മലപ്പുറം: കേന്ദ്ര സർക്കാരിന്റെ വിബി-ജി റാം ജി (വികസിത് ഭാരത് ഗ്യാരണ്ടി ഫോർ റോസ്ഗാർ ആൻഡ് അജീവിക മിഷൻ–ഗ്രാമീൺ) പദ്ധതിയുടെ പ്രവർത്തനങ്ങൾ കൂടുതൽ വേഗത്തിലും കാര്യക്ഷമമായും നടപ്പാക്കണമെന്ന് ഇ.ടി. മുഹമ്മദ് ബഷീർ എം.പി. ആവശ്യപ്പെട്ടു. ഗ്രാമീണ മേഖലകളിൽ തൊഴിലവസരങ്ങൾ വർധിപ്പിക്കുന്നതിനൊപ്പം അടിസ്ഥാനസൗകര്യ വികസനത്തിനും ദീർഘകാലാടിസ്ഥാനത്തിൽ പ്രയോജനപ്പെടുന്ന ആസ്തികളുടെ സൃഷ്ടിക്കും പ്രാധാന്യം നൽകുന്ന പദ്ധതിയുടെ സാധ്യതകൾ പരമാവധി പ്രയോജനപ്പെടുത്തണമെന്നും അദ്ദേഹം നിർദേശിച്ചു.
പദ്ധതിയുടെ നിലവിലെ പുരോഗതി, നടപ്പാക്കൽ സാധ്യതകൾ, ഭാവി പ്രവർത്തനങ്ങൾ, വിവിധ വകുപ്പുകളുടെ ഏകോപനം എന്നിവ വിലയിരുത്തുന്നതിനായി മലപ്പുറം പ്ലാനിങ് സെക്രട്ടേറിയറ്റ് ഹാളിൽ സംഘടിപ്പിച്ച ഉന്നതതല അവലോകന യോഗത്തിൽ സംസാരിക്കുകയായിരുന്നു എം.പി.
മുൻകാല ഗ്രാമീണ തൊഴിലുറപ്പ് പദ്ധതികൾ പ്രധാനമായും സാധാരണ തൊഴിലാളികൾക്ക് തൊഴിലും വരുമാനവും ഉറപ്പാക്കുന്നതിലാണ് ശ്രദ്ധ കേന്ദ്രീകരിച്ചിരുന്നതെങ്കിൽ, വിബി-ജി റാം ജി പദ്ധതി ഗ്രാമീണ മേഖലകളിൽ സ്ഥിരമായ വികസന ആസ്തികൾ സൃഷ്ടിക്കുന്നതിനും നിർമാണ പ്രവർത്തനങ്ങൾക്കും കൂടുതൽ പ്രാധാന്യം നൽകുന്നതാണെന്ന് അദ്ദേഹം ചൂണ്ടിക്കാട്ടി. തൊഴിൽ ലഭ്യത ഉറപ്പാക്കുന്നതിനൊപ്പം ഗ്രാമങ്ങളുടെ സമഗ്ര വികസനത്തിനും ജനങ്ങളുടെ ജീവിതനിലവാരം മെച്ചപ്പെടുത്തുന്നതിനും പദ്ധതി സഹായകമാകണം. ഇതിനായി തദ്ദേശീയ ആവശ്യങ്ങൾ തിരിച്ചറിഞ്ഞ് മുൻഗണനാടിസ്ഥാനത്തിൽ പ്രവൃത്തികൾ ആസൂത്രണം ചെയ്യേണ്ടതുണ്ടെന്നും അദ്ദേഹം അഭിപ്രായപ്പെട്ടു.
