ന്യൂഡൽഹി: 2002ലെ ഗോധ്ര ട്രെയിൻ കത്തിക്കൽ കേസിലെ മൂന്ന് പ്രതികളുടെ ജാമ്യാപേക്ഷ സുപ്രീം കോടതി തള്ളി.
ചീഫ് ജസ്റ്റിസ് ഡി വൈ ചന്ദ്രചൂഡ്, ജസ്റ്റിസുമാരായ ജെ ബി പർദിവാല, മനോജ് മിശ്ര എന്നിവരടങ്ങുന്ന ബെഞ്ചാണ് പ്രതികള്‍ നല്‍കിയ പ്രത്യേക ഹര്‍ജി പരിഗണിച്ച് ഇളവ് നിഷേധിക്കുകയും അവരുടെ അപ്പീൽ സുപ്രീം കോടതി തീർപ്പാക്കുന്നതുവരെ ജാമ്യം തേടിയുള്ള അപേക്ഷകൾ തള്ളുകയും ചെയ്തു.
ഇവരിൽ ആർക്കും വധശിക്ഷ ലഭിച്ചിട്ടില്ലെന്നും കല്ലെറിഞ്ഞ കുറ്റത്തിന് മൂന്നുപേരിൽ രണ്ടുപേർ ജീവപര്യന്തം തടവ് അനുഭവിക്കുകയാണെന്നും കുറ്റവാളികൾക്കായി ഹാജരായ മുതിർന്ന അഭിഭാഷകൻ സഞ്ജയ് ഹെഡ്‌ഗെ വാദിച്ചു. കൂടാതെ, സ്വർണാഭരണങ്ങൾ കവർന്ന കേസിൽ ഒരു പ്രതി 17.5 വർഷത്തിലേറെയായി കസ്റ്റഡിയിലാണെന്നും ഇയാളിൽ നിന്ന് ആഭരണങ്ങളൊന്നും കണ്ടെടുത്തിട്ടില്ലെന്നും അദ്ദേഹം കോടതിയെ അറിയിച്ചു.
ഗുജറാത്ത് സർക്കാരിനെ പ്രതിനിധീകരിച്ച് സോളിസിറ്റർ ജനറൽ തുഷാർ മേത്ത, വിചാരണ കോടതിയുടെ ഉത്തരവിൽ പറഞ്ഞിരിക്കുന്ന അവരുടെ പ്രത്യേക പങ്ക് പരാമർശിക്കവെ ഹർജികളെ എതിർത്തു.
“മൂന്ന് അപ്പീലുകളുടെ (സൗക്കത്ത് യൂസഫ് ഇസ്മായിൽ മോഹൻ, സിദ്ദിക് @ മാതുംഗ അബ്ദുല്ല ബാദം ഷെയ്ഖ്, ബിലാൽ അബ്ദുല്ല ഇസ്മായിൽ ബദം ഗഞ്ചി) പ്രത്യേക പങ്ക് കണക്കിലെടുക്കുമ്പോൾ, ഈ ഘട്ടത്തിൽ, അവരെ ജാമ്യത്തിൽ വിടാന്‍ ഞങ്ങൾ ആഗ്രഹിക്കുന്നില്ല,” ബെഞ്ച് ഉത്തരവിട്ടു.
വിട്ടയക്കാനുള്ള അവരുടെ അപേക്ഷ തള്ളുന്നത് സുപ്രീം കോടതിയിൽ നിലനിൽക്കുന്ന അവരുടെ അപ്പീലിന്റെ മെറിറ്റിനെ മുൻവിധികളാക്കില്ലെന്ന് വ്യക്തമാക്കി.
ഒരു ബെഞ്ച് രൂപീകരിക്കുന്നതിനുള്ള ഭരണപരമായ ഉത്തരവുകൾ താൻ പാസാക്കുമെന്നും അപ്പീൽ വേഗത്തിൽ കേൾക്കുന്നതിന് ആ ബെഞ്ചിന് മുമ്പാകെ അപേക്ഷിക്കാൻ കക്ഷികൾക്ക് സ്വാതന്ത്ര്യമുണ്ടെന്നും വിചാരണയുടെ അവസാനം ചീഫ് ജസ്റ്റിസ് ചന്ദ്രചൂഡ് പറഞ്ഞു.
ഈ വർഷം ഏപ്രിലിൽ എട്ട് പ്രതികൾക്ക് സുപ്രീം കോടതി ജാമ്യം അനുവദിക്കുകയും നാല് പ്രതികളുടെ ജാമ്യം തള്ളുകയും ചെയ്തിരുന്നു.
2002 ഫെബ്രുവരിയിൽ ഗുജറാത്തിലെ ഗോധ്രയിൽ ട്രെയിനിന്റെ ഒരു കോച്ച് കത്തിച്ച് 59 പേർ കൊല്ലപ്പെട്ടു, ഇത് സംസ്ഥാനത്ത് കലാപത്തിന് കാരണമായി.
11 പ്രതികളുടെ വധശിക്ഷ ജീവപര്യന്തമാക്കി കുറച്ച ഗുജറാത്ത് ഹൈക്കോടതി വിധിക്കെതിരെ ഗുജറാത്ത് സർക്കാർ സുപ്രീം കോടതിയെ സമീപിച്ചിരുന്നു. കൂടാതെ, കേസിലെ ശിക്ഷ ശരിവച്ച ഹൈക്കോടതി ഉത്തരവിനെതിരെ നിരവധി പ്രതികൾ രംഗത്തെത്തിയിട്ടുണ്ട്.
2011 മാർച്ചിൽ വിചാരണക്കോടതി 31 പേർ കുറ്റക്കാരാണെന്ന് കണ്ടെത്തിയിരുന്നു, അതിൽ 11 പേർക്ക് വധശിക്ഷയും ബാക്കി 20 പേർക്ക് ജീവപര്യന്തവും വിധിച്ചു. ആകെ 63 പ്രതികളെ വെറുതെ വിട്ടു. 2017 ഒക്ടോബറിൽ, ഗുജറാത്ത് ഹൈക്കോടതി എല്ലാവരുടെയും ശിക്ഷ ശരിവച്ചെങ്കിലും 11 പേരുടെ വധശിക്ഷ ജീവപര്യന്തമായി കുറച്ചു.
