ടെൽ അവീവ്: ഫലസ്തീൻ ആക്രമിച്ച് ഒഴിപ്പിക്കാൻ ഇസ്രയേൽ നടത്തുന്ന തന്ത്രം വിജയിച്ചില്ല. എന്നാല്‍, ഹമാസുമായുള്ള യുദ്ധത്തിൽ വെടിനിർത്തൽ നിരസിക്കുകയും ചെയ്തു. ഗാസയിൽ നിന്നുള്ള എല്ലാ വഴികളും അടച്ചിരിക്കുകയാണ്. ഐക്യരാഷ്ട്ര സഭയും വിവിധ രാജ്യങ്ങളും വെടിനിർത്തൽ ആവശ്യപ്പെടുന്നുണ്ട്. മാനുഷിക സഹായം ഗാസ മുനമ്പിൽ എത്തിക്കുന്നതിനാണിത്.
നിരവധി ദിവസത്തെ തർക്കങ്ങൾക്കും ബൈഡന്റെ ഇസ്രായേൽ സന്ദർശനത്തിനും ശേഷമാണ് റഫാ ക്രോസിംഗ് തുറന്നത്. ഈ അതിർത്തി കടക്കുന്നതിലൂടെ, വിദേശ പൗരന്മാർക്കും ഗാസയിൽ നിന്ന് ഈജിപ്തിലേക്ക് പോകാം. നിലവിൽ 200 ട്രക്കുകൾക്ക് മാത്രമേ ഇതുവഴിയുള്ള യാത്രാനുമതിയുള്ളൂ.
ദുരിതാശ്വാസ സാമഗ്രികൾ നിറച്ച നിരവധി ട്രക്കുകൾ ഗാസയിൽ എത്തിത്തുടങ്ങിയിട്ടുണ്ട്. ഇസ്രായേൽ സൈന്യം ഇവിടെ ബോംബിടുകയാണ്. ഇതുമൂലം ഗാസയിലേക്ക് ദുരിതാശ്വാസ സാമഗ്രികൾ എത്തുന്നില്ല. ഗാസ മുനമ്പിൽ നിന്ന് അകത്തേക്കും പുറത്തേക്കും ഒരേയൊരു വഴി മാത്രമേയുള്ളൂ, അതാണ് ക്രോസിംഗ്. ഈ ക്രോസിംഗില്‍ ഇസ്രായേലിന് നിയന്ത്രണമില്ല.
അതിനിടെ, ഇരുവിഭാഗങ്ങൾക്കുമിടയിൽ വെടിനിർത്തൽ കരാർ സ്ഥാപിക്കാൻ ഈജിപ്ത് പ്രസിഡന്റ് അബ്ദുൽ ഫത്താഹ് അൽ സിസിയുടെ നേതൃത്വത്തിൽ സമ്മേളനം നടക്കുകയാണ്. ഖത്തർ, യുഎഇ, ഇറ്റലി, സ്പെയിൻ, ഗ്രീസ്, കാനഡ, യൂറോപ്യൻ കൗൺസിൽ തുടങ്ങി പത്തിലധികം രാജ്യങ്ങളുടെ പ്രതിനിധികൾ ഇതിൽ പങ്കെടുക്കുന്നുണ്ട്. എന്ത് വെല്ലുവിളി വന്നാലും ഞങ്ങൾ ഞങ്ങളുടെ ഭൂമി വിട്ട് മറ്റൊരിടത്തും പോകില്ലെന്ന് ഉച്ചകോടിയിൽ പലസ്തീൻ പ്രസിഡന്റ് മഹ്മൂദ് അബ്ബാസ് പറഞ്ഞു.
സ്‌കൂളുകൾക്കും ആശുപത്രികൾക്കും സ്‌ത്രീകൾക്കും കുട്ടികൾക്കും നേരെ ഇസ്രയേൽ ബോംബാക്രമണം നടത്തിയെന്നും അദ്ദേഹം പറഞ്ഞു. ആരാധനാലയങ്ങളും പള്ളികളും അവര്‍ ബോംബിട്ട് തകര്‍ത്തു.. യാതൊരു വിട്ടുവീഴ്ചയുമില്ലാതെ എല്ലാത്തരം മനുഷ്യ നിയമങ്ങളും അവർ ലംഘിച്ചുകൊണ്ടിരിക്കുന്നു. ഫലസ്തീനികളുടെ കൊലപാതകത്തില്‍ പാശ്ചാത്യ രാജ്യങ്ങൾ മൗനം പാലിക്കുന്നതിനെ ജോർദാൻ രാജാവ് അബ്ദുള്ള രണ്ടാമൻ നേരത്തെ രൂക്ഷമായി അപലപിച്ചിരുന്നു.
ഫലസ്തീനികളെ ഭവനരഹിതരാക്കുന്നത് അറബ് ലോകത്തെ മുഴുവൻ ആശങ്കപ്പെടുത്തുന്ന കാര്യമാണെന്നും അദ്ദേഹം പറഞ്ഞു.
അതിനിടെ, ഗാസയിലെ ജനങ്ങളെ സഹായിക്കാൻ ഈജിപ്തിലെ റഫ ക്രോസിംഗ് ഇനി തുറന്നിരിക്കുമെന്ന് ഈജിപ്ഷ്യൻ പ്രസിഡന്റ് അബ്ദുൽ ഫത്താഹ് അൽ സിസി പ്രഖ്യാപിച്ചു. ഈജിപ്തിനും ഗാസയ്ക്കും ഇടയിലുള്ള റഫ ക്രോസിംഗ് വഴി ഫലസ്തീനികൾക്കുള്ള അവശ്യ സാധനങ്ങൾ എത്തിക്കുന്നതിനുള്ള നടപടികൾ ആരംഭിച്ചു. ഇതുവരെ 20 ട്രക്കുകൾ അവശ്യവസ്തുക്കളുമായി ഗാസയിലെത്തിയിട്ടുണ്ട്.
മറുവശത്ത്, ഈജിപ്ത്, ജോർദാൻ, മൊറോക്കോ എന്നിവയുൾപ്പെടെയുള്ള മുസ്ലീം രാജ്യങ്ങളിലുള്ള തങ്ങളുടെ പൗരന്മാരോട് എത്രയും വേഗം രാജ്യം വിടാൻ ഇസ്രായേൽ ആവശ്യപ്പെട്ടു. ഈ രാജ്യങ്ങളിലേക്ക് പോകരുതെന്ന് ഇസ്രായേലികളോടും നിർദേശിച്ചിട്ടുണ്ട്. യുദ്ധം കാരണം ഈ രാജ്യങ്ങളിലെ രോഷാകുലരായ ജനങ്ങള്‍ ഇസ്രായേലികളെ ലക്ഷ്യമിട്ടേക്കുമെന്ന് ഇസ്രായേലിന്റെ ദേശീയ സുരക്ഷാ ഏജൻസി ആശങ്ക പ്രകടിപ്പിച്ചു.
