ഇന്തോനേഷ്യയിൽ വിവാഹിതരാകാത്ത യുവതിക്കും യുവാവിനും ലൈംഗിക ബന്ധത്തിൽ ഏർപ്പെട്ടതിനും മദ്യപിച്ചതിനും താലിബാന് സ്റ്റൈല് ശിക്ഷ ലഭിച്ചു. ഇരുവരെയും ചൂരല് കൊണ്ട് 140 തവണ വീതം അടിച്ചാണ് ശിക്ഷ നടപ്പിലാക്കിയത്. യുവതി സംഭവസ്ഥലത്ത് തന്നെ ബോധരഹിതയായി. ശരിയത്ത് നിയമപ്രകാരമായിരുന്നു ശിക്ഷ. സമീപ വർഷങ്ങളിൽ ഈ മേഖലയിലെ ഏറ്റവും കഠിനമായ ശിക്ഷകളിൽ ഒന്നാണിത്.
ഇന്തോനേഷ്യയിൽ ശരിയത്ത് നിയമം പൂർണ്ണമായും നടപ്പിലാക്കുന്ന ഏക പ്രവിശ്യയാണ് ആച്ചെ, ഇത്തരം കുറ്റകൃത്യങ്ങൾക്ക് പരസ്യമായി ചാട്ടവാറടിയും ചൂരല് കൊണ്ടുള്ള അടിയും നൽകുന്നത് സാധാരണമാണ്. ഇന്നാണ് (2026 ജനുവരി 29) സംഭവം റിപ്പോര്ട്ട് ചെയ്യപ്പെട്ടത്.
റിപ്പോർട്ട് പ്രകാരം, ബന്ദ ആഷെ നഗരത്തിലെ ഒരു പൊതു പാർക്കിൽ ഡസൻ കണക്കിന് കാഴ്ചക്കാർ നോക്കിനിൽക്കെയാണ് ശിക്ഷ പരസ്യമായി നടപ്പിലാക്കിയത്. ശരിയ പോലീസാണ് മുള വടി (ചൂരൽ) ഉപയോഗിച്ച് രണ്ടുപേരുടെയും പുറകിൽ അടിച്ചു. ശിക്ഷ നടപ്പാക്കുന്നതിനിടെ യുവതി ബോധരഹിതയായി. അവരെ ഉടൻ തന്നെ ആംബുലൻസിൽ ആശുപത്രിയിലേക്ക് മാറ്റിയതായി റിപ്പോര്ട്ടില് പറയുന്നു.
വിവാഹത്തിന് പുറത്ത് ലൈംഗിക ബന്ധത്തിൽ ഏർപ്പെട്ടതിന് 100 അടിയും മദ്യപിച്ചതിന് 40 അടിയും ഉൾപ്പെടെ ആകെ 140 അടിയാണ് ദമ്പതികൾക്ക് ലഭിച്ചതെന്ന് ബന്ദ അച്ചേ ശരിയ പോലീസ് മേധാവി മുഹമ്മദ് റിജാൽ പറഞ്ഞു. മറ്റ് കുറ്റകൃത്യങ്ങൾക്കും ആറ് പേരടങ്ങുന്ന ഒരു സംഘത്തിന് ശിക്ഷ വിധിച്ചു.
എന്താണ് ശരീഅത്ത് നിയമം?
2001-ൽ, വിഘടനവാദ പ്രസ്ഥാനത്തെ അടിച്ചമർത്താൻ ഇന്തോനേഷ്യൻ സർക്കാർ ആച്ചെയ്ക്ക് പ്രത്യേക സ്വയംഭരണാവകാശം നൽകി. തുടർന്ന്, ശരിയത്ത് നിയമം നടപ്പിലാക്കുകയും 2015-ൽ ഒരു ക്രിമിനൽ കോഡ് നടപ്പിലാക്കുകയും ചെയ്തു. ചൂതാട്ടം, മദ്യപാനം, സ്വവർഗരതി, വിവാഹത്തിന് പുറത്തുള്ള ലൈംഗികത തുടങ്ങിയ കുറ്റകൃത്യങ്ങൾക്ക് ചാട്ടവാറടി ശിക്ഷ നൽകാൻ ഇത് വ്യവസ്ഥ ചെയ്യുന്നു.
2001 ന് ശേഷമുള്ള ഏറ്റവും വലിയ ശിക്ഷയാണ് ഇതെന്ന് വിശ്വസിക്കപ്പെടുന്നു. ആഷെയിൽ ഇത്തരം കേസുകൾ പതിവായി സംഭവിക്കാറുണ്ട്, എന്നാൽ ഇത്രയും വലിയ എണ്ണം വളരെ അപൂർവമായി മാത്രമേ കണ്ടിട്ടുള്ളൂ എന്നും റിപ്പോര്ട്ടില് പറയുന്നു.
