താലിബാൻ അഫ്ഗാനിസ്ഥാൻ പിടിച്ചെടുത്തതിനുശേഷം, ജാവലിൻ മിസൈലുകളും ഡ്രോൺ ആക്രമണങ്ങളും ഉപയോഗിച്ച് പാക്കിസ്താന് സൈന്യത്തിനെതിരെ പുതിയ ആക്രമണം നടത്താൻ ടിടിപി പദ്ധതിയിട്ടിട്ടുണ്ടെന്ന് റിപ്പോര്‍ട്ട്. അത്തരമൊരു അവകാശവാദം ഉന്നയിക്കുന്ന രണ്ട് വീഡിയോകളും പുറത്തു വന്നിട്ടുണ്ട്. ഈ അപകടകരമായ അമേരിക്കൻ ആയുധങ്ങൾ താലിബാൻ പിടിച്ചെടുത്തത് പാക്കിസ്താന്റെ സുരക്ഷയ്ക്ക് ഗുരുതരമായ ഭീഷണിയാണ്.
ഇസ്ലാമാബാദ്: താലിബാൻ അഫ്ഗാനിസ്ഥാൻ പിടിച്ചെടുത്തതിനുശേഷം, ഇത് തങ്ങൾക്ക് ആശ്വാസത്തിന്റെ സമയമാണെന്ന പാക്കിസ്താന് സൈന്യത്തിന്റെ ആത്മവിശ്വാസത്തിന് ഘടകവിരുദ്ധമായി അവര്‍ക്ക് പുതിയ ഭീഷണി ഉയര്‍ന്നു വന്നിരിക്കുകയാണ്. താലിബാനെ കൂട്ടുപിടിച്ച് പാക്കിസ്താന് ഭീകര സംഘടനകളുമായി സം‌യോജിച്ച് തങ്ങളുടെ സാമ്രാജ്യം വിപുലപ്പെടുത്താമെന്ന വ്യാമോഹത്തിനാണ് ഇപ്പോള്‍ തിരിച്ചടി നേരിട്ടിരിക്കുന്നത്.
പാക്കിസ്താന് സൈന്യത്തിനെതിരെ ഒരു വലിയ ആക്രമണം നടത്താൻ താലിബാന്‍ പദ്ധതിയിടുന്നതായി അവകാശപ്പെടുന്ന രണ്ട് പുതിയ വീഡിയോകൾ തെഹ്രീക്-ഇ-താലിബാൻ പാകിസ്ഥാൻ (ടിടിപി) പുറത്തുവിട്ടു. ഈ ടിടിപി വീഡിയോകളിൽ അമേരിക്കന്‍ നിര്‍മ്മിത ജാവലിൻ മിസൈലുകളുടെയും ഡ്രോൺ ആക്രമണങ്ങളുടെയും സാന്നിധ്യം പാക് സുരക്ഷാ ഏജൻസികളെ ആശങ്കാകുലരാക്കിയിട്ടുണ്ട്.
ടിടിപി പുറത്തുവിട്ട വീഡിയോയിൽ, തീവ്രവാദികൾ ജാവലിൻ മിസൈൽ ഉപയോഗിക്കാൻ പരിശീലനം നടത്തുന്നത് കാണാം. ഈ മിസൈൽ അഫ്ഗാനിസ്ഥാനിൽ യുഎസ് സൈന്യം ഉപയോഗിച്ചിരുന്നു. എന്നാല്‍, അഫ്ഗാനിസ്ഥാന്‍ താലിബാന്റെ നിയന്ത്രണത്തിലായതിനുശേഷം, ഈ അപകടകരമായ മിസൈൽ ഇപ്പോൾ ടിടിപിയുടെ കൈകളിൽ എത്തിയിരിക്കുകയാണ്. ഈ മിസൈലിന്റെ വില ഏകദേശം 2 ലക്ഷം ഡോളറാണ്, തോളിൽ വഹിക്കാൻ കഴിയുമെന്നു മാത്രമല്ല, ലക്ഷ്യം തെറ്റാതെ അത് പതിക്കുമെന്നതാണ് ഇതിന്റെ പ്രത്യേകത. അതായത് മിസൈൽ ഒരിക്കൽ തൊടുത്തുവിട്ടാൽ പിന്നെ അത് ട്രാക്ക് ചെയ്യേണ്ട ആവശ്യമില്ല. ശത്രുവിന്റെ ഏത് ടാങ്കിനെയും കവചിത വാഹനത്തെയും തകർക്കാൻ ഈ മിസൈലിന് കഴിയും.
