിലയിൽ യു എസ് ടി ഇറ്റാൽഡിസൈനിന്റെ പൈതൃകം, ഡിസൈൻ സംസ്കാരം, ജീവനക്കാരുടെ മികവ് എന്നിവ ശക്തിപ്പെടുത്തുകയും ചെയ്യും.
ഇറ്റാൽഡിസൈനിന്റെ ദീർഘകാല പങ്കാളിയായി ഔഡി തുടരുന്നതിനോടൊപ്പം, അഞ്ച് പതിറ്റാണ്ടിലേറെയായി നിലനിൽക്കുന്ന ഇറ്റാൽഡിസൈനിന്റെ പ്രശസ്തി രൂപപ്പെടുത്തിയ മേഖലകളിൽ തുടർച്ചയായ സഹകരണവും ഉറപ്പാക്കും. 2010 മുതൽ ഇറ്റാൽഡിസൈൻ ഫോക്സ്വാഗൺ ഗ്രൂപ്പിന്റെ ഭാഗമാണ്. യു എസ് ടി യും ഔഡി ഗ്രൂപ്പും തമ്മിലുള്ള കരാർ വ്യവസ്ഥാപരമായ അംഗീകാരങ്ങൾക്ക് വിധേയമാണ്. യുഎസ് ടി യും ഔഡി ഗ്രൂപ്പും നിക്ഷേപ മൂല്യമോ മറ്റ് കരാർ വിശദാംശങ്ങളോ വെളിപ്പെടുത്തിയിട്ടില്ല.
“ഏറെ വർഷങ്ങളായി ഇറ്റാൽഡിസൈൻ ഞങ്ങളുടെ വികസന ശൃംഖലയിൽ ഒരു സുപ്രധാന പങ്കാളിയാണ്. ഡിസൈൻ മുതൽ പ്രോട്ടോടൈപ്പ്, സീരീസ് വികസനം വരെയുള്ള വൈദഗ്ദ്ധ്യങ്ങൾ ഇറ്റാൽഡിസൈൻ ഉറപ്പാക്കി വരുന്നു. പുതിയ ഉടമസ്ഥാവകാശ ഘടനയ്ക്ക് കീഴിൽ ഞങ്ങളുടെ സഹകരണം വിജയം കൈവരിക്കുകയും ശക്തമായ ഫലങ്ങൾ നൽകുകയും ചെയ്യുമെന്ന് ഞങ്ങൾക്ക് ഉറപ്പുണ്ട്. പുതിയ വിപണി അവസരങ്ങൾ തുറക്കുന്നതിനൊപ്പം ഇറ്റാൽഡിസൈനിന്റെ ഉറച്ച അടിത്തറ ശക്തിപ്പെടുത്തുന്നതിനുള്ള ഏറ്റവും അനുയോജ്യമായ പങ്കാളിയാണ് യുഎസ് ടി . ഓട്ടോമോട്ടീവ് ഡിസൈനിലും എഞ്ചിനീയറിംഗിലും ഇറ്റാൽഡിസൈൻ ഒരു നൂതനാശയമായി തുടരുന്നുവെന്ന് ഉറപ്പാക്കാൻ ഞങ്ങൾ ഒരുമിച്ച് ലക്ഷ്യമിടുന്നു,” ഔഡി എ ജി ടെക്നിക്കൽ ഡെവലപ്മെന്റ് ബോർഡ് ഓഫ് മാനേജ്മെന്റ് അംഗവുമായ ജെഫ്രി ബൂക്കോ പറഞ്ഞു.
“മൊബിലിറ്റിയുടെ പുത്തൻ അനുഭവങ്ങൾ രൂപപ്പെടുത്തിയ ഇറ്റാൽഡിസൈനിന്റെ ഡിസൈൻ മികവ് ആഗോളതലത്തിൽ അംഗീകരിക്കപ്പെട്ട ഒന്നാണ്. പുതിയ അധ്യായത്തിനു തുടക്കമാകുന്ന ഈ അവസരത്തിൽ, യു എസ് ടി യിൽ അർപ്പിച്ചിരിക്കുന്ന വിശ്വാസത്തിന് ഞങ്ങൾ കൃതാർത്ഥരാണ്. ഇറ്റാൽഡിസൈനിന്റെ ദർശനത്തെ പിന്തുണയ്ക്കുക, അതിന്റെ പൈതൃകത്തെ ബഹുമാനിക്കുക, ടീമിനെ തുടർന്നും വളരാൻ സഹായിക്കുന്ന പുതിയ കഴിവുകൾ കൊണ്ടുവരിക എന്നിവയാണ് ഞങ്ങളുടെ പങ്ക്. പുതിയ ഉൽപ്പന്നങ്ങൾ നിർമ്മിക്കാൻ സഹായിക്കുന്നതിന് ഇറ്റാൽഡിസൈനുമായും ഔഡി ഗ്രൂപ്പിലുടനീളമുള്ള ഞങ്ങളുടെ പങ്കാളികളുമായും സഹകരിച്ച് പ്രവർത്തിക്കാൻ ഞങ്ങൾ ആഗ്രഹിക്കുന്നു,” യുഎസ് ടി ചീഫ് എക്സിക്യൂട്ടീവ് ഓഫീസർ കൃഷ്ണ സുധീന്ദ്ര അഭിപ്രായപ്പെട്ടു.
