ലണ്ടൻ: രാജകുമാരിയുടെ ആരോഗ്യത്തെക്കുറിച്ചുള്ള ആശങ്കകളും ഊഹാപോഹങ്ങളും ശമിപ്പിക്കാൻ ഉദ്ദേശിച്ചുള്ള തൻ്റെ കുട്ടികൾക്കൊപ്പമുള്ള, കൊട്ടാരം പുറത്തുവിട്ട കുടുംബ ഫോട്ടോ എഡിറ്റ് ചെയ്തതുമൂലമുണ്ടായ ആശയക്കുഴപ്പത്തിന് വെയിൽസ് രാജകുമാരി കേറ്റ് തിങ്കളാഴ്ച ക്ഷമാപണം നടത്തി. നിരവധി മാധ്യമങ്ങള്‍ ഡിജിറ്റൽ കൃത്രിമത്വത്തെക്കുറിച്ചുള്ള ആശങ്കകൾ കാരണം ചിത്രം പിൻവലിച്ചു.
“പല അമേച്വർ ഫോട്ടോഗ്രാഫർമാരെയും പോലെ, ഞാൻ ഇടയ്ക്കിടെ എഡിറ്റിംഗിൽ പരീക്ഷണം നടത്താറുണ്ട്. ഞങ്ങൾ ഇന്നലെ പങ്കിട്ട കുടുംബ ഫോട്ടോയിൽ എന്തെങ്കിലും ആശയക്കുഴപ്പം ഉണ്ടായതിൽ ഞാൻ ക്ഷമ ചോദിക്കുന്നു,” സോഷ്യൽ മീഡിയയിലെ ഒരു പോസ്റ്റിൽ കേറ്റ് പറയുന്നു.
വില്യം രാജകുമാരനാണ് ഫോട്ടോ എടുത്തതെന്ന് കൊട്ടാരം അറിയിച്ചു. ബ്രിട്ടനിലെ മാതൃദിനം പ്രമാണിച്ച് ഞായറാഴ്ചയാണ് കെൻസിംഗ്ടൺ പാലസ് ചിത്രം പുറത്തിറക്കിയത്. ഏകദേശം രണ്ട് മാസം മുമ്പ് വയറിലെ ശസ്ത്രക്രിയയ്ക്ക് ശേഷം കേറ്റിൻ്റെ ആദ്യത്തെ ഔദ്യോഗിക ഫോട്ടോയാണിത്.