പദ്ധതിയുടെ ഭാഗമായി സാങ്കേതിക വൈദഗ്ധ്യം ആവശ്യമായ നിരവധി പ്രവൃത്തികൾ നടപ്പാക്കേണ്ടിവരുമെന്നതിനാൽ തൊഴിലാളികളുടെ നൈപുണ്യ വികസനത്തിന് പ്രത്യേക പരിഗണന നൽകണമെന്ന് എം.പി. ആവശ്യപ്പെട്ടു. പരമ്പരാഗത തൊഴിൽരീതികളിൽനിന്ന് കൂടുതൽ സാങ്കേതിക മികവുള്ള പ്രവർത്തനങ്ങളിലേക്ക് തൊഴിലാളികളെ പ്രാപ്തരാക്കേണ്ടതുണ്ട്. ഇതിനായി ആവശ്യമായ പരിശീലന പരിപാടികൾ സംഘടിപ്പിക്കുകയും പുതിയ തൊഴിൽസാധ്യതകൾ പ്രയോജനപ്പെടുത്താൻ തൊഴിലാളികൾക്ക് അവസരമൊരുക്കുകയും വേണം. തൊഴിലാളികളുടെ കഴിവുകൾ മെച്ചപ്പെടുത്തുന്നത് പദ്ധതിയുടെ ഗുണനിലവാരം ഉയർത്തുന്നതിനൊപ്പം ഗ്രാമീണ തൊഴിൽമേഖലയ്ക്കും ഗുണകരമാകുമെന്ന് അദ്ദേഹം വ്യക്തമാക്കി.
പദ്ധതിയുടെ കാര്യക്ഷമമായ നടത്തിപ്പിന് വിവിധ സർക്കാർ വകുപ്പുകളും തദ്ദേശസ്വയംഭരണ സ്ഥാപനങ്ങളും സാങ്കേതിക വിഭാഗങ്ങളും തമ്മിലുള്ള ഏകോപനം അനിവാര്യമാണെന്നും എം.പി. അഭിപ്രായപ്പെട്ടു. പദ്ധതി നിർവഹണവുമായി ബന്ധപ്പെട്ട് കേന്ദ്ര സർക്കാരിന്റെ തലത്തിൽ ഇടപെടലുകൾ ആവശ്യമുള്ള വിഷയങ്ങളിലും നയപരമായ തീരുമാനങ്ങൾ ആവശ്യമായ സാഹചര്യങ്ങളിലും എം.പി. എന്ന നിലയിൽ പൂർണ പിന്തുണ നൽകുമെന്നും അദ്ദേഹം ഉറപ്പുനൽകി. പദ്ധതിയുടെ ആനുകൂല്യങ്ങൾ അർഹരായ ഗ്രാമീണ ജനവിഭാഗങ്ങളിലേക്ക് എത്തിക്കുന്നതിനാവശ്യമായ നടപടികൾക്ക് മുൻഗണന നൽകണമെന്നും അദ്ദേഹം നിർദേശിച്ചു.
വിബി-ജി റാം ജി പദ്ധതിയിൽ ആദ്യഘട്ടത്തിൽ 318 ഇനം പ്രവൃത്തികളാണ് ഉൾപ്പെടുത്തിയിരുന്നത്. എന്നാൽ വിവിധ സംസ്ഥാനങ്ങളിൽനിന്നുള്ള ആവശ്യങ്ങളും നിർദേശങ്ങളും പരിഗണിച്ച് അനുവദനീയമായ പ്രവൃത്തികളുടെ എണ്ണം 375 ആയി വർധിപ്പിച്ചതായി യോഗത്തിൽ വിശദീകരിച്ചു. ഇതിലൂടെ പ്രാദേശിക സാഹചര്യങ്ങൾക്കും വികസന ആവശ്യങ്ങൾക്കും അനുസൃതമായി കൂടുതൽ പ്രവർത്തനങ്ങൾ ഏറ്റെടുക്കാനുള്ള സാധ്യതയാണ് ലഭിക്കുന്നത്.
