മുംബൈ: ലോകത്തെ അത്ഭുതപ്പെടുത്തുന്ന സാങ്കേതിക കണ്ടുപിടിത്തങ്ങളുമായി മുന്നേറുന്ന ശതകോടീശ്വരൻ ഇലോൺ മസ്കിന്റെ ‘പറക്കും കാർ’ എന്ന ആശയം ആയിരക്കണക്കിന് വർഷങ്ങൾക്ക് മുൻപേ ഇന്ത്യയിൽ ഉണ്ടായിരുന്നുവെന്ന പരാമർശവുമായി ബോളിവുഡ് താരം രൺബീർ കപൂർ. ഹിന്ദു പുരാണങ്ങളിൽ പരാമർശിക്കുന്ന പുഷ്പക വിമാനവുമായി ആധുനിക പറക്കും കാറുകളെ താരതമ്യം ചെയ്തുകൊണ്ടാണ് താരത്തിന്റെ പ്രതികരണം. രൺബീറിന്റെ വാക്കുകൾ സമൂഹമാധ്യമങ്ങളിൽ വലിയ ചർച്ചകൾക്കാണ് വഴിതുറന്നിരിക്കുന്നത്.
നിതേഷ് തിവാരിയുടെ സംവിധാനത്തിൽ ഒരുങ്ങുന്ന ബിഗ് ബജറ്റ് ചിത്രം ‘രാമായണ’യുടെ പ്രചാരണ പരിപാടിക്കിടെയാണ് രൺബീർ കപൂർ ശ്രദ്ധേയമായ പരാമർശം നടത്തിയത്. നവംബർ അഞ്ചിന് തിയറ്ററുകളിലെത്തുമെന്ന് പ്രഖ്യാപിച്ചിരിക്കുന്ന ചിത്രത്തിൽ ശ്രീരാമനായാണ് രൺബീർ വേഷമിടുന്നത്. ഇന്ത്യൻ ഇതിഹാസമായ രാമായണത്തെ ആസ്പദമാക്കി ഒരുക്കുന്ന ചിത്രത്തെക്കുറിച്ച് സംസാരിക്കുന്നതിനിടെയാണ് താരം പുരാണങ്ങളിലെ പുഷ്പക വിമാനത്തെയും ആധുനിക സാങ്കേതികവിദ്യയെയും ബന്ധപ്പെടുത്തി അഭിപ്രായം പ്രകടിപ്പിച്ചത്.
‘ഇലോൺ മസ്ക് അടുത്തിടെ പറക്കുന്ന കാറുകൾ കണ്ടുപിടിച്ചു. എന്നാൽ, ഇത്തരമൊരു സാങ്കേതികവിദ്യ ഇന്ത്യയിൽ 5,000 വർഷങ്ങൾക്ക് മുൻപുതന്നെ ഉണ്ടായിരുന്നുവെന്നാണ് എനിക്ക് തോന്നുന്നത്’ എന്നായിരുന്നു രൺബീറിന്റെ വാക്കുകൾ. രാമായണത്തിൽ പരാമർശിക്കുന്ന പുഷ്പക വിമാനത്തെ ഉദാഹരിച്ചുകൊണ്ടായിരുന്നു താരത്തിന്റെ വിശദീകരണം.
ഹിന്ദു പുരാണങ്ങളനുസരിച്ച് ദേവശിൽപിയായ വിശ്വകർമാവ് സൃഷ്ടികർത്താവായ ബ്രഹ്മാവിനുവേണ്ടി നിർമിച്ച അത്ഭുതകരമായ ആകാശവാഹനമാണ് പുഷ്പക വിമാനം. പിന്നീട് സമ്പത്തിന്റെ ദേവനായ കുബേരന്റെ കൈവശമെത്തിയ ഈ വിമാനം രാവണൻ സ്വന്തമാക്കിയതായാണ് പുരാണകഥകൾ വിവരിക്കുന്നത്. രാവണനെ വധിച്ചതിനുശേഷം ശ്രീരാമൻ സീതയ്ക്കും ലക്ഷ്മണനുമൊപ്പം അയോധ്യയിലേക്ക് മടങ്ങാൻ പുഷ്പക വിമാനം ഉപയോഗിച്ചതായും രാമായണത്തിൽ പരാമർശമുണ്ട്.