താലിബാന്റെ കൈവശം 100-ലധികം ജാവലിൻ മിസൈലുകൾ ഉണ്ടെന്ന വിവരം പുറത്തുവന്നിട്ടുണ്ട്. 100-ലധികം ജാവലിൻ മിസൈലുകളുടെ വലിയൊരു ശേഖരം താലിബാന്റെ കൈവശമുണ്ടെന്ന് റഷ്യൻ പ്രതിരോധ മന്ത്രാലയം വെളിപ്പെടുത്തി. പാക്കിസ്താനിൽ ജാവലിൻ മിസൈലുകളുടെ സാന്നിധ്യത്തിന് വ്യക്തമായ തെളിവുകളൊന്നുമില്ലെന്നും എന്നാൽ ഇത് തീർച്ചയായും ഗുരുതരമായ ആശങ്കാജനകമാണെന്നും ഒരു പാക്കിസ്താന് സുരക്ഷാ ഉദ്യോഗസ്ഥൻ ഒരു അഭിമുഖത്തിൽ പറഞ്ഞു. തീവ്രവാദികൾക്ക് വേണമെങ്കിൽ, പാക്കിസ്താനിലെ ഏത് പ്രദേശത്തും ഈ മിസൈലുകൾ ഉപയോഗിക്കാമെന്ന് അദ്ദേഹം പറഞ്ഞു.
താലിബാൻ സൈന്യം അമേരിക്കൻ ആയുധങ്ങൾ പൂർണ്ണമായും പിടിച്ചെടുത്തിട്ടില്ലെന്ന് പാക് സുരക്ഷാ ഉദ്യോഗസ്ഥൻ വിശ്വസിക്കുന്നു. അത്തരമൊരു സാഹചര്യത്തിൽ, ജാവലിൻ മിസൈലുകൾ പാക്കിസ്താന് സൈന്യത്തിന് ഗുരുതരമായ ഭീഷണിയായി മാറിയേക്കാം. സൈനിക പോസ്റ്റുകളിൽ തീവ്രവാദികൾ ഈ മിസൈലുകൾ ഉപയോഗിച്ചാൽ അത് പാക്കിസ്താന് ഗുരുതരമായ പ്രതിസന്ധി സൃഷ്ടിക്കുമെന്ന് ഒരു പാക്കിസ്താന് ഉദ്യോഗസ്ഥൻ ഒരു അഭിമുഖത്തില്‍ പറഞ്ഞു. അത്തരമൊരു ആക്രമണം പ്രാദേശിക സംഘർഷങ്ങൾ വളരെയധികം വർദ്ധിപ്പിക്കുമെന്നും അതിന്റെ ആഘാതം ദക്ഷിണേഷ്യയിലുടനീളം അനുഭവപ്പെടുമെന്നും അദ്ദേഹം പറയുന്നു.
ഇന്ത്യക്കെതിരെ നിരന്തരം ഭീകരാക്രമണം നടത്തുന്ന പാക്കിസ്താന് ആസ്ഥാനമായി പ്രവര്‍ത്തിക്കുന്ന ഭീകരസംഘടനകള്‍ക്ക് എല്ലാ ഒത്താശയും നല്‍കി വന്നിരുന്ന പാക് സൈന്യത്തിന്റെ ഉറക്കം കെടുത്തുന്നതാണ് പുതിയ വിവരങ്ങള്‍. താലിബാന്റെ വർദ്ധിച്ചുവരുന്ന ഭീഷണിക്ക് ശേഷം, പാക്കിസ്താന് ഇപ്പോൾ അമേരിക്കയോട് അഫ്ഗാനിസ്ഥാനിൽ നിന്ന് അപകടകരമായ ആയുധങ്ങൾ പിൻവലിക്കണമെന്നാണ് ആവശ്യപ്പെട്ടിരിക്കുന്നത്. അമേരിക്കൻ ആയുധങ്ങൾ താലിബാൻ ദുരുപയോഗം ചെയ്യുന്നത് പ്രാദേശിക സുരക്ഷയ്ക്ക് വലിയ ഭീഷണിയാകുമെന്ന് പാക്കിസ്താന് വിശ്വസിക്കുന്നു. എന്നാല്‍, താലിബാന്‍ അമേരിക്കയുടെ ആജ്ഞ അനുസരിക്കുമെന്നു തോന്നുന്നില്ല. എങ്കില്‍ പ്രശ്നം കൂടുതൽ സങ്കീർണ്ണമായേക്കാം.
