ഒരു ദിവസം മുമ്പ്, യുഎസ് പ്രസിഡന്റ് ഡൊണാൾഡ് ട്രംപ് ഇറാനെതിരായ ആക്രമണം 15 ദിവസത്തേക്ക് നിർത്തിവയ്ക്കുമെന്ന് പ്രഖ്യാപിച്ചു. പാക്കിസ്താന് പ്രധാനമന്ത്രി ഷഹബാസ് ഷെരീഫിന്റെയും ഫീൽഡ് മാർഷൽ അസിം മുനീറിന്റെയും അഭ്യർത്ഥന മാനിച്ചാണ് ഈ തീരുമാനമെടുത്തതെന്നും അദ്ദേഹം പറഞ്ഞു. ചൈനയുടെ സഹായത്തോടെ ഇറാനെ ചർച്ചാ മേശയിലേക്ക് കൊണ്ടുവന്നതായും ട്രംപ് പറഞ്ഞു. ട്രംപിന്റെ ഈ പ്രഖ്യാപനം പാക്കിസ്താനില് ആഹ്ലാദപ്രകടനത്തിന് കാരണമായി.
എന്നാല്, ചില ലോക നേതാക്കൾ ഇരുവരെയും സമാധാനത്തിനുള്ള നോബേല് സമ്മാനത്തിന് നാമനിർദ്ദേശം ചെയ്യണമെന്ന് അഭിപ്രായപ്പെട്ടിരിക്കുകയാണ്. ചില ബിസിനസ് സംഘടനകളും ഈ ആവശ്യം ഉന്നയിച്ചിട്ടുണ്ട്. പാക്കിസ്താന്റെ ഏറ്റവും വലിയ നയതന്ത്ര വിജയമായി പാക്കിസ്താന് മാധ്യമങ്ങൾ ഇരുവരെയും വാഴ്ത്തുന്നുമുണ്ട്.
പക്ഷെ, യാഥാർത്ഥ്യം വളരെ അകലെയാണ്. വെടിനിർത്തൽ പരസ്പരം അംഗീകരിക്കേണ്ടതായിരുന്നു. ഇറാൻ ഹോർമുസ് കടലിടുക്ക് പൂർണ്ണമായും തുറക്കുന്നതിനെ ആശ്രയിച്ചായിരുന്നു കരാര്. പാക്കിസ്താന് ഇരുവിഭാഗത്തെയും ചർച്ചകൾക്കായി ഇസ്ലാമാബാദിലേക്ക് ക്ഷണിച്ചിട്ടുണ്ട്.
വെടിനിർത്തൽ ദുർബലവും അനിശ്ചിതത്വവുമാണെന്ന് തോന്നുമെങ്കിലും, പാക്കിസ്താന് മാധ്യമങ്ങൾ ആഘോഷിക്കുകയാണ്. ഷഹബാസ് ഷെരീഫിനെയും അസിം മുനീറിനെയും നയതന്ത്ര വീരന്മാരായി ടിവി ചാനലുകൾ വാഴ്ത്തുന്നു. ജനപ്രിയ ചാനലായ എ.ആർ.വൈ ന്യൂസിലെ ഒരു സംവാദത്തിൽ, പാനലിസ്റ്റുകൾ ഇതിനെ പാക്കിസ്താന്റെ വലിയ നയതന്ത്ര വിജയമായി വാഴ്ത്തി.
സമാധാനത്തിനുള്ള നോബേൽ സമ്മാനത്തിന് ഏറ്റവും യോഗ്യരായ വ്യക്തികളായി ഷഹബാസ് ഷെരീഫിനെയും അസിം മുനീറിനെയും ഒരു പാനലിസ്റ്റ് പ്രഖ്യാപിക്കുകയും ചെയ്തു. ലോകത്തിന് സമാധാനം കൊണ്ടുവരാൻ ഇരുവരും ഏറ്റവും അനുയോജ്യരായ വ്യക്തികളാണെന്നാണ് അവരുടെ അഭിപ്രായം.
വെടിനിർത്തലിന് 15 ദിവസം മാത്രമേ പഴക്കമുള്ളൂ, അതിന്റെ ഭാവി ഇപ്പോഴും അനിശ്ചിതത്വത്തിലാണ്. യുഎസ് സൈന്യം പൂർണ്ണമായും സജ്ജമാണെന്ന് ട്രംപ് തന്നെ പ്രസ്താവിച്ചിട്ടുണ്ട്. വെടിനിർത്തലിന് അദ്ദേഹം കർശനമായ മുന്നറിയിപ്പും നല്കിയിട്ടുണ്ട്. അതേസമയം, ട്രംപിന്റെ 15 ദിവസത്തെ സാവകാശം ഒരു ‘(കു)തന്ത്ര’മാണെന്ന് പരക്കെ വിശ്വസിക്കുന്നു. ഈ 15 ദിവസം കൊണ്ട് ഇറാനെ ആക്രമിക്കാനുള്ള കൂടുതല് യുദ്ധസന്നാഹമൊരുക്കാനാണ് യു എസ് ശ്രമിക്കുന്നതെന്ന് ബഹുഭൂരിപക്ഷം പേരും വിശ്വസിക്കുന്നു.
അമേരിക്കയും ഇറാനും തമ്മിലുള്ള ചർച്ചകൾ വെള്ളിയാഴ്ച പാക്കിസ്താനില് നടക്കാനിരിക്കെ, ഈ തീരുമാനത്തെക്കുറിച്ച് ചോദ്യങ്ങൾ ഉയർന്നുവരുന്നുണ്ട്. ഈ തീരുമാനത്തിനെതിരെ അമേരിക്കയിലും ട്രംപ് വിമർശനം നേരിടുന്നുണ്ട്. അതേസമയം, പാക്കിസ്താന് തങ്ങളുടെ പങ്ക് പെരുപ്പിച്ചു കാണിക്കുകയാണ്. വെടിനിർത്തൽ എത്രത്തോളം നിലനിൽക്കുമെന്ന് പറയാൻ ഇപ്പോഴും പ്രയാസമാണ്.
യുദ്ധഭീഷണി പൂർണമായും ശമിച്ചിട്ടില്ല. പാക്കിസ്താന് ടെലിവിഷൻ നിലവിൽ നോബേല് സമ്മാനത്തെക്കുറിച്ചുള്ള ചർച്ചകൾ കൊണ്ട് നിറഞ്ഞിരിക്കുകയാണെങ്കിലും, ഈ ആവശ്യത്തോട് അന്താരാഷ്ട്ര തലത്തിൽ കാര്യമായ പ്രതികരണമൊന്നും ഉണ്ടായിട്ടില്ല.
