വാഷിംഗ്ടണ്: എച്ച്-1ബി വിസകൾക്ക് 100,000 ഡോളര് പുതിയ ഫീസ് ഏർപ്പെടുത്തിയിട്ടും, രാജ്യത്തിന് ഇപ്പോഴും വൈദഗ്ധ്യമുള്ള വിദേശ തൊഴിലാളികളെ ആവശ്യമുണ്ടെന്ന് പ്രസിഡന്റ് ഡൊണാൾഡ് ട്രംപ് പറഞ്ഞു. ചിലതരം സാങ്കേതിക കഴിവുകളുടെ കുറവ് അമേരിക്ക നേരിടുന്നുണ്ടെന്നും, ചില മേഖലകളിൽ വിദേശ പ്രൊഫഷണലുകളെ കൊണ്ടുവരേണ്ടത് അത്യാവശ്യമാണെന്നും ഫോക്സ് ന്യൂസ് അഭിമുഖത്തില് ട്രംപ് പ്രസ്താവിച്ചു.
എല്ലാ മേഖലയിലും ആവശ്യമായ വൈദഗ്ധ്യമുള്ളവരുടെ അഭാവം അമേരിക്കയിലുണ്ടെന്ന് ട്രംപ് സമ്മതിച്ചു. H-1B വിസകൾക്കുള്ള അപേക്ഷാ ഫീസ് $100,000 ആയി വർദ്ധിപ്പിച്ച സമയത്താണ് ട്രംപിന്റെ ഈ പ്രസ്താവന വരുന്നത്. ഗൂഗിൾ, മൈക്രോസോഫ്റ്റ്, ആമസോൺ തുടങ്ങിയ കമ്പനികൾ ഇന്ത്യയിൽ നിന്നും മറ്റ് രാജ്യങ്ങളിൽ നിന്നുമുള്ള ഐടി വിദഗ്ധരെ നിയമിക്കുന്ന ടെക് വ്യവസായത്തിലാണ് H-1B വിസകൾ പ്രധാനമായും ഉപയോഗിക്കുന്നത്. സർക്കാർ കണക്കുകൾ പ്രകാരം, കഴിഞ്ഞ വർഷം H-1B വിസ സ്വീകരിച്ചവരിൽ 71 ശതമാനം ഇന്ത്യക്കാരായിരുന്നു, അതേസമയം ചൈനയുടേത് 11.7 ശതമാനം മാത്രമായിരുന്നു.
പുതിയ നയത്തിനെതിരെ യുഎസ് ചേംബർ ഓഫ് കൊമേഴ്സ് സർക്കാരിനെതിരെ കേസ് ഫയൽ ചെയ്തിട്ടുണ്ട്. ഈ തീരുമാനം അമേരിക്കൻ നവീകരണത്തെയും മത്സരക്ഷമതയെയും ദോഷകരമായി ബാധിക്കുമെന്ന് വ്യവസായ പ്രമുഖര് പറയുന്നു. അതേസമയം, വൈറ്റ് ഹൗസ് പ്രസ് സെക്രട്ടറി കരോലിൻ ലെവിറ്റ് കേസുകളെ സര്ക്കാര് ശക്തമായി നേരിടുമെന്ന് പറഞ്ഞു. എച്ച്-1ബി സംവിധാനം വളരെക്കാലമായി അമേരിക്കയെ വഞ്ചിക്കുകയാണെന്നും, അമേരിക്കൻ തൊഴിലാളികൾക്ക് മുൻഗണന നൽകുന്നതിനായി അത് നിര്ത്തലാക്കുകയോ പരിഷ്കരിക്കരിക്കുകയോ ചെയ്യേണ്ടതുണ്ടെന്നും അവർ കൂട്ടിച്ചേർത്തു.
പുതിയ അപേക്ഷകൾക്ക് മാത്രമേ $100,000 ഫീസ് ബാധകമാകൂ എന്നും സ്റ്റാറ്റസ് മാറ്റമോ താമസ കാലാവധി നീട്ടലോ ഉൾപ്പെടുന്ന കേസുകൾക്ക് ഈടാക്കില്ലെന്നും യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (യുഎസ്സിഐഎസ്) തിങ്കളാഴ്ച വ്യക്തമാക്കി. യുഎസ് നിയമപ്രകാരം, യുഎസിൽ നിന്ന് ബിരുദാനന്തര ബിരുദമോ അതിൽ കൂടുതലോ ഉള്ളവർക്ക് ഓരോ വർഷവും 65,000 എച്ച്-1ബി വിസകളും 20,000 അധിക വിസകളും നൽകാൻ കഴിയും.
അതേസമയം, ട്രംപ് ഭരണകൂടം രണ്ടാം ടേമിൽ അനധികൃത കുടിയേറ്റക്കാർക്കെതിരെ കൂടുതൽ കർശനമായ നിലപാട് സ്വീകരിച്ചു. ആയിരക്കണക്കിന് ആളുകളെ നാടുകടത്തുകയും നിരവധി നഗരങ്ങളിലെ ഇമിഗ്രേഷൻ ഉദ്യോഗസ്ഥരെ സഹായിക്കാൻ സൈനികരെ വിന്യസിക്കുകയും ചെയ്തിട്ടുണ്ട്. ഈ കർശനമായ നയങ്ങൾ യുഎസ് തൊഴിൽ വിപണിയെ ബാധിക്കുമെന്ന് വ്യവസായം ഭയപ്പെടുന്നു.
