റാഞ്ചിയിൽ നിന്ന് ഡൽഹിയിലേക്ക് പോകുകയായിരുന്ന എയർ ആംബുലൻസ് ഝാർഖണ്ഡിലെ ഛത്ര ജില്ലയിൽ തകർന്നു വീണ് പൈലറ്റ് ഉൾപ്പെടെ വിമാനത്തിലുണ്ടായിരുന്ന ഏഴ് പേരും മരിച്ചു. അന്വേഷണം പുരോഗമിക്കുന്നു.
റാഞ്ചി: റാഞ്ചിയിൽ നിന്ന് ഡൽഹിയിലേക്ക് പറന്നുയർന്ന എയർ ആംബുലൻസ് മണിക്കൂറുകള്ക്കുള്ളില് ഛത്ര ജില്ലയിൽ തകർന്നുവീണ് ഏഴ് പേരും മരിച്ചു. പ്രാഥമിക റിപ്പോർട്ടുകൾ പ്രകാരം ഒരാൾ മാത്രമാണ് മരിച്ചതെന്ന് സൂചനയുണ്ടായിരുന്നെങ്കിലും വിമാനത്തിലുണ്ടായിരുന്ന എല്ലാവരും മരിച്ചതായി അധികൃതർ പിന്നീട് സ്ഥിരീകരിച്ചു.
സിമാരിയയ്ക്ക് സമീപമുണ്ടായ അപകടത്തിൽ എയർ ആംബുലൻസിലുണ്ടായിരുന്ന ഏഴ് പേരും മരിച്ചതായി ചത്ര ഡെപ്യൂട്ടി കമ്മീഷണർ കീർത്തിശ്രീ മാധ്യമങ്ങളോട് പറഞ്ഞു. അപകടസ്ഥലത്ത് നിന്ന് എല്ലാ മൃതദേഹങ്ങളും കണ്ടെടുത്തതായും കൂടുതൽ നിയമനടപടികൾ പുരോഗമിക്കുകയാണെന്നും സബ് ഡിവിഷണൽ പോലീസ് ഓഫീസർ (എസ്ഡിപിഒ) ശുഭം ഖണ്ഡേൽവാൾ പറഞ്ഞു.
എയർ ആംബുലൻസിൽ രണ്ട് പൈലറ്റുമാർ, ഒരു രോഗി, ഒരു മെഡിക്കൽ ടീം അംഗം, ഒരു ഫ്ലൈറ്റ് അറ്റൻഡന്റ് എന്നിവരുണ്ടായിരുന്നു. പൈലറ്റ്-ഇൻ-കമാൻഡായ ക്യാപ്റ്റൻ വിവേക് വികാസ് ഭഗത്, സഹ-പൈലറ്റ് ക്യാപ്റ്റൻ സവ്രാജ്ദീപ് സിംഗ് എന്നിവരും അപകടത്തിൽ മരിച്ചു. രോഗി 41 കാരനായ സഞ്ജയ് കുമാർ ആണെന്ന് എന്ന് തിരിച്ചറിഞ്ഞിട്ടുണ്ട്. അദ്ദേഹത്തോടൊപ്പം ഫ്ലൈറ്റ് അറ്റൻഡന്റ് അർച്ചന ദേവി, ധുരു കുമാർ, ഡോ. വികാസ് കുമാർ ഗുപ്ത, പാരാമെഡിക്കൽ സച്ചിൻ കുമാർ മിശ്ര എന്നിവരും ഉണ്ടായിരുന്നു. എല്ലാവരും സംഭവസ്ഥലത്ത് തന്നെ മരിച്ചു.
65 ശതമാനം പൊള്ളലേറ്റ ഝാർഖണ്ഡിലെ ലതേഹർ ജില്ലയിലെ ചന്ദ്വ സ്വദേശിയായ സഞ്ജയ് കുമാറിനെ ഫെബ്രുവരി 16 ന് ഗുരുതരാവസ്ഥയിൽ റാഞ്ചിയിലെ ഒരു ആശുപത്രിയിൽ പ്രവേശിപ്പിച്ചിരുന്നു. അദ്ദേഹത്തിന്റെ നില ഗുരുതരമാണെന്ന് ആശുപത്രി ചീഫ് പ്ലാസ്റ്റിക് സർജനായ ഡോ. അനന്ത് സിൻഹ പറഞ്ഞതനുസരിച്ചാണ് മെച്ചപ്പെട്ട ചികിത്സയ്ക്കായി അദ്ദേഹത്തെ ഡൽഹിയിലേക്ക് അയക്കാന് കുടുംബം തീരുമാനിച്ചത്. തിങ്കളാഴ്ച വൈകുന്നേരം 4:30 ഓടെ ആശുപത്രിയിൽ നിന്ന് ഡിസ്ചാർജ് ചെയ്ത അദ്ദേഹത്തെ പിന്നീട് എയർ ആംബുലൻസിൽ ഡൽഹിയിലേക്ക് കൊണ്ടുപോയി.
റെഡ്ബേർഡ് എയർവേയ്സ് പ്രൈവറ്റ് ലിമിറ്റഡിന് കീഴിലുള്ള ബീച്ച്ക്രാഫ്റ്റ് സി90 വിമാനം (രജിസ്ട്രേഷൻ നമ്പർ VT-AJV) റാഞ്ചിയിൽ നിന്ന് വൈകുന്നേരം 7:11 ന് പറന്നുയർന്ന് രാത്രി 10 മണിയോടെ ഡൽഹിയിൽ എത്തേണ്ടതായിരുന്നു. ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (DGCA) പ്രകാരം, രാത്രി 7:34 ന് കൊൽക്കത്ത എടിസിയുമായുള്ള ബന്ധവും റഡാർ സിഗ്നലുകളും പെട്ടെന്ന് വിമാനത്തിന് നഷ്ടപ്പെട്ടു. ആ സമയത്ത്, വിമാനം വാരണാസിയിൽ നിന്ന് ഏകദേശം 100 നോട്ടിക്കൽ മൈൽ തെക്കുകിഴക്കായി ആയിരുന്നുവെന്ന് റിപ്പോർട്ടുകൾ പറയുന്നു. താമസിയാതെ, ഝാഖണ്ഡിലെ ഛത്ര ജില്ലയിൽ അത് തകർന്നുവീണതായി റിപ്പോർട്ടുകൾ പുറത്തുവന്നു.
അപകടത്തിന്റെ കൃത്യമായ കാരണം ഇപ്പോഴും വ്യക്തമല്ല. സാഹചര്യത്തിന്റെ ഗൗരവം കണക്കിലെടുത്ത്, എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോയിൽ (എഎഐബി) നിന്നുള്ള ഒരു സംഘത്തെ സംഭവസ്ഥലത്തേക്ക് അയച്ചിട്ടുണ്ട്. സാങ്കേതിക തകരാറോ, കാലാവസ്ഥയോ, മറ്റേതെങ്കിലും കാരണമോ അപകടത്തിന് കാരണമായോ എന്ന് വിദഗ്ധർ കണ്ടെത്താൻ ശ്രമിക്കുന്നു.
