തുർക്കിയേ എയർലൈൻസിൽ നിന്ന് ഡംപ് ലീസായി എടുത്ത രണ്ട് വൈഡ്-ബോഡി ബോയിംഗ് 777 വിമാനങ്ങളുടെ പാട്ട കാലയളവിൽ ഇൻഡിഗോ എയർലൈൻസിന് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) മൂന്ന് മാസത്തെ താൽക്കാലിക ഇളവ് അനുവദിച്ചു. നേരത്തെ ഈ ഡംപ് ലീസ് 2025 മെയ് 31 ന് അവസാനിക്കേണ്ടതായിരുന്നു. എന്നാൽ അത് 2025 ഓഗസ്റ്റ് 31 വരെ നീട്ടി.
ആറു മാസത്തേക്ക് കൂടി കരാർ നീട്ടാൻ അനുമതി തേടി ഇൻഡിഗോ ഡിജിസിഎയ്ക്ക് കത്തെഴുതിയിരുന്നു. എന്നാൽ, ഡിജിസിഎ റെഗുലേറ്റർ അത് നിരസിച്ചു. എന്നാല്, യാത്രക്കാരുടെ സൗകര്യവും വിമാനങ്ങളുടെ തുടർച്ചയും കണക്കിലെടുത്ത് സർക്കാർ മൂന്ന് മാസത്തെ സമയം അനുവദിച്ചു. ഈ കാലയളവിൽ, ഇൻഡിഗോ അന്താരാഷ്ട്ര വിമാന സർവീസുകൾക്ക് ബദൽ ക്രമീകരണങ്ങൾ ചെയ്യേണ്ടിവരും. ഓഗസ്റ്റ് 31 ന് ശേഷം ഡംപ് ലീസ് അവസാനിപ്പിക്കുമെന്നും കൂടുതൽ കാലാവധി നീട്ടാൻ ശ്രമിക്കില്ലെന്നും കമ്പനി രേഖാമൂലം ഉറപ്പ് നൽകിയിട്ടുണ്ട്.
ഇൻഡിഗോ നിലവിൽ തുർക്കിയേ എയർലൈൻസിന്റെ രണ്ട് ബോയിംഗ് 777 വിമാനങ്ങൾ ഡംപ് ലീസിൽ ഉപയോഗിക്കുന്നുണ്ടെന്ന് ഒരു മുതിർന്ന വ്യോമയാന ഉദ്യോഗസ്ഥൻ പറഞ്ഞു. ഈ വിമാനങ്ങൾ വഴി കമ്പനി ഡൽഹിയിൽ നിന്നും മുംബൈയിൽ നിന്നും ഇസ്താംബൂളിലേക്ക് നേരിട്ടുള്ള വിമാന സർവീസുകൾ നടത്തുന്നു.
തുർക്കിയേ എയർലൈൻസുമായുള്ള ഇൻഡിഗോയുടെ കോഡ്-ഷെയർ കരാർ 2018 മുതൽ നിലവിലുണ്ട്. അതേസമയം, തുർക്കിയുടെ ഗ്രൗണ്ട് ഹാൻഡ്ലിംഗ് കമ്പനിയായ ‘സെലെബി’യുടെ സുരക്ഷാ അനുമതി ഇന്ത്യൻ സർക്കാർ അടുത്തിടെ റദ്ദാക്കി, ഇന്ത്യയിലെ ഒമ്പത് പ്രധാന വിമാനത്താവളങ്ങളിൽ നിന്ന് അവരെ വിലക്കി. ഡമ്പ് ലീസ് നീട്ടാനുള്ള അപേക്ഷ നിരസിക്കപ്പെടാൻ ഈ സംഭവത്തിന്റെ ആഘാതവും ഒരു കാരണമാണെന്ന് വിശ്വസിക്കപ്പെടുന്നു.