യാത്രക്കാരുടെ ആവശ്യാനുസരണം സഞ്ചരിക്കാനും ആകാശത്തിലൂടെ അതിവേഗം സഞ്ചരിക്കാനും കഴിയുന്ന അത്ഭുതവാഹനമായാണ് പുരാണങ്ങളിൽ പുഷ്പക വിമാനത്തെ വിശേഷിപ്പിക്കുന്നത്. എന്നാൽ, പുരാണങ്ങളിലെ ഈ വിവരണങ്ങൾ ചരിത്രപരമായി തെളിയിക്കപ്പെട്ട വ്യോമയാന സാങ്കേതികവിദ്യയുടെ തെളിവുകളല്ല. രൺബീറിന്റെ പരാമർശം പുരാണസങ്കൽപ്പങ്ങളെയും ആധുനിക സാങ്കേതിക മുന്നേറ്റങ്ങളെയും താരതമ്യം ചെയ്യുന്ന വ്യക്തിപരമായ അഭിപ്രായമായാണ് വിലയിരുത്തപ്പെടുന്നത്.
അതേസമയം, ഇലോൺ മസ്കിന്റെ നേതൃത്വത്തിലുള്ള ടെസ്‌ല വികസിപ്പിക്കുന്ന അടുത്ത തലമുറ റോഡ്സ്റ്റർ സൂപ്പർകാറിനെക്കുറിച്ചുള്ള വാർത്തകളും വാഹനപ്രേമികൾക്കിടയിൽ വലിയ കൗതുകമുണർത്തിയിട്ടുണ്ട്. അടുത്തിടെ വാഹനത്തിന്റെ പരിഷ്കരിച്ച പതിപ്പുമായി ബന്ധപ്പെട്ട ദൃശ്യങ്ങൾ പുറത്തുവന്നതായി റിപ്പോർട്ടുകളുണ്ടായിരുന്നു. ഒക്ടോബർ 15ന് ടെക്സാസിലെ മക്ഗ്രെഗറിലുള്ള സ്പേസ് എക്സ് കേന്ദ്രത്തിൽ വാഹനം അഭ്യാസപ്രകടനങ്ങൾ നടത്തുന്ന ദൃശ്യങ്ങൾ പുറത്തുവന്നതായും പ്രചരിച്ചിരുന്നു. എന്നാൽ, റോഡ്സ്റ്ററിന് യഥാർഥത്തിൽ പറക്കാനുള്ള ശേഷിയുണ്ടെന്നോ ഇത്തരമൊരു സാങ്കേതികവിദ്യ വിജയകരമായി അവതരിപ്പിച്ചെന്നോ സ്വതന്ത്രമായി സ്ഥിരീകരിച്ച വിവരങ്ങളില്ല.
ഇതിനിടെയാണ് മസ്കിന്റെ സാങ്കേതിക സ്വപ്നങ്ങളെ പുരാണങ്ങളിലെ പുഷ്പക വിമാനവുമായി ബന്ധപ്പെടുത്തി രൺബീർ നടത്തിയ പരാമർശം ശ്രദ്ധനേടുന്നത്. താരത്തിന്റെ അഭിപ്രായത്തെ അനുകൂലിച്ചും വിമർശിച്ചും സമൂഹമാധ്യമങ്ങളിൽ പ്രതികരണങ്ങൾ ഉയരുന്നുണ്ട്.
ഇന്ത്യൻ സിനിമയിലെ വമ്പൻ പ്രോജക്ടുകളിലൊന്നായി വിലയിരുത്തപ്പെടുന്ന ‘രാമായണ’യിൽ രൺബീർ കപൂറിനൊപ്പം കന്നഡ സൂപ്പർ താരം യഷ് രാവണനായും സായ് പല്ലവി സീതയായും വേഷമിടുന്നു. വൻ മുതൽമുടക്കിൽ അത്യാധുനിക വിഷ്വൽ ഇഫക്ട്സിന്റെ സഹായത്തോടെ ഒരുങ്ങുന്ന ചിത്രം പുരാണകഥയുടെ ദൃശ്യാവിഷ്കരണത്തിലൂടെ പ്രേക്ഷകർക്ക് വ്യത്യസ്തമായ സിനിമാനുഭവം സമ്മാനിക്കുമെന്നാണ് അണിയറ പ്രവർത്തകരുടെ പ്രതീക്ഷ.
