റിയാദ്: 2018 മുതൽ തടങ്കലിൽ വച്ചിരിക്കുന്ന സമ്പൂർണ വൈകല്യം ബാധിച്ച സൗദിയിലെ പ്രമുഖ പണ്ഡിതൻ സഫർ ബിൻ അബ്ദുൽറഹ്മാൻ അൽ ഹവാലിയെ ഏകാന്ത തടവിന് വിധേയനാക്കിയതായി മെയ് 15 ബുധനാഴ്ച യുഎൻ വികലാംഗ അവകാശ വിദഗ്ധരുടെ ഒരു സംഘം പൊതു റിപ്പോർട്ടിൽ വെളിപ്പെടുത്തി.
“രാജ്യത്തിൻ്റെ യഥാർത്ഥ ഭരണാധികാരിയായ കിരീടാവകാശിയെ സമാധാനപരമായി വിമർശിച്ചതിനുള്ള ശിക്ഷയായി” 2018 മുതൽ തൻ്റെ അമ്മാവനെ അറസ്റ്റ് ചെയ്തതായി അൽ-ഹവാലിയുടെ അനന്തരവൻ നൽകിയ പരാതി അവലോകനം ചെയ്തതിന് ശേഷമാണ് വിദഗ്ധ സമിതിയുടെ പ്രസ്താവന.
“കഴിഞ്ഞ ആറ് വർഷമായി, നിർബന്ധിത തിരോധാനം, ഏകപക്ഷീയമായ തടങ്കൽ എന്നിവ ഉൾപ്പെടെ നിരവധി മനുഷ്യാവകാശ ലംഘനങ്ങൾ അൽ-ഹവാലി അനുഭവിച്ചിട്ടുണ്ട്. നടപടിക്രമങ്ങൾ നിഷേധിക്കൽ, അനാരോഗ്യം, പീഡനം അല്ലെങ്കിൽ മനുഷ്യത്വരഹിതമായ പെരുമാറ്റം എന്നിവ അതില്‍ ഉള്‍പ്പെടുന്നു,” വികലാംഗരുടെ അവകാശങ്ങൾക്കായുള്ള ഐക്യരാഷ്ട്ര സമിതി (CRPD) അംഗമായ മാർക്കസ് ഷാഫർ പ്രസ്താവനയില്‍ പറഞ്ഞു.
പക്ഷാഘാതത്തിൻ്റെ ഫലമായി അല്‍-ഹവാലി സ്ഥിരമായ വൈകല്യങ്ങൾ അനുഭവിക്കുകയാണ്. അത് അദ്ദേഹത്തിൻ്റെ ആശയവിനിമയം, ചലനശേഷി, സ്വയം പരിചരണ ശേഷി എന്നിവയെ ബാധിച്ചിട്ടുണ്ടെന്ന് കമ്മിറ്റി പറഞ്ഞു.
അദ്ദേഹത്തിന് സംസാരിക്കാനോ മനസ്സിലാക്കാനോ സ്വതന്ത്രമായി നീങ്ങാനോ കഴിയുന്നില്ല, അദ്ദേഹത്തിന്റെ പെൽവിക് ഒടിവിനും വൃക്ക തകരാറിനും പതിവ് മെഡിക്കല്‍ സഹായം ആവശ്യമാണെന്നും പ്രസ്താവനയില്‍ വിശദീകരിച്ചു.
അൽ-ഹവാലിയുടെ കേസ് ഉടൻ പുനഃപരിശോധിച്ച് നീതിയുക്തമായ വിചാരണ ഉറപ്പാക്കുന്നതിനോ അദ്ദേഹത്തെ മോചിപ്പിക്കുന്നതിനോ കമ്മിറ്റി സൗദി അറേബ്യയോട് ആവശ്യപ്പെട്ടു. സർക്കാർ സ്ഥാപനങ്ങളെ വിമർശിക്കുന്നതിന് പൗരന്റെ സ്വാതന്ത്ര്യം സംരക്ഷിക്കേണ്ടതിൻ്റെ പ്രാധാന്യം ഊന്നിപ്പറഞ്ഞുകൊണ്ട് അൽ-ഹവാലിക്കും അദ്ദേഹത്തിൻ്റെ ബന്ധുക്കൾക്കും എതിരായ പ്രതികാര നടപടികൾ അവസാനിപ്പിക്കാനും ഭരണകൂടത്തോട് ആവശ്യപ്പെട്ടു.
സൗദി അറേബ്യയിലെ അൽ-ബാഹയിൽ ജനിച്ച അൽ-ഹവാലി മദീനയിലെ ഇസ്ലാമിക് യൂണിവേഴ്സിറ്റിയിൽ നിന്ന് ഇസ്ലാമിക് നിയമത്തിൽ ബിരുദവും ബിരുദാനന്തര ബിരുദവും പിഎച്ച്.ഡിയും നേടിയിട്ടുണ്ട്. ഉമ്മുൽ ഖുറ യൂണിവേഴ്സിറ്റിയിൽ നിന്ന് ഇസ്ലാമിക ദൈവശാസ്ത്രത്തിലും ബിരുദം കരസ്ഥമാക്കിയിട്ടുണ്ട്.
രണ്ടാം ഗൾഫ് യുദ്ധകാലത്ത് സൗദി അറേബ്യയും യുഎസും തമ്മിലുള്ള അടുത്ത ബന്ധത്തെ വിമർശിച്ചതിനാണ് 1990 കളുടെ തുടക്കത്തിൽ അൽ-ഹവാലി ജയിലിലായത്.
1994-ൽ വീണ്ടും അറസ്റ്റിലാവുകയും അഞ്ച് വർഷം തടവ് അനുഭവിക്കുകയും ചെയ്തു. മുസ്ലീങ്ങളെയും പാശ്ചാത്യ നാഗരികതയെയും കുറിച്ച് 3,000 പേജുള്ള ഒരു പുസ്തകം പ്രസിദ്ധീകരിച്ചതിന് ശേഷമാണ് 2018 ൽ അദ്ദേഹത്തെയും മക്കളെയും സഹോദരനെയും അധികൃതർ അറസ്റ്റ് ചെയ്തത്.
Saudi Arabia: Solitary confinement of prominent scholar w/ disability amounts to full-fledged rights violations, says UN Committee on the Rights of Persons with #Disabilities, urging 🇸🇦 to review his case in accordance w/ int'l standards or to release himhttps://t.co/P0yOU1rFoz pic.twitter.com/ZZHJuJCaYN
— United Nations Geneva (@UNGeneva) May 16, 2024
