തിരുവനന്തപുരം: നടന് മണിയന് പിള്ള രാജുവിന്റെ വാഹനമിടിച്ച് യുവാക്കൾക്ക് പരിക്കേറ്റ സംഭവത്തിൽ അദ്ദേഹത്തെ അറസ്റ്റ് ചെയ്ത് സ്റ്റേഷൻ ജാമ്യത്തിൽ വിട്ടയച്ചു. അപകടത്തിന് കാരണമായ വാഹനം പോലീസ് കസ്റ്റഡിയിലെടുത്തു. മരണത്തിന് കാരണമാകാവുന്ന രീതിയിൽ വാഹനമോടിക്കുക, ഇടിച്ച ശേഷം വാഹനം നിർത്താതിരിക്കുക, ഉത്തരവാദിത്തപ്പെട്ട അധികാരികളെ അറിയിക്കാതിരിക്കുക എന്നീ കുറ്റങ്ങളാണ് നടനെതിരെ ചുമത്തിയിരിക്കുന്നത്.
മണിയൻപിള്ള രാജു ഇന്ന് രാവിലെ തിരുവനന്തപുരം മ്യൂസിയം പോലീസ് സ്റ്റേഷനിൽ ഹാജരായി. തുടർന്ന് വൈദ്യപരിശോധന നടത്തി അറസ്റ്റ് രേഖപ്പെടുത്തി. ജാമ്യം ലഭിക്കാവുന്ന കുറ്റങ്ങൾ ചുമത്തി അറസ്റ്റ് രേഖപ്പെടുത്തിയ ശേഷം സ്റ്റേഷനിൽ നിന്ന് ജാമ്യത്തിൽ വിട്ടയച്ചു.
യുവാക്കള് ഓടിച്ചിരുന്ന ബൈക്ക് തന്റെ വാഹനത്തിൽ ഇടിച്ചതായും ഭയന്നാണ് താൻ നിർത്താതിരുന്നതെന്നും അദ്ദേഹം മാധ്യമങ്ങളോട് പറഞ്ഞു. അപകടം നടന്നയുടനെ ആംബുലൻസ് കൊണ്ടുവരാൻ സുഹൃത്തുക്കളോട് പറഞ്ഞിരുന്നതായി നടൻ പറഞ്ഞു. ഇന്നലെ രാത്രി ട്രിവാർഡ്രം ക്ലബ്ബിന് സമീപം നടന്ന അപകടത്തില് ശ്രീകണ്ഠേശ്വരം സ്വദേശികളായ നിദേവ്, സൂരജ് എന്നിവർക്ക് പരിക്കേറ്റു.
