മയാമി: അമേരിക്കൻ എയർലൈൻസ് വിമാനത്തിനുള്ളിൽ വസ്ത്രങ്ങൾ പൂർണമായും അഴിച്ചുമാറ്റി അനുചിതമായി പെരുമാറിയെന്ന ആരോപണത്തെ തുടർന്ന് വനിതാ യാത്രക്കാരിയെ പോലീസ് കസ്റ്റഡിയിലെടുത്തതായി റിപ്പോർട്ട്.
സെപ്റ്റംബർ 11-ന് ബാൾട്ടിമോറിൽ നിന്ന് മയാമിയിലേക്ക് പുറപ്പെട്ട അമേരിക്കൻ എയർലൈൻസ് AA1779 വിമാനത്തിലാണ് സംഭവം. വിമാനത്തിലെ ഒമ്പതാം നിരയിൽ ഇരുന്നിരുന്ന യാത്രക്കാരി വസ്ത്രങ്ങൾ അഴിച്ചുമാറ്റിയതിനെ തുടർന്ന് കാബിൻ ജീവനക്കാർ വിവരം പൈലറ്റുമാരെ അറിയിച്ചതായാണ് റിപ്പോർട്ടുകൾ.
മറ്റ് യാത്രക്കാരുടെ സാന്നിധ്യത്തിൽ യുവതി അനുചിതമായി പെരുമാറിയതായും റിപ്പോർട്ടുകളുണ്ട്. തുടർന്ന് വിമാന ജീവനക്കാർ അമേരിക്കൻ എയർലൈൻസ് ഓപ്പറേഷൻസ് വിഭാഗത്തെ വിവരം അറിയിക്കുകയും വിമാനം മയാമിയിൽ എത്തുമ്പോൾ നിയമപാലകരുടെ സഹായം ലഭ്യമാക്കാൻ ആവശ്യപ്പെടുകയും ചെയ്തു.
സംഭവത്തെ തുടർന്ന് വിമാനം വഴിതിരിച്ചുവിട്ടില്ല. AA1779 മയാമിയിലേക്കുള്ള യാത്ര തുടർന്നു, വെള്ളിയാഴ്ച രാത്രി സുരക്ഷിതമായി മയാമിയിൽ ഇറങ്ങി.
വിമാനം ഗേറ്റിലെത്തിയപ്പോൾ പോലീസ് ഉദ്യോഗസ്ഥർ കാത്തുനിന്നിരുന്നതായും തുടർന്ന് വനിതാ യാത്രക്കാരിയെ കസ്റ്റഡിയിലെടുത്തതായും റിപ്പോർട്ടുകൾ പറയുന്നു.
സംഭവവുമായി ബന്ധപ്പെട്ട സാഹചര്യങ്ങൾ അധികൃതർ അന്വേഷിച്ചുവരികയാണ്
