അമൽ നീരദ് സംവിധാനം ചെയ്യുന്ന ഏറ്റവും പുതിയ ചിത്രം ‘ബാച്ച്‌ലർ പാർട്ടി Deux’വിലെ ഷൈൻ ടോം ചാക്കോയുടെയും ചന്തു സലീംകുമാറിന്റെയും ക്യാരക്ടർ പോസ്റ്ററുകൾ പുറത്തിറങ്ങി. വ്യത്യസ്തമായ ഗെറ്റപ്പുകളിലും സ്റ്റൈലിഷ് ലുക്കുകളിലുമാണ് ഇരുവരും പോസ്റ്ററുകളിൽ പ്രത്യക്ഷപ്പെടുന്നത്. ഷൈൻ ടോം ചാക്കോ അവതരിപ്പിക്കുന്ന ‘ഗുരു’ എന്ന കഥാപാത്രത്തിന്റെ മാസ് ലുക്കാണ് പുതിയ പോസ്റ്ററിന്റെ പ്രധാന ആകർഷണം. ചന്തു സലീംകുമാർ അവതരിപ്പിക്കുന്ന ‘മമ്മു’ എന്ന കഥാപാത്രവും ശ്രദ്ധേയമായ ഗെറ്റപ്പിലാണ് എത്തുന്നത്. ചുണ്ടിൽ സിഗരറ്റും കൈയിൽ തോക്കുമായി നിൽക്കുന്ന മമ്മുവിന്റെ ലുക്കാണ് പോസ്റ്ററിൽ അവതരിപ്പിച്ചിരിക്കുന്നത്.
നേരത്തെ പുറത്തിറങ്ങിയ ടൊവിനോ തോമസ്, നസ്‌ലൻ, സൗബിൻ ഷാഹിർ, ഷറഫുദ്ദീൻ, ശ്രീനാഥ് ഭാസി എന്നിവരുടെ ക്യാരക്ടർ പോസ്റ്ററുകളും സമൂഹമാധ്യമങ്ങളിൽ വലിയ ശ്രദ്ധ നേടിയിരുന്നു. ഓരോ താരത്തെയും വ്യത്യസ്തമായ രൂപഭാവങ്ങളിലാണ് അവതരിപ്പിച്ചിരിക്കുന്നത്. അമൽ നീരദ് ചിത്രങ്ങളുടെ സവിശേഷതയായ സ്റ്റൈലിഷ് അവതരണവും ആക്ഷൻ പശ്ചാത്തലവും പുതിയ പോസ്റ്ററുകളിലും പ്രകടമാണ്. നവംബർ 19ന് ചിത്രം ലോകമെമ്പാടുമുള്ള തിയേറ്ററുകളിൽ റിലീസ് ചെയ്യുമെന്നാണ് പ്രഖ്യാപിച്ചിരിക്കുന്നത്.
2012ൽ പുറത്തിറങ്ങി ശ്രദ്ധേയമായ ആക്ഷൻ എന്റർടെയ്‌നറായ ‘ബാച്ച്‌ലർ പാർട്ടി’യുടെ രണ്ടാം ഭാഗമാണ് ‘ബാച്ച്‌ലർ പാർട്ടി Deux’. ആദ്യ ചിത്രം പുറത്തിറങ്ങി 14 വർഷങ്ങൾക്കുശേഷമാണ് പുതിയ ഭാഗം പ്രേക്ഷകരിലേക്ക് എത്തുന്നത്. ഇത്തവണ ജെൻ സി പ്രേക്ഷകരുടെ അഭിരുചികൾക്കനുസരിച്ചുള്ള പുതുമയാർന്ന അവതരണമായിരിക്കും ചിത്രത്തിന്റേതെന്നാണ് സൂചന. റെഡ്-ഗോൾഡൻ റെട്രോ പശ്ചാത്തലത്തിൽ പുറത്തിറങ്ങിയ ചിത്രത്തിന്റെ ഫസ്റ്റ് ലുക്ക് പോസ്റ്റർ നേരത്തെ തന്നെ സിനിമാപ്രേമികൾക്കിടയിൽ ചർച്ചയായിരുന്നു.
