തിരുവനന്തപുരം: സിപിഐക്കെതിരെ മന്ത്രി വി ശിവൻകുട്ടിയുടെ പരാമർശത്തിന് സിപിഐ സംസ്ഥാന സെക്രട്ടറി ബിനോയ് വിശ്വം മറുപടി നൽകി. സിപിഐ ഒരു പ്രകോപനത്തിനും വഴങ്ങില്ല. വി ശിവൻകുട്ടി എന്തിനാണ് ഇത്ര ദേഷ്യപ്പെടുന്നതെന്ന് തനിക്കറിയില്ലെന്നും ശിവൻകുട്ടിയെ പഠിപ്പിക്കാൻ താൻ ആളല്ലെന്നും ബിനോയ് വിശ്വം പറഞ്ഞു. സിപിഐക്ക് രാഷ്ട്രീയ ബോധമുണ്ടെന്ന് ബിനോയ് വിശ്വം മാധ്യമങ്ങളോട് പറഞ്ഞു.
പ്രകോപിപ്പിക്കാനും പ്രകോപിതനാകാനും താൻ ആഗ്രഹിക്കുന്നില്ലെന്ന് ബിനോയ് വിശ്വം പറഞ്ഞു. ആരും പ്രകോപിപ്പിക്കേണ്ട സാഹചര്യമല്ല ഇപ്പോഴുള്ളത്. വി ശിവൻകുട്ടിയാണെങ്കിൽ പോലും പ്രകോപിപ്പിക്കരുത്. വി ശിവൻകുട്ടിയും അതിനെക്കുറിച്ച് ബോധവാനായിരിക്കണമെന്ന് അദ്ദേഹം പറഞ്ഞു. പിഎം ശ്രീ ആർഎസ്എസിന്റെ വിദ്യാഭ്യാസ അജണ്ടയാണ്. ഫണ്ട് ലഭിക്കാത്തതിന് താൻ ഉത്തരവാദിയല്ലെന്ന് പറയുന്ന ശിവൻകുട്ടിയോട് എന്താണ് പറയേണ്ടതെന്ന് അദ്ദേഹം ചോദിച്ചു.
എസ്എസ്കെയും പിഎംശ്രീയും ഒന്നല്ലെന്നും ആർഎസ്എസ് രാഷ്ട്രീയം രണ്ടും ബന്ധിപ്പിക്കുന്നുണ്ടെന്നും ബിനോയ് വിശ്വം പറഞ്ഞു. എസ്എസ്കെ ഫണ്ട് തട്ടിയെടുക്കാൻ കേന്ദ്രം ശ്രമിച്ചാൽ അതിനെ നിയമപരമായും രാഷ്ട്രീയമായും നേരിടണം. വിജയപരാജയങ്ങളുടെ അളവുകോലല്ല അത് അളക്കേണ്ടത്. എൽഡിഎഫ് ഐക്യത്തിന്റെയും പ്രത്യയശാസ്ത്രത്തിന്റെയും വിജയമാണെന്ന് ബിനോയ് വിശ്വം പറഞ്ഞു.