“ഈ പങ്കാളിത്തത്തിൽ ഉൾപ്പെട്ടിരിക്കുന്ന കമ്പനികളെ കാത്തിരിക്കുന്നത് വലിയ നേട്ടങ്ങളാണ്. പുതിയ വിപണികളിലെ സേവനങ്ങളെ ദ്രുതഗതിയിൽ വികസിപ്പിക്കാനും വിവിധ അന്താരാഷ്ട്ര വിപണികളിൽ ആഴത്തിലുള്ള വ്യാപനം കൈവരിക്കാനും ഇറ്റാൽഡിസൈനെ ഈ കരാർ അനുവദിക്കും. ഓട്ടോമോട്ടീവ് മേഖലയിലും മറ്റ് ഉയർന്ന സാങ്കേതിക വ്യാവസായിക മേഖലകളിലും ലോകമെമ്പാടുമുള്ള ഹാർഡ്വെയറിന്റെയും സോഫ്റ്റ്വെയറിന്റെയും ആദ്യത്തെ പൂർണ്ണ സംയോജനക്കാരാകാൻ ഇറ്റാൽഡിസൈൻ ലക്ഷ്യമിടുന്നു, ” ഇറ്റാൽഡിസൈൻ ചീഫ് എക്സിക്യൂട്ടീവ് ഓഫീസർ അന്റോണിയോ കാസു പറഞ്ഞു.
“വാഹന രൂപകൽപ്പനയിലും നിർമ്മാണത്തിലും ഇറ്റാൽഡിസൈനിന്റെ പ്രശസ്തമായ പൈതൃകവും വാഹന ഇലക്ട്രോണിക്സ്, എംബഡഡ് സാങ്കേതിക വിദ്യകൾ, നിർമ്മിത ബുദ്ധി എന്നീ മേഖലകളിലുള്ള യുഎസ് ടി യുടെ വൈദഗ്ധ്യവും സംയോജിപ്പിച്ച് മൊബിലിറ്റി മേഖലയിൽ പരിവർത്തനം സാധ്യമാക്കാനുള്ള ഞങ്ങളുടെ കാഴ്ചപ്പാടിനെയാണ് ഈ ഏറ്റെടുക്കൽ പ്രതിഫലിപ്പിക്കുന്നത്. മികവുറ്റ ഡിസൈൻ സാധ്യതകളുടെയും നൂതന ഡിജിറ്റൽ എഞ്ചിനീയറിംഗിന്റെയും ഈ സംയോജനം ഞങ്ങളെ ഓട്ടോമോട്ടീവ് നവീകരണത്തിന്റെ മുൻനിരയിൽ നിർത്തുകയാണ്. പുതു തലമുറയിലെ ഉൽപ്പന്നങ്ങളുടെ രൂപകൽപ്പന, സിമുലേഷനുകൾ, വാഹന ഇലക്ട്രോണിക്സ്, കണക്റ്റിവിറ്റി, എ ഡി എ എസ്, ഹൈപ്പർ-പേഴ്സണലൈസേഷൻ തുടങ്ങിയവയെ അടിസ്ഥാനമാക്കി, വാഹന നവീകരണത്തിന്റെ ഭാവിയെ നയിക്കാൻ ഞങ്ങൾ തയ്യാറെടുക്കുകയാണ്. സോഫ്റ്റ്വെയർ-അധിഷ്ഠിത വാഹന യുഗത്തിൽ അവയുടെ പരിണാമം ത്വരിതപ്പെടുത്തുന്നതിന് ആഗോളതലത്തിലുള്ള ഒറിജിനൽ എക്വിപ്മെന്റ് നിർമ്മാതാക്കളുമായി ഞങ്ങൾ ഒരുമിച്ച് സഹകരിച്ചു പ്രവർത്തിക്കും,” യുഎസ് ടി ചീഫ് ഓപ്പറേറ്റിംഗ് ഓഫീസർ ഗിൽറോയ് മാത്യു പറഞ്ഞു.