വ്യത്യസ്തമായ കഥാപശ്ചാത്തലവും ആക്ഷൻ രംഗങ്ങളും കഥാപാത്രങ്ങളുടെ സ്റ്റൈലിഷ് അവതരണവും കൊണ്ട് ശ്രദ്ധ നേടിയ ആദ്യ ‘ബാച്ച്‌ലർ പാർട്ടി’ വർഷങ്ങൾക്കിപ്പുറവും ആരാധകർക്കിടയിൽ പ്രത്യേക സ്ഥാനമുള്ള ചിത്രമാണ്. അതുകൊണ്ടുതന്നെ രണ്ടാം ഭാഗത്തെക്കുറിച്ചുള്ള പ്രതീക്ഷകളും ഉയർന്നതാണ്. ചിത്രത്തിന്റെ പേരിലെ ‘Deux’ എന്ന ഫ്രഞ്ച് വാക്കിന് ‘രണ്ട്’ എന്നാണ് അർഥം. അതേസമയം, ഫ്രഞ്ചിലെ ‘d’eux’ എന്ന പ്രയോഗത്തിന് ‘അവരുടെ’ അല്ലെങ്കിൽ ‘അവരെക്കുറിച്ച്’ എന്ന അർഥവുമുണ്ട്.
മലയാളത്തിലെ പ്രമുഖ താരങ്ങളെ അണിനിരത്തിയാണ് അമൽ നീരദ് ഇത്തവണയും എത്തുന്നത്. നസ്‌ലൻ, കുഞ്ചാക്കോ ബോബൻ, സൗബിൻ ഷാഹിർ, ഷറഫുദ്ദീൻ, ശ്രീനാഥ് ഭാസി, ചന്തു സലീംകുമാർ, ടൊവിനോ തോമസ്, ഷൈൻ ടോം ചാക്കോ, പാരിസ് ലക്ഷ്മി, നാദിയ മൊയ്തു, രജീഷ വിജയൻ, ജ്യോതിർമയി, ഹൻസിക കൃഷ്ണകുമാർ തുടങ്ങി വൻ താരനിരയാണ് ചിത്രത്തിൽ അണിനിരക്കുന്നത്. പുറത്തുവന്ന ക്യാരക്ടർ പോസ്റ്ററുകളിൽ താരങ്ങൾ ഇതുവരെ കാണാത്ത വ്യത്യസ്തമായ ലുക്കുകളിലാണ് പ്രത്യക്ഷപ്പെടുന്നത്.
അമൽ നീരദ് പ്രൊഡക്ഷൻസ്, അൻവർ റഷീദ് എന്റർടെയ്ൻമെന്റ്സ്, ഫഹദ് ഫാസിൽ ആൻഡ് ഫ്രണ്ട്സ് എന്നീ ബാനറുകൾ സംയുക്തമായാണ് ചിത്രം നിർമിക്കുന്നത്. പ്രമുഖ നിർമാണ കമ്പനികൾ ഒന്നിക്കുന്ന ചിത്രം വലിയ സാങ്കേതിക മികവോടെയാണ് ഒരുക്കുന്നത്.
അപ്പു പ്രഭാകറാണ് ചിത്രത്തിന്റെ ഛായാഗ്രഹണം നിർവഹിക്കുന്നത്. വിവേക് ഹർഷൻ എഡിറ്റിങ്ങും ക്രിസ്റ്റോ സേവ്യർ സംഗീതസംവിധാനവും നിർവഹിക്കുന്നു. ഉണ്ണി ആർ ആണ് സംഭാഷണങ്ങൾ ഒരുക്കുന്നത്. തപസ് നായക് സൗണ്ട് ഡിസൈനിങ്ങും ജോസഫ് നെല്ലിക്കൽ പ്രൊഡക്ഷൻ ഡിസൈനിങ്ങും നിർവഹിക്കുന്നു. റഫീഖ് അഹമ്മദ്, വിനായക് ശശികുമാർ എന്നിവരാണ് ഗാനരചയിതാക്കൾ. മഷർ ഹംസ വസ്ത്രാലങ്കാരവും റോണക്സ് സേവ്യർ മേക്കപ്പും നിർവഹിക്കുന്നു. ആതിര ദിൽജിത്താണ് ചിത്രത്തിന്റെ പിആർഒ.
വമ്പൻ താരനിരയും അമൽ നീരദിന്റെ സംവിധാനശൈലിയും ആദ്യ ഭാഗത്തിനുള്ള ആരാധകപിന്തുണയും ചേർന്നതോടെ ‘ബാച്ച്‌ലർ പാർട്ടി Deux’ മലയാള സിനിമാപ്രേമികൾ ആകാംക്ഷയോടെ കാത്തിരിക്കുന്ന ചിത്രങ്ങളിലൊന്നായി മാറിയിരിക്കുകയാണ്.
