കൊച്ചി: ഈരാറ്റുപേട്ട പോലീസ് രജിസ്റ്റർ ചെയ്ത വിദ്വേഷ പ്രസംഗ കേസിൽ ബിജെപി നേതാവ് പി സി ജോർജ് സമർപ്പിച്ച മുൻകൂർ ജാമ്യാപേക്ഷ വെള്ളിയാഴ്ച (ഫെബ്രുവരി 21, 2025) കേരള ഹൈക്കോടതി തള്ളി.
ഭാരതീയ ന്യായ സംഹിത (ബിഎൻഎസ്) സെക്‌ഷന്‍ 196(1)(എ) (മതത്തിന്റെ അടിസ്ഥാനത്തിൽ വ്യത്യസ്ത വിഭാഗങ്ങൾക്കിടയിൽ ശത്രുത വളർത്തൽ), 299 (ഏതെങ്കിലും വിഭാഗത്തിന്റെ മതവികാരങ്ങളെയോ മതവിശ്വാസങ്ങളെയോ അപമാനിച്ചുകൊണ്ട് അവരുടെ മതവികാരങ്ങളെ പ്രകോപിപ്പിക്കാൻ ഉദ്ദേശിച്ചുള്ള മനഃപൂർവവും ദ്രോഹപരവുമായ പ്രവൃത്തികൾ), കേരള പോലീസ് ആക്ടിലെ സെക്‌ഷന്‍ 120 (ഒ) (ശല്യമുണ്ടാക്കുന്നതിനും പൊതു ക്രമം ലംഘിക്കുന്നതിനും ശിക്ഷ) എന്നിവ പ്രകാരമുള്ള കുറ്റങ്ങൾക്കാണ് ജോർജിനെതിരെ കേസ് രജിസ്റ്റർ ചെയ്തത്.
സമാനമായ സ്വഭാവമുള്ള നാല് മുൻ കേസുകളിൽ മജിസ്‌ട്രേറ്റ് കോടതിയും ഹൈക്കോടതിയും നിശ്ചയിച്ച ജാമ്യ വ്യവസ്ഥ അദ്ദേഹം നഗ്നമായി ലംഘിച്ചതിനാൽ അദ്ദേഹത്തിന് മുൻകൂർ ജാമ്യം ലഭിക്കാൻ അർഹതയില്ലെന്നാണ് ജോർജിന്റെ ഹർജിയെ എതിർത്ത് പബ്ലിക് പ്രോസിക്യൂട്ടർ വാദിച്ചത്. നേരത്തെ രജിസ്റ്റർ ചെയ്ത കേസിൽ ജാമ്യം ലഭിച്ചപ്പോൾ അത്തരം പരാമർശങ്ങൾ നടത്തുന്നതിനെതിരെ കോടതികൾ ഏർപ്പെടുത്തിയ വ്യവസ്ഥ ജോർജ്ജ് ലംഘിച്ചതായും പബ്ലിക് പ്രൊസിക്യൂട്ടര്‍ ചൂണ്ടിക്കാട്ടി.
കോട്ടയം സെഷൻസ് കോടതി നേരത്തെ അദ്ദേഹത്തിന്റെ മുൻകൂർ ജാമ്യാപേക്ഷ തള്ളിയിരുന്നു. ഇത് ഒരു തെറ്റായ പരാമർശമാണെന്ന് ജോർജ്ജ് തന്റെ ഹർജിയിൽ പറഞ്ഞു. ഒരു ചാനൽ ചർച്ചയ്ക്കിടെയുള്ള ചൂടേറിയ പ്രസ്താവനയിലാണ് അദ്ദേഹം ഇക്കാര്യം പറഞ്ഞത്, തന്റെ സോഷ്യൽ മീഡിയ അക്കൗണ്ടിലെ അഭിപ്രായങ്ങൾക്ക് അദ്ദേഹം ക്ഷമാപണം നടത്തി. ഏതെങ്കിലും മതവികാരം വ്രണപ്പെടുത്താൻ മനഃപൂർവം ഉദ്ദേശിച്ചിരുന്നില്ലെന്നും ജോര്‍ജ് പറഞ്ഞു.
നേരത്തെ രജിസ്റ്റർ ചെയ്ത വിദ്വേഷ പ്രസംഗ കേസുകളിൽ ഹൈക്കോടതിയുടെയും മജിസ്‌ട്രേറ്റ് കോടതിയുടെയും ജാമ്യ വ്യവസ്ഥകൾ ലംഘിച്ചതിനും ജാമ്യ വ്യവസ്ഥകൾ ലംഘിച്ച് അത്തരം പരാമർശങ്ങൾ ആവർത്തിച്ചതിനും ജാമ്യാപേക്ഷ പരിഗണിക്കുന്നതിനിടെ ഹൈക്കോടതി ജോർജിനെ രൂക്ഷമായി വിമർശിച്ചിരുന്നു.