ജലസുരക്ഷ, ഗ്രാമീണ അടിസ്ഥാനസൗകര്യ വികസനം, ഉപജീവനമാർഗങ്ങളുടെ ശക്തിപ്പെടുത്തൽ, ദുരന്തലഘൂകരണം എന്നീ നാല് പ്രധാന മേഖലകൾ കേന്ദ്രീകരിച്ചാണ് പദ്ധതിയുടെ പ്രവർത്തനങ്ങൾ ആസൂത്രണം ചെയ്തിരിക്കുന്നത്. ജലവിഭവങ്ങളുടെ സംരക്ഷണവും കാര്യക്ഷമമായ വിനിയോഗവും ഉറപ്പാക്കുന്നതിനുള്ള പ്രവർത്തനങ്ങൾ, ഗ്രാമീണ മേഖലകളിലെ അടിസ്ഥാനസൗകര്യങ്ങൾ മെച്ചപ്പെടുത്തുന്നതിനുള്ള നിർമാണങ്ങൾ, ജനങ്ങളുടെ വരുമാനസാധ്യതകൾ വർധിപ്പിക്കുന്ന ഉപജീവന പദ്ധതികൾ, പ്രകൃതിദുരന്തങ്ങളുടെ ആഘാതം കുറയ്ക്കുന്നതിനുള്ള പ്രതിരോധ പ്രവർത്തനങ്ങൾ എന്നിവയ്ക്ക് ഇതിലൂടെ പ്രാധാന്യം ലഭിക്കും.
പ്രാദേശിക വികസന ആവശ്യങ്ങൾക്കനുസരിച്ച് അനുയോജ്യമായ പ്രവൃത്തികൾ കണ്ടെത്തി നടപ്പാക്കുന്നതിലൂടെ ഗ്രാമീണ മേഖലകളിൽ കൂടുതൽ തൊഴിലവസരങ്ങൾ സൃഷ്ടിക്കാനും പൊതുആസ്തികളുടെ വികസനം സാധ്യമാക്കാനും കഴിയുമെന്നാണ് വിലയിരുത്തൽ. പദ്ധതിയുടെ ലക്ഷ്യങ്ങൾ കൈവരിക്കുന്നതിന് കൃത്യമായ ആസൂത്രണവും സമയബന്ധിതമായ നിർവഹണവും നിരന്തരമായ വിലയിരുത്തലും ആവശ്യമാണ്.
യോഗത്തിൽ തിരൂരങ്ങാടി താലൂക്കിലെ അക്രഡിറ്റഡ് എൻജിനീയർ ഇ.പി. സയ്യിദ് നിസാം പദ്ധതിയുടെ വിശദാംശങ്ങൾ അവതരിപ്പിച്ചു. പദ്ധതിയിൽ ഉൾപ്പെടുത്തിയിട്ടുള്ള വിവിധ പ്രവൃത്തികൾ, അവയുടെ സാങ്കേതിക വശങ്ങൾ, നടപ്പാക്കൽ സാധ്യതകൾ എന്നിവ സംബന്ധിച്ച് അദ്ദേഹം വിശദീകരിച്ചു.
വിബി-ജി റാം ജി പദ്ധതിയുടെ ജോയിന്റ് പ്രോഗ്രാം കോ-ഓർഡിനേറ്റർ ബി. ശ്രീബാഷ് ഉൾപ്പെടെയുള്ള ജില്ലാതല ഉദ്യോഗസ്ഥരും യോഗത്തിൽ പങ്കെടുത്തു. ഗ്രാമീണ വികസന പ്രവർത്തനങ്ങൾക്ക് കൂടുതൽ ഊർജം പകരുന്നതിനും പദ്ധതിയുടെ സാധ്യതകൾ ജില്ലയിൽ ഫലപ്രദമായി വിനിയോഗിക്കുന്നതിനുമുള്ള നടപടികൾക്ക് പ്രാധാന്യം നൽകണമെന്ന നിർദേശത്തോടെയാണ് അവലോകന യോഗം നടന്നത്.
