തിരുവനന്തപുരം: ഒളിമ്പിക്സിന്റെ മാതൃകയിൽ നടക്കുന്ന സംസ്ഥാന സ്കൂൾ കായികമേള, അത്ലറ്റിക്സും ഗെയിംസ് മത്സരങ്ങളും ഉൾക്കൊള്ളുന്ന ഒരു ഹൈടെക് ഇവന്റാക്കി മാറ്റുന്നതിന് ആവശ്യമായ എല്ലാ സൗകര്യങ്ങളും പൊതുവിദ്യാഭ്യാസ വകുപ്പിന്റെ കേരള ഇൻഫ്രാസ്ട്രക്ചർ ആൻഡ് ടെക്നോളജി ഫോർ എഡ്യൂക്കേഷൻ (KITE) ഒരുക്കിയിട്ടുണ്ട്.
ഉപജില്ലാ തലം മുതൽ സംസ്ഥാന തലം വരെയുള്ള 742 ഇനങ്ങളിലെ (പുതുതായി ചേർത്ത കളരിപ്പയറ്റ് മത്സരം ഉൾപ്പെടെ) മത്സരങ്ങളുടെ നടത്തിപ്പിന്റെ പൂർണ്ണ വിവരങ്ങൾ KITE തയ്യാറാക്കിയിട്ടുണ്ട്. www.sports.kite.kerala.gov.in എന്ന പോർട്ടലിലൂടെ ഇത് ലഭ്യമാണ്.
12 വേദികളിലായി നടക്കുന്ന കായികമേളയുടെ എല്ലാ മത്സര വേദികളുടെയും തത്സമയ ഫലങ്ങൾ, മത്സര പുരോഗതി, മീറ്റ് റെക്കോർഡുകൾ, സർട്ടിഫിക്കറ്റുകൾ എന്നിവ ഈ പോർട്ടലിലൂടെ ലഭ്യമാകും. വിജയികളുടെ ചിത്രങ്ങളുള്ള ഫലങ്ങൾ ജില്ലാ, സ്കൂൾ തലങ്ങളിലെ പോർട്ടലിൽ ലഭ്യമാകും. ഉപജില്ലാ തലം മുതൽ ദേശീയ തലം വരെയുള്ള ഓരോ കുട്ടിയുടെയും എല്ലാ പ്രകടന വിവരങ്ങളും കൃത്യമായി ട്രാക്ക് ചെയ്യുന്നതിന് SSUID (സ്കൂൾ സ്പോർട്സ് യുണീക്ക് ഐഡന്റിഫിക്കേഷൻ നമ്പർ) നിലവിലുണ്ട്.
എല്ലാ ദിവസവും രാവിലെ 6:30 ന് മത്സരങ്ങൾ ആരംഭിക്കുന്നത് മുതൽ മത്സരങ്ങൾ അവസാനിക്കുന്ന രാത്രി എട്ടു മണിവരെ പ്രധാനപ്പെട്ട അഞ്ച് വേദികളിൽ നിന്ന് കൈറ്റ് വിക്ടേഴ്സ് തത്സമയ സംപ്രേഷണം നടത്തും. ചന്ദ്രശേഖരൻ നായർ സ്റ്റേഡിയത്തിലാണ് സ്റ്റുഡിയോ ഫ്ലോർ സജ്ജീകരിക്കുന്നത്. ഇതിന് പുറമെ സെൻട്രൽ സ്റ്റേഡിയം, യൂണിവേഴ്സിറ്റി സ്റ്റേഡിയം, പിരപ്പൻകോട് അക്വാട്ടിക് കോംപ്ലക്സ്, ജി.വി. രാജ സ്പോർട്സ് സ്കൂൾ എന്നീ കേന്ദ്രങ്ങളിൽ നിന്നും വിപുലമായ ലൈവ് കവറേജുണ്ടാകും. മറ്റു വേദികളിൽ നിന്നുള്ളവ ഡിഫേർഡ് ലൈവ് ആയും സംപ്രേഷണം ചെയ്യും.മത്സര വിവരങ്ങളും, പോയിന്റ് നിലകളും, വിജയികളെക്കുറിച്ചുള്ള വിവരങ്ങളും, അഭിമുഖങ്ങളും, ഫൈനലുകളുടെ സ്ലോമോഷൻ റിവ്യൂകളും കൈറ്റ് വിക്ടേഴ്സിലൂടെ സംപ്രേഷണം ചെയ്യും.
KITE VICTERS ആപ്പിലും, victers.kite.kerala.gov.in ലും പരിപാടി തത്സമയം കാണാം. കൈറ്റിന്റെ itsvicters യൂട്യൂബ് ചാനൽ, ഇ-വിദ്യ കേരളം ചാനൽ എന്നിവയിൽ പരിപാടി തത്സമയം കാണാം. ലിറ്റിൽ കൈറ്റ്സ്, സ്കൂൾ വിക്കി എന്നിവയിലെ അംഗങ്ങൾ ഉൾപ്പെടെ 100-ലധികം പേരുടെ ഒരു ടീം സ്പോർട്സ് ഫെസ്റ്റിവലിന്റെ ഭാഗമാകുമെന്ന് കൈറ്റ് സിഇഒ കെ. അൻവർ സാദത്ത് പറഞ്ഞു.
പിആര്ഡി, കേരള സര്ക്കാര്
