തിരുവനന്തപുരം: സംസ്ഥാന ഭാഗ്യക്കുറി വകുപ്പിന്റെ 2023-24 ക്രിസ്മസ്-പുതുവത്സര ബമ്പർ ലോട്ടറിയുടെ 20 കോടി രൂപയുടെ ഒന്നാം സമ്മാനം XC 224091എന്ന ടിക്കറ്റ് നേടി.
വിജയി ഇതുവരെ വകുപ്പിൽ റിപ്പോർട്ട് ചെയ്തിട്ടില്ലെന്ന് ലോട്ടറി വകുപ്പ് അധികൃതർ പറഞ്ഞു. സമ്മാനാർഹമായ ടിക്കറ്റ് പാലക്കാട്ടുള്ള ലോട്ടറി ഏജന്റിൽ നിന്ന് വാങ്ങിയ തിരുവനന്തപുരത്തെ സബ് ഏജന്റാണ് വിറ്റത്.
രണ്ടാം സമ്മാനമായ ഒരു കോടി രൂപ വീതം, വിവിധ സീരീസ് ടിക്കറ്റുകളിൽ 20 വിജയികൾക്ക് ലഭിച്ചു. ബുധനാഴ്ച ഉച്ചയ്ക്ക് ധനമന്ത്രി കെ എൻ ബാലഗോപാൽ നറുക്കെടുപ്പ് ഉദ്ഘാടനം ചെയ്തു.
ഈ വർഷം ക്രിസ്മസ്-ന്യൂ ഇയർ ബമ്പറിന് കീഴിലുള്ള മൊത്തം സമ്മാനങ്ങളുടെ എണ്ണം 3,88,840 ൽ നിന്ന് 6,91,300 ആയി സർക്കാർ വർധിപ്പിച്ചിരുന്നു. ഒന്നാം സമ്മാനം കഴിഞ്ഞ വർഷം 16 കോടി രൂപയായിരുന്നത് ഇത്തവണ 20 കോടി രൂപയായി വർധിപ്പിച്ചതായും അദ്ദേഹം പറഞ്ഞു.
10 കോടി രൂപയുടെ ഒന്നാം സമ്മാനം ലഭിക്കുന്ന സമ്മർ ബമ്പർ ലോട്ടറിയും ബാലഗോപാൽ ഉദ്ഘാടനം ചെയ്തു. 50 ലക്ഷം രൂപയാണ് ലോട്ടറിയുടെ രണ്ടാം സമ്മാനം. ആന്റണി രാജു എംഎൽഎ അധ്യക്ഷനായി. നടി സോന നായർ, ലോട്ടറി വകുപ്പ് ഉദ്യോഗസ്ഥർ എന്നിവർ പങ്കെടുത്തു
