ന്യൂഡൽഹി : ഡൽഹി മുഖ്യമന്ത്രി രേഖ ഗുപ്ത രോഹിണിയിലെ ആശാ കിരൺ ഷെൽട്ടർ ഹോമിലെ കുട്ടികളോടൊപ്പം വ്യാഴാഴ്ച ഹോളി ആഘോഷിക്കുകയും ആശംസകൾ നേരുകയും ചെയ്തു.
“ഇന്ന് ഞാൻ ആശ കിരണിന്റെ കുട്ടികളോടൊപ്പം ഹോളി ആഘോഷിച്ചു, അത് വളരെ മനോഹരമായി തോന്നി. കുട്ടികൾ വളരെ സന്തോഷത്തിലായിരുന്നു” എന്ന് അവര്‍ പറഞ്ഞു.
സന്ദർശന വേളയിൽ മുഖ്യമന്ത്രി ഷെൽട്ടർ ഹോമിലെ ജീവിത സാഹചര്യങ്ങളും പരിശോധിച്ചു . മെച്ചപ്പെടുത്തേണ്ട മേഖലകൾ അവർ ശ്രദ്ധിക്കുകയും അവ പരിഹരിക്കാൻ ബന്ധപ്പെട്ട അധികാരികളെ അറിയിക്കുമെന്ന് ഉറപ്പു നൽകുകയും ചെയ്തു .
“അവർ ഇവിടെ എങ്ങനെ ജീവിക്കുന്നുവെന്ന് മനസ്സിലാക്കാനും സിസ്റ്റത്തിലെ എന്തെങ്കിലും പോരായ്മകൾ തിരിച്ചറിയാനും ഞാൻ ആഗ്രഹിച്ചു. മെച്ചപ്പെടുത്തേണ്ട മേഖലകൾ ഞാൻ ശ്രദ്ധിക്കുകയും അവ പരിഹരിക്കാൻ ബന്ധപ്പെട്ട അധികാരികളെ അറിയിക്കുകയും ചെയ്തിട്ടുണ്ട്,” അവർ പറഞ്ഞു.
ഷെൽട്ടർ ഹോം എല്ലായ്‌പ്പോഴും നന്നായി പരിപാലിക്കപ്പെടുന്നുണ്ടെന്ന് ഉറപ്പാക്കാൻ ഭാവിയിൽ മുൻകൂട്ടി അറിയിക്കാത്ത സന്ദർശനങ്ങൾ നടത്തുമെന്ന് മുഖ്യമന്ത്രി പറഞ്ഞു.
“ഇന്നത്തെ സന്ദർശനം മുൻകൂട്ടി നിശ്ചയിച്ചിരുന്നതാണെങ്കിലും, അടുത്ത തവണ ഞാൻ മുൻകൂട്ടി അറിയിക്കാതെയായിരിക്കും എത്തുക, ഇന്നത്തെ പോലെ കാര്യങ്ങൾ നന്നായി പരിപാലിക്കപ്പെടുമെന്ന് ഞാൻ പ്രതീക്ഷിക്കുന്നു,” അവർ ഊന്നിപ്പറഞ്ഞു.
മുഖ്യമന്ത്രി ഗുപ്ത കുട്ടികളുമായി നേരിട്ട് ഇടപഴകുകയും അവരുടെ ക്ഷേമം നിരീക്ഷിക്കുകയും ചെയ്തു. പ്രത്യേകിച്ച് വികലാംഗർക്കും ഭിന്നശേഷിക്കാർക്കും മെച്ചപ്പെട്ട സൗകര്യങ്ങൾ ആവശ്യമാണെന്ന് അവർ പറഞ്ഞു.
“അവർക്ക് തങ്ങളെക്കുറിച്ച് കൂടുതൽ പങ്കുവെക്കാൻ കഴിഞ്ഞില്ലെങ്കിലും, അവരുടെ മുഖത്ത് ഒരു സമാധാനം എനിക്ക് ഇപ്പോള്‍ കാണാൻ കഴിഞ്ഞു. ഞാൻ ഇത് തുടർന്നും നിരീക്ഷണത്തിലാക്കുകയും പതിവായി സന്ദർശിക്കുകയും ചെയ്യും,” മുഖ്യമന്ത്രി ഉറപ്പു നൽകി. ആവശ്യക്കാരായ കൂടുതൽ കുട്ടികളെ ഉൾക്കൊള്ളുന്നതിനായി ഷെൽട്ടർ ഹോമിന്റെ താമസസ്ഥലം വികസിപ്പിക്കുമെന്നും അവര്‍ പറഞ്ഞു.
എല്ലാ ഡൽഹി നിവാസികൾക്കും ഹോളി ആശംസകൾ നേർന്നുകൊണ്ട് , ജലം സംരക്ഷിച്ചും പ്രകൃതിദത്ത നിറങ്ങൾ ഉപയോഗിച്ചും ഉത്തരവാദിത്തത്തോടെ ആഘോഷിക്കാൻ മുഖ്യമന്ത്രി ഗുപ്ത പൗരന്മാരോട് അഭ്യർത്ഥിച്ചു .
“എല്ലാ ഡൽഹി നിവാസികൾക്കും എന്റെ ഹൃദയം നിറഞ്ഞ ഹോളി ആശംസകൾ. ഈ ഹോളി സുരക്ഷിതമാകട്ടെ, പ്രകൃതിദത്ത നിറങ്ങൾ ഉപയോഗിച്ച് കളിച്ച് വെള്ളം പാഴാക്കുന്നത് ഒഴിവാക്കാം. ഡൽഹിയെ മനോഹരവും വൃത്തിയുള്ളതുമായി നിലനിർത്തുന്നത് നമ്മുടെ പൊതുവായ ഉത്തരവാദിത്തമാണ്,” അവർ പറഞ്ഞു.
