കാഠ്മണ്ഡു: നേപ്പാള് മുൻ പ്രധാനമന്ത്രി ജലനാഥ് ഖനാലിന്റെ ഭാര്യ രാജ്യലക്ഷ്മി ചിത്രകർ ചൊവ്വാഴ്ച നേപ്പാളിലെ ദല്ലുവിൽ പ്രതിഷേധക്കാർ വീടിന് തീയിട്ടതിനെ തുടർന്ന് പൊള്ളലേറ്റ് മരിച്ചു. ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചെങ്കിലും ചികിത്സയ്ക്കിടെ മരിച്ചു.
കാഠ്മണ്ഡുവിലെ ആഡംബര പ്രദേശമായ ദാലുവിലാണ് സംഭവം നടന്നതെന്ന് പ്രാദേശിക മാധ്യമങ്ങള് റിപ്പോർട്ട് ചെയ്തു. സർക്കാരിനെതിരായ പ്രതിഷേധത്തിനിടെ പ്രതിഷേധക്കാർ രാജ്യലക്ഷ്മിയെ വീട്ടിൽ കുടുക്കി തീകൊളുത്തുകയായിരുന്നു. ഗുരുതരമായി പൊള്ളലേറ്റ അവരെ കീർത്തിപൂർ ബേൺ ആശുപത്രിയിൽ പ്രവേശിപ്പിച്ചെങ്കിലും അവിടെ വച്ച് മരണപ്പെട്ടു.
രാജ്യലക്ഷ്മിയുടെ ശ്വാസകോശം ഉൾപ്പെടെ ശരീരത്തിന്റെ പല ഭാഗങ്ങളും ഗുരുതരമായി പൊള്ളലേറ്റതായി റിപ്പോർട്ടിൽ പറയുന്നു. അഴിമതി, തൊഴിലില്ലായ്മ, ഫേസ്ബുക്ക്, എക്സ് എന്നിവയുൾപ്പെടെയുള്ള സോഷ്യൽ മീഡിയ പ്ലാറ്റ്ഫോമുകൾ നിരോധിച്ച സർക്കാർ നടപടി എന്നിവയ്ക്കെതിരെ നേപ്പാളിൽ തിങ്കളാഴ്ച മുതൽ ജനറൽ ഇസഡ് ജനത അക്രമാസക്തമായ പ്രതിഷേധങ്ങൾ നടത്തിവരികയാണ്. വർദ്ധിച്ചുവരുന്ന സംഘർഷങ്ങൾക്കിടയിൽ, പ്രധാനമന്ത്രി കെ പി ഒലിയും ചൊവ്വാഴ്ച രാജിവച്ചു.
കാഠ്മണ്ഡുവിലെ പാർലമെന്റ് മന്ദിരത്തിനും പ്രതിഷേധക്കാർ തീയിട്ടു, അതിന്റെ വീഡിയോയും വൈറലായി. ധനമന്ത്രി ബിഷ്ണു പൗഡലിനെ പ്രതിഷേധക്കാർ മർദ്ദിച്ചതായും റിപ്പോർട്ടുകൾ ഉണ്ടായിരുന്നു. സമാധാനപരമായി സ്ഥിതിഗതികൾ പരിഹരിക്കുന്നതിനും കൂടുതൽ സംഘർഷം തടയുന്നതിനും ചർച്ചകൾ നടത്തണമെന്ന് രാഷ്ട്രത്തലവൻ, പ്രസിഡന്റ് രാം ചന്ദ്ര പൗഡൽ പ്രതിഷേധക്കാരോട് പരസ്യമായി അഭ്യർത്ഥിച്ചു.
തിങ്കളാഴ്ച രാത്രി നിയന്ത്രണങ്ങൾ നീക്കിയിട്ടും പ്രതിഷേധങ്ങൾ തുടർന്നു, പ്രകടനക്കാർ കെട്ടിടങ്ങൾക്ക് തീയിടുകയും കാഠ്മണ്ഡു വിമാനത്താവളം അടച്ചിടാൻ നിർബന്ധിക്കുകയും ചെയ്തു. നേപ്പാളിലെ ഇന്ത്യൻ പൗരന്മാർക്ക് ഇന്ത്യൻ സർക്കാർ നിലവിലെ സ്ഥലത്ത് അഭയം തേടാനും തെരുവിലിറങ്ങുന്നത് ഒഴിവാക്കാനും ആവശ്യപ്പെട്ട് നിര്ദ്ദേശം നല്കിയിട്ടുണ്ട്. നേപ്പാൾ അധികൃതരും കാഠ്മണ്ഡുവിലെ ഇന്ത്യൻ എംബസിയും നൽകുന്ന പ്രാദേശിക സുരക്ഷാ ഉപദേശങ്ങൾ പാലിക്കാനും പൗരന്മാരോട് നിർദ്ദേശിച്ചിട്ടുണ്ട്.
