ഇന്ത്യ-പാക് സംഘർഷവുമായി ബന്ധിപ്പിച്ച്, തായ്ലൻഡിനെയും കംബോഡിയയെയും യുദ്ധം നിർത്താൻ ഭീഷണിപ്പെടുത്തി യു എസ് പ്രസിഡന്റ് ഡോണാള്ഡ് ട്രംപ് വീണ്ടും രംഗത്ത്. വ്യാപാരത്തിലൂടെ ഇന്ത്യ – പാക് യുദ്ധം നിർത്താൻ കഴിഞ്ഞത് തനിക്ക് ഒരു ബഹുമതിയാണെന്നാണ് ട്രംപിന്റെ അവകാശവാദം.
വാഷിംഗ്ടണ്: യു എസ് പ്രസിഡന്റ് ഡൊണാൾഡ് ട്രംപ് വീണ്ടും തന്റെ വിവാദ പ്രസ്താവനയിലൂടെ അന്താരാഷ്ട്ര രാഷ്ട്രീയത്തെ ഇളക്കിമറിച്ചു. ഇന്ത്യയും പാക്കിസ്താനും തമ്മിലുള്ള സംഘർഷം താനാണ് പരിഹരിച്ചതെന്ന് ഞായറാഴ്ച അദ്ദേഹം അവകാശപ്പെട്ടു. ഇപ്പോൾ തായ്ലൻഡും കംബോഡിയയും തമ്മിലുള്ള വർദ്ധിച്ചുവരുന്ന സംഘർഷം പരിഹരിക്കാനാണ് അദ്ദേഹത്തിന്റെ ശ്രമം.
ഒരു പൊതുയോഗത്തിൽ സംസാരിക്കവെ, തായ്ലൻഡുമായും കംബോഡിയയുമായും അമേരിക്കയ്ക്ക് വലിയ വ്യാപാര ബന്ധമുണ്ടെന്ന് ട്രംപ് പറഞ്ഞു. ഇരു രാജ്യങ്ങളിലെയും പ്രധാനമന്ത്രിമാരെ വിളിച്ച്, പോരാട്ടം അവസാനിക്കുന്നതുവരെ ഒരു വ്യാപാര കരാറും ഉണ്ടാകില്ലെന്ന് ഞാന് അവരോട് വ്യക്തമായി പറഞ്ഞിട്ടുണ്ടെന്ന് ട്രംപ് പറഞ്ഞു.
ഇന്ത്യയെയും പാക്കിസ്താനെയും പോലെ എനിക്ക് കാര്യങ്ങൾ എളുപ്പമായിരിക്കണമെന്ന് നിര്ബ്ബന്ധമുണ്ടെന്ന് അദ്ദേഹം പറഞ്ഞു. തന്റെ ഒരു ഫോൺ കോളിന് ശേഷം മാത്രമാണ് തായ്ലൻഡും കംബോഡിയയും ചർച്ചകൾക്ക് ആഗ്രഹം പ്രകടിപ്പിച്ചതെന്നും ട്രംപ് അവകാശപ്പെട്ടു.
ഇന്ത്യയും പാക്കിസ്താനും യുദ്ധത്തിന് തയ്യാറെടുത്തിരുന്നുവെന്നും എന്നാൽ ഞാൻ ഇടപെട്ട് സാഹചര്യം കൈകാര്യം ചെയ്തുവെന്നും ട്രംപ് തന്റെ പ്രസ്താവനയിൽ പറഞ്ഞു. വ്യാപാരത്തിലൂടെ യുദ്ധം നിർത്താൻ എനിക്ക് കഴിഞ്ഞെങ്കില് അതെനിക്കൊരു ഒരു ബഹുമതിയാണെന്നും അദ്ദേഹം പറഞ്ഞു.
ഇന്ത്യ-പാക്കിസ്താന് ബന്ധത്തെക്കുറിച്ച് ഡൊണാൾഡ് ട്രംപ് ഇത്തരമൊരു അവകാശവാദം ഉന്നയിക്കുന്നത് ഇതാദ്യമല്ല. തന്റെ പ്രസിഡന്റ് കാലയളവിലും, ദക്ഷിണേഷ്യയിൽ സമാധാനം സ്ഥാപിക്കുന്നതിൽ താൻ ഒരു പങ്കു വഹിച്ചിട്ടുണ്ടെന്ന് അദ്ദേഹം പലതവണ പറഞ്ഞിട്ടുണ്ട്. എന്നാല്, അദ്ദേഹത്തിന്റെ ഈ പ്രസ്താവനകളെ ഇന്ത്യ ഒരിക്കലും അംഗീകരിച്ചിട്ടില്ല.
ട്രംപിന്റെ ഈ പുതിയ വാദം അദ്ദേഹത്തിന്റെ നയതന്ത്ര ശൈലിയെക്കുറിച്ചുള്ള ചർച്ചയ്ക്ക് വീണ്ടും തുടക്കമിട്ടിരിക്കുകയാണ്. നയതന്ത്രത്തിലൂടെ കാര്യങ്ങള് നടപ്പിലാക്കുന്നതിനു പകരം വ്യാപാരത്തെ നയതന്ത്ര സമ്മർദ്ദമായി ഉപയോഗിക്കുന്നതിനെ അദ്ദേഹം അനുകൂലിക്കുകയും അതിനെ ‘സമാധാനത്തിനുള്ള ആയുധമായി’ കണക്കാക്കുകയും ചെയ്യുന്നത് വ്യാപക വിമര്ശനങ്ങള്ക്ക് കാരണമായിട്ടുണ്ട്.
അതിർത്തി തർക്കങ്ങളെ തുടർന്ന് തായ്ലൻഡും കംബോഡിയയും തമ്മിലുള്ള സംഘർഷം സമീപ മാസങ്ങളിൽ വർദ്ധിച്ചു. ഇരു രാജ്യങ്ങളും ഔദ്യോഗികമായി യുദ്ധം പ്രഖ്യാപിച്ചിട്ടില്ലെങ്കിലും, സംഘർഷാവസ്ഥയ്ക്കിടയിൽ ട്രംപിന്റെ ‘വ്യാപാര നയതന്ത്ര’ത്തെക്കുറിച്ച് ചോദ്യങ്ങൾ ഉയർന്നുവരുന്നുണ്ട്.
