പാക്കിസ്താനില്‍ ലിബറേഷൻ ആർമി (ബിഎൽഎ) ജാഫർ എക്സ്പ്രസ് ട്രെയിൻ ഹൈജാക്ക് ചെയ്തതിനെ തുടർന്ന് വീണ്ടും അക്രമം പൊട്ടിപ്പുറപ്പെട്ടു. ഈ ട്രെയിനിൽ 450-ലധികം യാത്രക്കാർ ഉണ്ടായിരുന്നു. ബലൂചിസ്ഥാനിലെ ബോളാൻ ജില്ലയിലെ മസ്‌കഫ് പ്രദേശത്താണ് ആക്രമണം നടന്നത്. ട്രെയിൻ ഒരു തുരങ്കത്തിലേക്ക് പ്രവേശിക്കവേ അക്രമികൾ ട്രാക്കിൽ ഒരു ബോംബ് വെച്ച് തകര്‍ത്തു. തുടര്‍ന്ന് ട്രെയിൻ നിർത്തിയതോടെ അവർ ട്രെയിൻ എഞ്ചിന് നേരെ വെടിയുതിർത്തു, ഡ്രൈവർക്ക് പരിക്കേറ്റു.
ട്രെയിൻ ആക്രമണത്തിന് ശേഷം, ബിഎൽഎ ഒരു പ്രസ്താവന പുറത്തിറക്കി. അവർക്കെതിരെ എന്തെങ്കിലും സൈനിക നടപടി സ്വീകരിച്ചാൽ, എല്ലാ ബന്ദികളെയും കൊല്ലുമെന്ന് അവർ മുന്നറിയിപ്പ് നൽകി. സംഭവത്തെത്തുടർന്ന് പാക്കിസ്താന്‍ സുരക്ഷാ സേനയെ പ്രദേശത്തേക്ക് അയച്ചു. മലയോര പ്രദേശത്തേക്ക് സുരക്ഷാ സേനയെ അയയ്ക്കാനുള്ള ശ്രമങ്ങൾ നടന്നുവരികയാണെന്ന് ബലൂചിസ്ഥാൻ ഭരണകൂട വക്താവ് ഷാഹിദ് റിൻഡ് പറഞ്ഞു. രാവിലെ 9 മണിക്ക് ക്വെറ്റയിൽ നിന്ന് പുറപ്പെട്ട ജാഫർ എക്സ്പ്രസ് എട്ടാം നമ്പർ തുരങ്കത്തിലെ സ്ഫോടനത്തെ തുടർന്ന് നിർത്തി.
ജാഫർ എക്സ്പ്രസ് ക്വറ്റയ്ക്കും പെഷവാറിനുമിടയിൽ ദിവസവും സര്‍‌വീസ് നടത്തുന്ന ട്രെയിന്‍ ആണ്. ഈ ട്രെയിൻ ഹൈജാക്ക് ചെയ്തതിനുശേഷം, ബിഎൽഎ 100 ലധികം പാക്കിസ്താന്‍ സൈനികരെ ബന്ദികളാക്കി ആറ് സൈനികരെ വധിച്ചു. എന്തെങ്കിലും സൈനിക നടപടി സ്വീകരിച്ചാൽ, മറ്റെല്ലാ ബന്ദികൾക്കും ജീവൻ നഷ്ടപ്പെടുമെന്ന് അവർ ഭീഷണിപ്പെടുത്തി.
ബലൂചിസ്ഥാനിൽ വളരെക്കാലമായി പാക്കിസ്താന്‍ വിരുദ്ധ പ്രസ്ഥാനം നടക്കുന്നുണ്ടെന്നും ഈ സംഭവം അതിന്റെ ഭാഗമാണെന്നും പാക് മാധ്യമ പ്രവര്‍ത്തകര്‍ പറഞ്ഞു. പാകിസ്ഥാൻ സുരക്ഷാ സേന അടുത്തിടെ ചില ഭീകരരെ അറസ്റ്റ് ചെയ്തിട്ടുണ്ടെന്നും എന്നാൽ ചില ഘടകങ്ങൾ സമാധാനം ആഗ്രഹിക്കുന്നില്ലെന്ന് ഈ സംഭവം തെളിയിക്കുന്നുവെന്നും അവര്‍ പറഞ്ഞു. എന്നാല്‍, ഭീകരത പ്രചരിപ്പിക്കാനുള്ള തന്ത്രത്തിന്റെ ഭാഗമായതിനാൽ പാകിസ്ഥാൻ സർക്കാർ ബി‌എൽ‌എയുമായി ചർച്ച നടത്തുമെന്ന് പ്രതീക്ഷിക്കുന്നില്ലെന്നും അദ്ദേഹം പറഞ്ഞു.
ബലൂച് ലിബറേഷൻ ആർമി (BLA) പാകിസ്ഥാനിലെ ഒരു തീവ്രവാദ വിഘടനവാദ ഗ്രൂപ്പാണ്. ഈ ആക്രമണത്തിന്റെ ഉത്തരവാദിത്തം അവര്‍ ഏറ്റെടുത്തു. സുരക്ഷാ ഉദ്യോഗസ്ഥർ ഉൾപ്പെടെ നിരവധി പേരെ ട്രെയിനിൽ നിന്ന് ബന്ദികളാക്കിയതായി ബിഎൽഎ ഒരു പ്രസ്താവനയിൽ അവകാശപ്പെട്ടു.