ഔഡി ഗ്രൂപ്പിനെക്കുറിച്ച്
പ്രീമിയം, ആഡംബര വിഭാഗങ്ങളിലെഏറ്റവും വിജയകരമായ ഓട്ടോമൊബൈല്, മോട്ടോര് സൈക്കിള് നിര്മ്മാതാക്കളില് ഒന്നാണ് ഔഡി ഗ്രൂപ്പ്. ഔഡി, ബെന്റ്ലി, ലംബോര്ഗിനി, ഡ്യുക്കാട്ടി എന്നീ വാഹന ബ്രാന്ഡുകള് 13 രാജ്യങ്ങളിലായി 22 സ്ഥലങ്ങളിലാണ് ഉദ്പാദിപ്പിക്കുന്നത്. ഔഡിയും പങ്കാളികളും ലോകമെമ്പാടുമുള്ള 100-ലധികം വിപണികളില് സാന്നിധ്യമുള്ളവയാണ്. 2024 ഡിസംബര് 31 വരെ, 88,000-ത്തിലധികം ജീവനക്കാര് ഔഡി ഗ്രൂപ്പില് ജോലി ചെയ്തിട്ടുണ്ട്. അവരില് 55,000-ത്തിലധികം പേര് ജര്മ്മനിയിലെ ഔഡി എജിയിലാണ്സേവനം അനുഷ്ടിച്ചിട്ടുള്ളത്. ആകര്ഷകമായ ബ്രാന്ഡുകളും നിരവധി പുതിയ മോഡലുകളും ഉപയോഗിച്ച്, സുസ്ഥിരവും പൂര്ണ്ണമായും നെറ്റ്വര്ക്ക് ചെയ്തതുമായ പ്രീമിയം വാഹന ദാതാവായി മാറുന്നതിനുള്ള പാത ഔഡി ഗ്രൂപ്പ് പിന്തുടര്ന്നു വരുന്നു. കൂടുതല് വിവരങ്ങള്ക്ക്, www.audi.com/en സന്ദര്ശിക്കുക.
ഇറ്റാല് ഡിസൈനിനെക്കുറിച്ച്
ഡിസൈന്, എഞ്ചിനീയറിംഗ്, ഉല്പ്പാദനം എന്നീ മേഖലകളില് ആഗോള സാന്നിധ്യമുള്ള കമ്പനിയാണ് ഇറ്റാല്ഡിസൈന്. ഓട്ടോമോട്ടീവ് മേഖലയിലെ നവീകരണത്തിനായുള്ള ഉപഭോക്തൃ കേന്ദ്രീകൃത സമീപനത്തിന് പേരുകേട്ട കമ്പനിയാണ്. മികവുറ്റ സിസ്റ്റം ഇന്റഗ്രേറ്ററായി പ്രവര്ത്തിക്കുന്ന ഇറ്റാല്ഡിസൈന്, ഓട്ടോമോട്ടീവ് ലോകത്തിലെ ചുരുക്കം വരുന്ന വണ്-സ്റ്റോപ്പ് ഷോപ്പുകളില് ഒന്നാണ്. ഇറ്റലിയിലെ ടൂറിനിലെ മോണ്കാലിയേരി ആസ്ഥാനമായി പ്രവര്ത്തിക്കുന്ന ഇറ്റാല്ഡിസൈന്, 10 അന്താരാഷ്ട്ര സൈറ്റുകളിലായി 1,300-ലധികം പ്രൊഫഷണലുകളെ വിന്യസിച്ച്, 57 വര്ഷത്തിലേറെയായി മൊബിലിറ്റി, ഉല്പ്പന്നം, ഗതാഗത രൂപകല്പ്പന എന്നിവയുടെ ഭാവി രൂപപ്പെടുത്തുന്നു. ആശയം മുതല് ഉല്പാദനം വരെ നീളുന്ന എന്ഡ്-ടു-എന്ഡ് സംയോജിത പരിഹാരങ്ങള് കമ്പനി വാഗ്ദാനം ചെയ്യുന്നു. വാഹന മേഖലയില് ശ്രദ്ധ കേന്ദ്രീകരിച്ചിരിക്കുന്ന ഇറ്റാല്ഡിസൈനിന്റെ മള്ട്ടി ഡിസിപ്ലിനറി ടീമുകള് വിവിധ ബ്രാന്ഡുകള്ക്കും വളര്ന്നു വരുന്ന കമ്പനികള്ക്കും വേണ്ടി പ്രോജക്ടുകള് കൈകാര്യം ചെയ്യുന്നുണ്ട്. അത്യാധുനിക സങ്കേതങ്ങളും ഉപകരണങ്ങളും ഉപയോഗിച്ച് പുതിയ ഉല്പ്പന്നങ്ങളുടെ വ്യവസായവല്ക്കരണത്തെ പിന്തുണയ്ക്കുന്നത്തില് ശ്രദ്ധ കേന്ദ്രീകരിക്കുന്ന കമ്പനിയാണ്.
