ധാക്ക: ബംഗ്ലാദേശ് മുന് പ്രധാനമന്ത്രിയും ബംഗ്ലാദേശ് നാഷണലിസ്റ്റ് പാർട്ടി (ബിഎൻപി) ചെയർപേഴ്സണുമായ ഖാലിദ സിയയുടെ ആരോഗ്യനില അതീവ ഗുരുതരാവസ്ഥയിൽ തുടരുന്നുവെന്ന് അവരുടെ സ്വകാര്യ ഡോക്ടറുടെ പ്രസ്താവനയില് പറയുന്നു. ഒന്നിലധികം ആരോഗ്യ പ്രശ്നങ്ങൾ നേരിടുന്ന 80 കാരിയായ ഖാലിദ സിയ, നവംബർ 23 മുതൽ എവർകെയർ ആശുപത്രിയിൽ ചികിത്സയിലായിരുന്നു. ഡിസംബർ 11 ന് വെന്റിലേറ്ററിൽ പ്രവേശിപ്പിച്ചു. “അവരുടെ നില മെച്ചപ്പെട്ടുവെന്ന് പറയാനാവില്ല. നിലവിൽ അവരുടെ നില വളരെ ഗുരുതരമായി തുടരുന്നു” എന്ന് ഡോ. എ.ഇസഡ്.എം. സാഹിദ് പറഞ്ഞു.
അവര് വേഗത്തിൽ സുഖം പ്രാപിക്കാൻ പ്രാർത്ഥിക്കണമെന്ന് ഡോ. സാഹിദ് ജനങ്ങളോട് അഭ്യർത്ഥിച്ചു. “അല്ലാഹുവിന്റെ അനുഗ്രഹത്താൽ അവർ ഈ നിർണായക ഘട്ടത്തിൽ നിന്ന് പുറത്തുവന്നാൽ, നമുക്ക് ചില നല്ല വാർത്തകൾ കേൾക്കാൻ കഴിഞ്ഞേക്കും” എന്ന് അദ്ദേഹം പറഞ്ഞു.
പാർട്ടി അംഗങ്ങൾ പറയുന്നതനുസരിച്ച്, ഖാലിദയുടെ മകനും ബിഎൻപി ആക്ടിംഗ് ചെയർപേഴ്സണുമായ താരിഖ് റഹ്മാൻ രണ്ട് മണിക്കൂറിലധികം ആശുപത്രിയിൽ ചെലവഴിച്ച് അർദ്ധരാത്രിയോടെയാണ് പോയത്. പ്രാദേശിക, വിദേശ ഡോക്ടർമാർ അവരെ പരിചരിക്കുന്നുണ്ട്. അവരുടെ മരുമകൾ ഡോ. സുബൈദ റഹ്മാനും ചികിത്സാ പ്രക്രിയയിൽ സജീവമായി പങ്കെടുക്കുന്നുണ്ട്.
ഖാലിദ സിയയെ വിദഗ്ധ ചികിത്സയ്ക്കായി വിദേശത്തേക്ക് കൊണ്ടുപോകാൻ ആഗ്രഹിക്കുന്നുവെന്ന് ബിഎൻപി നേരത്തെ സൂചിപ്പിച്ചിരുന്നു. എന്നാല്, അവരുടെ നിലവിലെ ശാരീരികാവസ്ഥ വിമാന യാത്രയ്ക്ക് അനുയോജ്യമല്ല, അതിനാൽ അവരുടെ ചികിത്സ നിലവിൽ ആഭ്യന്തരമായി തുടരുകയാണ്.
