തിരുവനന്തപുരം ലോക്സഭാ മണ്ഡലത്തിൽ നാമനിർദ്ദേശ പത്രിക സമർപ്പിക്കുമ്പോൾ കേന്ദ്രമന്ത്രിയും ബിജെപി സ്ഥാനാർത്ഥിയുമായ രാജീവ് ചന്ദ്രശേഖർ സമർപ്പിച്ച സത്യവാങ്മൂലത്തിൽ നൽകിയിട്ടുള്ള വിവരങ്ങളിൽ എന്തെങ്കിലും പൊരുത്തക്കേട് ഉണ്ടോയെന്ന് പരിശോധിക്കാൻ കേന്ദ്ര പ്രത്യക്ഷ നികുതി ബോർഡിനോട് (CBDT) തിരഞ്ഞെടുപ്പ് കമ്മീഷൻ (ഇസി) ആവശ്യപ്പെട്ടു.
ചന്ദ്രശേഖർ സമർപ്പിച്ച സത്യവാങ്മൂലത്തിൽ പൊരുത്തക്കേട് ആരോപിച്ച് കോൺഗ്രസ് നൽകിയ പരാതിയെ തുടർന്നാണ് നടപടി.
രാജീവ് ചന്ദ്രശേഖർ തിരഞ്ഞെടുപ്പ് സത്യവാങ്മൂലത്തിൽ വസ്‌തുതകൾ തെറ്റായി അവതരിപ്പിച്ചുവെന്ന് യു.ഡി.എഫിന് പിന്നാലെ എൽ.ഡി.എഫും ആരോപിച്ചു.
സമർപ്പിച്ച വിവരമനുസരിച്ച്, മന്ത്രിയുടെ നികുതി വിധേയമായ വരുമാനം 2018-19 സാമ്പത്തിക വർഷത്തിൽ 10.83 കോടി രൂപയിൽ നിന്ന് 2022-23 ൽ ഏകദേശം 5.59 ലക്ഷമായി കുറഞ്ഞു. കഴിഞ്ഞ അഞ്ച് സാമ്പത്തിക വർഷങ്ങളിൽ 2018-19ൽ 10.8 കോടി രൂപയും 2019-20ൽ 4.48 കോടി രൂപയും 2020-21ൽ 17.51 ലക്ഷം രൂപയും 2021-22ൽ 680 രൂപയും 2022-23ൽ 5.59 ലക്ഷം രൂപയുമാണ് വരുമാനമായി കാണിച്ചിട്ടുള്ളത്.
നടപടിക്രമങ്ങൾ അനുസരിച്ച്, കേന്ദ്രമന്ത്രി സമർപ്പിച്ച സത്യവാങ്മൂല വിശദാംശങ്ങളിൽ എന്തെങ്കിലും പൊരുത്തക്കേട് ഉണ്ടോയെന്ന് പരിശോധിക്കാൻ CBDT യോട് ഇസി നിർദ്ദേശിച്ചതായി വൃത്തങ്ങൾ അറിയിച്ചു.
മുൻ രാജ്യസഭാ എംപി കൂടിയായ ചന്ദ്രശേഖർ വ്യാഴാഴ്ചയാണ് പത്രിക സമർപ്പിച്ചത് . തിരുവനന്തപുരത്ത് കോൺഗ്രസിൻ്റെ ശശി തരൂരിനെതിരെയാണ് അദ്ദേഹം മത്സരിക്കുന്നത്. സിപിഐ എം നേതൃത്വത്തിലുള്ള ഇടതുപക്ഷ ജനാധിപത്യ മുന്നണി സിപിഐ നേതാവ് പന്ന്യൻ രവീന്ദ്രനും മത്സരിക്കുന്ന മണ്ഡലത്തില്‍ ത്രികോണ മത്സരമാണ്.
കേരളത്തിൽ ഏപ്രിൽ 26 നാണ് പോളിംഗ് നടക്കുന്നത്. എല്ലാവരും ഉറ്റുനോക്കുന്ന പോരാട്ടങ്ങളിലൊന്നായിരിക്കും ഇവിടത്തേത്.
1951ലെ ജനപ്രാതിനിധ്യ നിയമത്തിലെ സെക്ഷൻ 125 എ പ്രകാരമാണ് സത്യവാങ്മൂലത്തിലെ പൊരുത്തക്കേടും കൃത്രിമത്വവും കൈകാര്യം ചെയ്യുന്നത്. നിയമമനുസരിച്ച്, നാമനിർദ്ദേശ പത്രികകളിലോ സത്യവാങ്മൂലങ്ങളിലോ എന്തെങ്കിലും വിവരങ്ങൾ മറച്ചുവെക്കുന്നത് ആറ് മാസം വരെ തടവ് ശിക്ഷ ലഭിക്കാവുന്ന കുറ്റമാണ്. അല്ലെങ്കിൽ പിഴ, അല്ലെങ്കിൽ ഇവ രണ്ടും ലഭിക്കും.
