കൊച്ചി: കാലടി സർവകലാശാലയിലെ ശങ്കര ജയന്തി ആഘോഷ പരിപാടിയിൽ വിദ്യാർത്ഥികൾ പങ്കെടുത്തില്ലെങ്കില് അവര് പ്രത്യാഘാതങ്ങൾ നേരിടേണ്ടിവരുമെന്ന് സംസ്കൃത വ്യാകരണ വിഭാഗം മേധാവി വിദ്യാർത്ഥികളുടെ വാട്ട്സ്ആപ്പ് ഗ്രൂപ്പിലേക്ക് അയച്ച ശബ്ദ സന്ദേശം വിവാദമായി. വകുപ്പിൽ നടക്കുന്ന വിടവാങ്ങൽ പരിപാടിയിലും ഗവർണർ രാജേന്ദ്ര വിശ്വനാഥ് ആര്ലേക്കർ പങ്കെടുക്കുന്ന പരിപാടിയിലും പങ്കെടുത്തില്ലെങ്കിൽ ബുദ്ധിമുട്ടുകൾ നേരിടേണ്ടിവരുമെന്ന് അദ്ധ്യാപകൻ സുനിൽ കുമാർ ആർഡിയുടെ ശബ്ദ സന്ദേശം പറയുന്നു. പിഎച്ച്ഡി കോഴ്സ് വൈവയിലും ഇതെല്ലാം പ്രതിഫലിക്കുമെന്ന് ഗവേഷകരായ വിദ്യാർത്ഥികൾക്കുള്ള ശബ്ദ സന്ദേശത്തിൽ അദ്ധ്യാപകൻ പറയുന്നുണ്ട്.
അതേസമയം, ശബ്ദ സന്ദേശം ഗ്രൂപ്പിലേക്ക് അയച്ചത് നല്ല ഉദ്ദേശ്യത്തോടെയാണെന്ന് അദ്ധ്യാപകൻ വിശദീകരിച്ചു. വകുപ്പുമായുള്ള വിദ്യാർത്ഥികളുടെ നിസ്സഹകരണം അവരെ അക്കാദമികമായി ബാധിക്കുമെന്നും, അതുകൊണ്ടാണ് വിദ്യാർത്ഥികൾ നിർബന്ധമായും പങ്കെടുക്കണമെന്ന് ആവശ്യപ്പെട്ടതെന്നും സുനിൽ കുമാർ കൂട്ടിച്ചേർത്തു.
ശങ്കര ജയന്തി ആഘോഷവുമായി ബന്ധപ്പെട്ട് പുറപ്പെടുവിച്ച സർക്കുലർ മുമ്പ് വിവാദമായിരുന്നു. ശങ്കര ജയന്തി ആഘോഷവുമായി ബന്ധപ്പെട്ട് ഗവർണർ പങ്കെടുക്കുന്ന പരിപാടിക്ക് കർശന നിർദ്ദേശങ്ങളോടെയാണ് സർക്കുലർ പുറപ്പെടുവിച്ചത്. ഗവർണർ എത്തുകയും പരിപാടി വിടുകയും ചെയ്യുമ്പോൾ എല്ലാവരും എഴുന്നേറ്റു നിൽക്കണം, മൊബൈൽ ഫോണുകൾ സൈലന്റ് മോഡിൽ ഇടണം, പ്രസംഗത്തിനിടെ അനാവശ്യ ചലനങ്ങൾ ഒഴിവാക്കണം, പ്രസംഗം അവസാനിക്കുമ്പോൾ എല്ലാവരും കൈയടിക്കണം, ഗവർണർ തിരിച്ചു പോകുന്നതുവരെ ആരും ഹാളിൽ നിന്ന് പുറത്തുപോകരുത് തുടങ്ങിയ കർശന നിർദ്ദേശങ്ങൾ സർക്കുലറിൽ ഉൾപ്പെടുത്തിയിരുന്നു. അത് വിവാദമായതിനെത്തുടര്ന്ന് സർവകലാശാല സർക്കുലർ പിൻവലിക്കുകയും ചെയ്തിരുന്നു.
