വാഷിംഗ്ടൺ : ന്യൂ മെക്‌സിക്കോയില്‍ കാട്ടുതീ പടര്‍ന്നുപിടിച്ചതിനെത്തുടര്‍ന്ന് ഏകദേശം 300 ഓളം കെട്ടിടങ്ങൾ കത്തി നശിച്ചു. വരും ദിവസങ്ങളിൽ ശക്തമായ കാറ്റ്, വരണ്ട വായു, ചൂട് എന്നിവയാൽ കാട്ടുതീ ശക്തമാകുമെന്ന് അധികൃതർ അറിയിച്ചു.
കാൾഫ് കാന്യോണിലും ഹെർമിറ്റ്സ് പീക്കിലും ഉണ്ടായ തീപിടിത്തത്തിൽ ഇതുവരെ 66,000 ഏക്കർ ഭൂമി കത്തിനശിച്ചുവെന്നും, 37 ശതമാനം മാത്രമേ നിയന്ത്രണ വിധേയമായിട്ടുള്ളൂവെന്നും സംസ്ഥാന അഗ്നിശമനസേനയുടെ ഏറ്റവും പുതിയ അപ്‌ഡേറ്റിൽ പറയുന്നു.
കാറ്റിൽ തീജ്വാലകൾ 5 അടിയിൽ കൂടുതൽ ഉയരത്തിൽ എത്തുമ്പോൾ, അഗ്നിശമന സേനയ്ക്ക് തീ അണയ്ക്കാന്‍ ബുദ്ധിമുട്ടാണ്. അവര്‍ കൂടുതല്‍ പ്രതിരോധത്തിലേക്ക് നീങ്ങണമെന്ന് വക്താവ് മൈക്ക് ജോൺസണ്‍ പറഞ്ഞു. കാൾഫ് കാന്യോണും ഹെർമിറ്റ്സ് കൊടുമുടിയിലും തീ ആളിപ്പടരുകയാണ്.
മറ്റൊരു വലിയ തീ, സംസ്ഥാനത്തിന്റെ വടക്കുപടിഞ്ഞാറൻ ഭാഗത്തുള്ള ജെമെസ് സ്പ്രിംഗ്സ് ഗ്രാമത്തിൽ നിന്ന് 7 മൈൽ കിഴക്കായി ഒരാഴ്ച മുമ്പ് ആരംഭിച്ച സെറോ പെലാഡോ ഫയർ, പോണ്ടറോസ പൈൻ, മിക്സഡ് കോണിഫറസ് മരങ്ങൾ, ബ്രഷ് എന്നിവ കത്തിക്കൊണ്ടിരിക്കുകയാണ്.
തീപിടിത്തത്തിൽ മൂന്ന് വീടുകൾ നഷ്ടപ്പെടുകയും 7,245 ഏക്കർ കത്തിനശിക്കുകയും ചെയ്തതായി സംസ്ഥാന അഗ്നിശമന സേന അറിയിച്ചു.
വ്യാഴാഴ്ച ഉച്ചതിരിഞ്ഞ്, ഫ്രീലോവ് കാന്യോൺ ഏരിയയിലെ വാലെസ് കാൽഡെറ നാഷണൽ പ്രിസർവിന്റെ പടിഞ്ഞാറ് ഭാഗത്ത് ഫ്രീലവ് ഫയർ എന്ന് പേരിട്ടിരിക്കുന്ന ഒരു പുതിയ തീജ്വാല ആരംഭിച്ചു. ഈ ആഴ്ച ആദ്യം, അലാമോയിൽ നിന്ന് നാല് മൈൽ കിഴക്കുള്ള അലാമോ നവാജോ ഇന്ത്യൻ റിസർവേഷനിൽ 10 ഏക്കർ കാട്ടുതീയില്‍ നശിച്ചതായി റിപ്പോർട്ട് ചെയ്യപ്പെട്ടിരുന്നു.
റൂയ്‌ഡോസോയിൽ, ഈ മാസം ആദ്യം 207 വീടുകൾ നശിപ്പിച്ച മക്‌ബ്രൈഡ് തീയിൽ 95 ശതമാനവും നിയന്ത്രണവിധേയമായിരുന്നു. അതേസമയം, നോഗൽ കാന്യോൺ തീ പൂർണമായും കെടുത്തിയതായി പ്രാദേശിക മാധ്യമങ്ങൾ റിപ്പോർട്ട് ചെയ്തു.
കഴിഞ്ഞയാഴ്ച സംസ്ഥാനത്തെ 33 കൗണ്ടികളിൽ കുറഞ്ഞത് 16 എണ്ണത്തിലും 20-ലധികം കാട്ടുതീ നാശം വിതച്ചതായി ഗവർണർ മിഷേൽ ലുജൻ ഗ്രിഷാം ശനിയാഴ്ച പറഞ്ഞു.
വടക്കൻ ന്യൂ മെക്സിക്കോയിൽ തീപിടിത്തത്തിന് സമീപം മണിക്കൂറിൽ 40 മൈലിലധികം വേഗതയിൽ കാറ്റ് വീശുമെന്ന് പ്രതീക്ഷിക്കുന്നതായി ദേശീയ കാലാവസ്ഥാ സേവനം ജെന്നിഫർ ഷൂമാക്ക് പറഞ്ഞു.
സൗത്ത് വെസ്റ്റ് കോർഡിനേഷൻ സെന്ററിന്റെ ഏറ്റവും പുതിയ കണക്കുകൾ പ്രകാരം, ഈ വർഷം ഇതുവരെ സംസ്ഥാനത്തുടനീളം 173,000 ഏക്കറിലധികം കാട്ടുതീയാല്‍ കത്തിനശിച്ചു. കഴിഞ്ഞ എട്ട് വർഷങ്ങളിൽ ഏഴ് വർഷങ്ങളിലെ കണക്കുകളേക്കാൾ കൂടുതലാണിത്.
ഈ മേഖലയിലെ കാട്ടുതീ സീസൺ സാധാരണയായി മെയ് അല്ലെങ്കിൽ ജൂണിൽ ആരംഭിക്കും. എന്നാൽ, ഈ വർഷം അപകടകരമാംവിധം നേരത്തെയാണ്.
