കാലിഫോർണിയയിലുണ്ടായ വാഹനാപകടത്തിൽ തെലങ്കാനയിൽ നിന്നുള്ള രണ്ട് വിദ്യാർത്ഥിനികൾ മരിച്ചു. പഠനം പൂർത്തിയാക്കിയ ശേഷം ജോലി അന്വേഷിക്കുകയായിരുന്നു രണ്ടു പേരും.
കാലിഫോര്ണിയ: കാലിഫോർണിയയിലുണ്ടായ ദാരുണമായ റോഡപകടത്തിൽ രണ്ട് ഇന്ത്യൻ വിദ്യാർത്ഥിനികൾ മരിച്ചു. തെലങ്കാനയിലെ മഹാബുബാബാദ് ജില്ലയിൽ നിന്നുള്ള രണ്ട് വിദ്യാർത്ഥിനികളും അമേരിക്കയിൽ ബിരുദാനന്തര ബിരുദം പൂർത്തിയാക്കിയവരാണെന്നും, പഠനം പൂർത്തിയാക്കിയ ശേഷം അവർ ജോലി അന്വേഷിക്കുകയായിരുന്നു എന്നും റിപ്പോര്ട്ടുകളില് പറയുന്നു.
മരിച്ച വിദ്യാർത്ഥിനികൾ 24 വയസ്സുള്ള പുല്ലഖണ്ഡം മേഘ്ന റാണി, 24 വയസ്സുള്ള കഡിയാല ഭാവന എന്നിവരാണെന്ന് തിരിച്ചറിഞ്ഞിട്ടുണ്ട്. ഇരുവരും തെലങ്കാനയിലെ മഹാബുബാബാദ് ജില്ലയിലെ ഗാർല മണ്ഡലിൽ നിന്നാണ്. നല്ല സുഹൃത്തുക്കളുമായിരുന്നു. ഒരുമിച്ച് പഠിച്ച് മാസ്റ്റേഴ്സ് പൂർത്തിയാക്കിയ ശേഷം, ജോലി അന്വേഷിക്കുകയായിരുന്നു.
മേഘ്നയും ഭാവനയും ചില സുഹൃത്തുക്കൾക്കൊപ്പം കാറിൽ യാത്ര ചെയ്യുകയായിരുന്നുവെന്നാണ് റിപ്പോർട്ടുകൾ. കാലിഫോർണിയയിലേക്ക് മടങ്ങുമ്പോൾ അവരുടെ കാർ അപകടത്തിൽപ്പെട്ടു. രണ്ടു പേരും സംഭവസ്ഥലത്ത് തന്നെ മരിച്ചു. അപകടത്തിന്റെ കാരണം നിലവിൽ വ്യക്തമല്ല.
മേഘ്നയുടെ പിതാവ് നാഗേശ്വർ റാവു ഗാർലയിൽ ഒരു മീ-സേവാ കേന്ദ്രം നടത്തുന്നു, ഭാവനയുടെ പിതാവ് മുൽക്കനൂർ ഗ്രാമത്തിലെ ഡെപ്യൂട്ടി സർപഞ്ചാണ്. മക്കളുടെ അപകട വിവരമറിഞ്ഞ് രണ്ട് കുടുംബങ്ങളും കടുത്ത ഞെട്ടലിലാണ്.
ഇരുവരുടെയും മൃതദേഹങ്ങൾ ഇന്ത്യയിലെത്തിക്കാനുള്ള ശ്രമത്തിലാണ് കുടുംബം. ചെലവുകൾക്കായി ധനസമാഹരണം പുരോഗമിക്കുകയാണ്. രണ്ട് വിദ്യാർത്ഥികളുടെയും മൃതദേഹങ്ങൾ എത്രയും വേഗം നാട്ടിലെത്തിക്കാന് സഹായിക്കണമെന്ന് അവര് ഇന്ത്യൻ സർക്കാരിനോട് അഭ്യർത്ഥിച്ചിട്ടുണ്ട്.
മേഘ്നയും ഭാവനയും സഹപാഠികൾ മാത്രമല്ല, വളരെ അടുത്ത സുഹൃത്തുക്കളുമായിരുന്നു എന്ന് സഹപാഠികള് പറഞ്ഞു. അമേരിക്കയിലെ പഠനകാലത്ത് അവർ പരസ്പരം പിന്തുണച്ചിരുന്നു എന്നും, ബിരുദം പൂർത്തിയാക്കിയതിനുശേഷവും ജോലി അന്വേഷിക്കുന്നതിനിടയിൽ അവർ ഒരുമിച്ചാണ് താമസിച്ചിരുന്നതെന്നും സഹപാഠികള് പറഞ്ഞു.
സുഹൃത്തുക്കള്ക്കൊപ്പം ഒരു യാത്ര കഴിഞ്ഞ് മടങ്ങുന്ന വഴിയാണ് കാർ അപകടത്തിൽപ്പെട്ടത്. അപകടത്തിന്റെ കാരണം കാലിഫോര്ണിയ സ്റ്റേറ്റ് പോലീസ് അന്വേഷിക്കുന്നുണ്ട്. ഇതുവരെ വ്യക്തമായ വിവരങ്ങളൊന്നും പുറത്തുവന്നിട്ടില്ല.
