ഒരു മാറ്റം സംഭവിക്കുന്നത് വരെ എണ്ണ വരുമാനം താൻ നിയന്ത്രിക്കുമെന്നും വെനിസ്വേലയെ നയിക്കുമെന്നും യുഎസ് പ്രസിഡന്റ് ഡോണാള്ഡ് ട്രംപ് പറയുന്നു. ഇത് സ്റ്റേറ്റ് സെക്രട്ടറി മാർക്കോ റൂബിയോയുടെ സമീപകാല പ്രസ്താവനയ്ക്ക് വിരുദ്ധമാണ്.
വാഷിംഗ്ടണ്: വളരെ പ്രകോപനപരമായ നീക്കത്തിൽ, യുഎസ് പ്രസിഡന്റ് ഡൊണാൾഡ് ട്രംപ് തന്റെ സോഷ്യൽ മീഡിയ സൈറ്റായ ട്രൂത്ത് സോഷ്യലില് “വെനിസ്വേലയുടെ ആക്ടിംഗ് പ്രസിഡന്റ്” എന്ന പദവിയിൽ സ്വന്തം ഫോട്ടോ പോസ്റ്റ് ചെയ്തു.
വെനിസ്വേലയുടെ ദൈനംദിന ഭരണം ഏറ്റെടുക്കാൻ അമേരിക്കയ്ക്ക് ഉദ്ദേശ്യമില്ലെന്നും പിടിക്കപ്പെട്ട നേതാവ് നിക്കോളാസ് മഡുറോയുടെ കീഴുദ്യോഗസ്ഥരെ നേതൃസ്ഥാനങ്ങളിൽ തുടരാൻ അനുവദിക്കുമെന്നുമുള്ള സ്റ്റേറ്റ് സെക്രട്ടറി മാർക്കോ റൂബിയോയുടെ പ്രസ്താവനയ്ക്ക് നേർവിപരീതമാണ് ട്രംപിന്റെ ഈ നടപടി.
ട്രൂത്ത് സോഷ്യൽ ചാനലിലെ ഞായറാഴ്ച (ഡിസംബർ 11) പോസ്റ്റിൽ ട്രംപിന്റെ ഔദ്യോഗിക ഛായാചിത്രവും “വെനിസ്വേലയുടെ ആക്ടിംഗ് പ്രസിഡന്റ്, “2026 ജനുവരിയിൽ അധികാരമേറ്റയാൾ” എന്ന പദവിയും ഉൾപ്പെടുത്തിയിട്ടുണ്ട്. 2025 ജനുവരി 20 ന് അധികാരമേറ്റ അമേരിക്കയുടെ 45-ാമത്തെയും 47-ാമത്തെയും പ്രസിഡന്റ് എന്ന പദവിയും ഇതിൽ ഉൾപ്പെടുത്തിയിട്ടുണ്ട്.
ഈ മാസം ആദ്യം, വെനിസ്വേലയ്ക്കെതിരെ അമേരിക്ക ആക്രമണം നടത്തി പ്രസിഡന്റ് നിക്കോളാസ് മഡുറോയെയും ഭാര്യ സിലിയ ഫ്ലോറന്സിനെയും പിടികൂടി ന്യൂയോര്ക്കിലേക്ക് കൊണ്ടുപോയി, അവിടെ നാർക്കോ-ടെററിസം ഗൂഢാലോചന കുറ്റം ചുമത്തി കുറ്റം ചുമത്തി ജയിലിലടച്ചിരുന്നു.
സുരക്ഷിതവും, ഉചിതവും, നീതിയുക്തവുമായ ഒരു മാറ്റം സാധ്യമാകുന്നതുവരെ അമേരിക്ക വെനിസ്വേലയെ “ഭരിക്കുമെന്ന്” കഴിഞ്ഞ ഞായറാഴ്ച ട്രംപ് പ്രഖ്യാപിച്ചിരുന്നു. വെനിസ്വേലക്കാരുടെ താൽപ്പര്യങ്ങൾ മനസ്സിൽ വയ്ക്കാത്ത മറ്റൊരാൾക്ക് വെനിസ്വേല ഏറ്റെടുക്കാൻ കഴിയില്ല എന്നും അദ്ദേഹം പറഞ്ഞിരുന്നു. വെനിസ്വേലയുടെ വൈസ് പ്രസിഡന്റും എണ്ണ മന്ത്രിയുമായ ഡെൽസി റോഡ്രിഗസ് കഴിഞ്ഞ ആഴ്ച രാജ്യത്തിന്റെ ഇടക്കാല പ്രസിഡന്റായി ഔദ്യോഗികമായി സത്യപ്രതിജ്ഞ ചെയ്തു.
വെനിസ്വേലയിലെ ഇടക്കാല അധികാരികൾ 30 മുതൽ 50 ദശലക്ഷം ബാരൽ വരെ “ഉയർന്ന നിലവാരമുള്ള, അംഗീകൃത എണ്ണ” യുഎസിന് കൈമാറുമെന്നും അത് അവരുടെ വിപണി വിലയ്ക്ക് വിൽക്കുമെന്നും ട്രംപ് പറഞ്ഞിരുന്നു.
“ആ പണം അമേരിക്കൻ ഐക്യനാടുകളുടെ പ്രസിഡന്റ് എന്ന നിലയിൽ ഞാൻ നിയന്ത്രിക്കും, അത് വെനിസ്വേലയിലെയും അമേരിക്കയിലെയും ജനങ്ങൾക്ക് പ്രയോജനപ്പെടുന്നതിനായി ഉപയോഗിക്കുന്നുവെന്ന് ഉറപ്പാക്കും! ഈ പദ്ധതി ഉടൻ നടപ്പിലാക്കാൻ ഞാൻ ഊർജ്ജ സെക്രട്ടറി ക്രിസ് റൈറ്റിനോട് ആവശ്യപ്പെട്ടിട്ടുണ്ട്. ഇത് സംഭരണ കപ്പലുകൾ വഴി കൊണ്ടുപോയി നേരിട്ട് യുണൈറ്റഡ് സ്റ്റേറ്റ്സിലെ അൺലോഡിംഗ് ഡോക്കുകളിലേക്ക് കൊണ്ടുവരും,” ട്രംപ് പറഞ്ഞു.