100-ലധികം ഷോകാറുകളും ഗവേഷണ പ്രോട്ടോടൈപ്പുകളും, വര്ഷങ്ങളായി യാഥാര്ത്ഥ്യമാക്കിയ 300-ലധികം ഉല്പാദന മോഡലുകളും ഉള്ള ഇറ്റാല്ഡിസൈനിന്റ്റെ വാഹന ഡിസൈന് പാരമ്പര്യത്തോടൊപ്പം, ഉപഭോക്തൃ വസ്തുക്കള് മുതല് പ്രൊഫഷണല് ഉപകരണങ്ങള്, പൊതുഗതാഗത പരിഹാരങ്ങള് വരെയുള്ള 1,000-ലധികം വ്യാവസായിക, ഗതാഗത ഡിസൈന് ഉല്പ്പന്നങ്ങള് കമ്പനിയുടെ വ്യാവസായിക ഡിസൈന് വിഭാഗം വികസിപ്പിച്ചിട്ടുണ്ട്. കൂടുതല്വിവരങ്ങള്ക്ക്, www.italdesign.it സന്ദര്ശിക്കുക.
യുഎസ് ടി
1999 മുതല് ലോകത്തിലെ മികച്ച കമ്പനികളുമായി സഹകരിച്ച് പരിവര്ത്തനത്തിനായി മികവോടെ പ്രവര്ത്തിച്ചു വരികയാണ് യു എസ് ടി. സാങ്കേതിക വിദ്യയിലൂന്നിയും, ജനങ്ങളില് നിന്നും പ്രചോദനം ഉള്ക്കൊണ്ടും രൂപകല്പ്പന മുതല് പ്രവര്ത്തനം വരെയുള്ള ഘട്ടങ്ങളില് ഞങ്ങളുടെ ഉപയോക്താക്കളുമായി കൈകോര്ത്തു മുന്നോട്ടു പോകുക എന്നതാണ് ഞങ്ങളുടെ പ്രവര്ത്തന രീതി. ഞങ്ങളുടെ ഡിജിറ്റല് സൊല്യൂഷന്സ്, പ്രോപ്രൈറ്ററി പ്ലാറ്റ്ഫോംസ്, എഞ്ചിനീയറിംഗ്, ആര് ആന്ഡ് ഡി, ഉല്പ്പന്നങ്ങള്, നവീകരണ ആവാസവ്യവസ്ഥ എന്നിവ പ്രയോജനപ്പെടുത്തി പ്രധാന വെല്ലുവിളികള്ക്ക് ശക്തമായ പരിഹാരം കണ്ടെത്തുന്നു. ആഴത്തിലുള്ള വ്യവസായ പരിജ്ഞാനം, ഭാവിവെല്ലുവിളികളെ നേരിടാനുള്ള മനസ്സാന്നിധ്യം, വൈദഗ്ദ്ധ്യം എന്നിവ ഉപയോഗപ്പെടുത്തി ഉപയോക്താക്കള്ക്കായി ദീര്ഘകാലം ഫലപ്രദമായ സേവനങ്ങള് ആഗോളതലത്തില് നല്കാന് ഞങ്ങള് സദാ സജ്ജരാണ്. 30 ലേറെ രാജ്യങ്ങളിലായി, 30,000ത്തിലധികം ജീവനക്കാരുമായി, ലോകത്തിലെ കോടിക്കണക്കിന് ജനങ്ങള്ക്ക് അതിരറ്റ സേവനങ്ങള് ഞങ്ങളുടെ സ്ഥാപനം നല്കുന്നു. ഞങ്ങളെ www.ust.com സന്ദര്ശിക്കു.
