ചിക്കാഗോ: വടക്കേ അമേരിക്കയിലെ പ്രമുഖ മലയാളി സംഘടനയായ ചിക്കാഗോ മലയാളി അസ്സോസിയേഷന്റെ 2025-27 കാലയളവിലേക്കുള്ള ഭരണസമിതി അംഗങ്ങൾ സത്യപ്രതിജ്ഞ ചെയ്ത് ചുമതലയേറ്റു. സ്ഥാനമൊഴിയുന്ന പ്രസിഡന്റ് ജെസ്സി റിൻസി അംഗംങ്ങൾക്ക് സത്യവാചകം ചൊല്ലിക്കൊടുത്തു.
ജോസ് മണക്കാട്ട് (പ്രസിഡന്റ് ), ലൂക്ക് ചിറയിൽ (വൈസ് പ്രസിഡന്റ് ), ബിജു മുണ്ടക്കൽ (ജനറൽ സെക്രട്ടറി), സാറ അനിൽ (ജോയിന്റ് സെക്രട്ടറി ), അച്ചൻകുഞ്ഞ് മാത്യു (ട്രഷറർ ), പ്രിൻസ് ഈപ്പൻ (ജോയിന്റ് ട്രഷറർ) എന്നിവരെ കൂടാതെ ഇരുപത് പേരടങ്ങുന്ന ബോർഡ് അംഗങ്ങളും ചുമതലയേറ്റു.
അസോസിയേഷനെ നോർത്ത് അമേരിക്കയിലെ ഏറ്റവും വലിയ സംഘടനയാക്കി മാറ്റുമെന്ന് പ്രസിഡന്റ് ജോസ് മണക്കാട്ടും, 53 വർഷത്തെ മഹത്തായ പാരമ്പര്യമുള്ള ചിക്കാഗോ മലയാളി അസോസിയേഷന്റെ പ്രവർത്തനങ്ങൾ കൂടുതൽ വ്യാപിപ്പിക്കുമെന്ന് സെക്രട്ടറി ബിജു മുണ്ടക്കലും ചടങ്ങില് പ്രഖ്യാപിച്ചു.
അസോസിയേഷന്റെ 2025-27 വർഷത്തെ പ്രവർത്തനോദ്ഘാടനവും കേരളപ്പിറവി ആഘോഷവും ഒക്ടോബർ 31 വെള്ളിയാഴ്ച വൈകീട്ട് 7 മണിക്ക് മോർട്ടൻ ഗ്രോവ് സെന്റ് മേരീസ് ക്നാനായ ചർച്ച് ഓഡിറ്റോറിയത്തിൽ വെച്ച് നടക്കും. അസ്സോസിയേഷന്റെ അടുത്ത രണ്ടു വര്ഷത്തേക്കുള്ള പ്രവര്ത്തനങ്ങള് ഔപചാരികമായി തുടക്കം കുറിക്കുന്നത് സംഘടനയെ നാളിതുവരെ നയിച്ച മുന് പ്രസിഡന്റുമാരാണ്. അതോടൊപ്പം 69-ാമത് കേരളപ്പിറവിയുടെ ആഘോഷങ്ങള് ഷിക്കാഗോ സീറോ മലബാര് സഭാ പിതാവ് മാര് ജോയി ആലപ്പാട്ട് നിര്വഹിക്കും.
ഈ പരിപാടിയിലേക്ക് എല്ലാ മലയാളി സുഹൃത്തുക്കളെയും ക്ഷണിക്കുന്നതായി എക്സിക്യൂട്ടീവ് കമ്മറ്റി അറിയിച്ചു.
