അഫ്ഗാനിസ്ഥാനിലെ ബഗ്രാം വ്യോമതാവളം തിരിച്ചുപിടിക്കുമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ പ്രഖ്യാപനത്തിന് താലിബാൻ സർക്കാർ ശക്തമായ മറുപടി നൽകി. അമേരിക്ക തെറ്റിദ്ധരിക്കരുത്, ഒരിഞ്ചു ഭൂമി പോലും അഫ്ഗാന് മണ്ണില് നിന്ന് അമേരിക്കയ്ക്ക് വിട്ടുകൊടുക്കില്ല. ബഗ്രാം വ്യോമതാവളത്തിന്റെ കാര്യത്തിൽ ഒരു വിട്ടുവീഴ്ച സാധ്യമല്ലെന്നും താലിബാന് പറഞ്ഞു.
അഫ്ഗാൻ തലസ്ഥാനമായ കാബൂളിന് വടക്ക് ഭാഗത്തായി സ്ഥിതി ചെയ്യുന്ന ബഗ്രാം വ്യോമതാവളം അഫ്ഗാനിസ്ഥാനിലെ ഏറ്റവും വലിയ വ്യോമതാവളമാണ്. താലിബാനെതിരെയുള്ള യുഎസിന്റെ 20 വർഷത്തെ പ്രചാരണത്തിന് ഈ വ്യോമതാവളം ഒരു പ്രധാന കേന്ദ്രമായിരുന്നു.
താലിബാൻ വ്യോമതാവളം തനിക്ക് കൈമാറിയില്ലെങ്കിൽ ഗുരുതരമായ പ്രത്യാഘാതങ്ങൾ ഉണ്ടാകുമെന്ന് ഡൊണാൾഡ് ട്രംപ് നേരത്തെ ഭീഷണിപ്പെടുത്തിയിരുന്നു. “ബഗ്രാം വ്യോമതാവളം അത് നിർമ്മിച്ച ആളുകൾക്ക്, അതായത് അമേരിക്കയ്ക്ക്, അഫ്ഗാനിസ്ഥാൻ തിരികെ നൽകിയില്ലെങ്കിൽ, വളരെ അപകടകരമായ കാര്യങ്ങൾ സംഭവിക്കാൻ പോകുന്നു” എന്ന് ട്രംപ് തന്റെ സോഷ്യൽ മീഡിയ പ്ലാറ്റ്ഫോമായ ട്രൂത്ത് സോഷ്യലിൽ എഴുതി.
ചിലർ ഒരു രാഷ്ട്രീയ ഒത്തുതീർപ്പിന്റെ ഭാഗമായി താവളം തിരികെ ലഭിക്കാന് ആഗ്രഹിക്കുന്നുവെന്ന് ഞായറാഴ്ച അഫ്ഗാനിസ്ഥാൻ പ്രതിരോധ മന്ത്രാലയത്തിന്റെ ചീഫ് ഓഫ് സ്റ്റാഫ് ഫാസിഹുദ്ദീൻ ഫിത്രത്ത് പറഞ്ഞു. അഫ്ഗാൻ പ്രദേശത്തിന്റെ ഒരിഞ്ച് പോലും വിലപേശാൻ കഴിയില്ല. ഞങ്ങൾക്ക് അത് ആവശ്യമില്ലെന്നും അദ്ദേഹം പറഞ്ഞു. അഫ്ഗാനിസ്ഥാന്റെ സ്വാതന്ത്ര്യവും പ്രാദേശിക സമഗ്രതയും വളരെ പ്രധാനമാണെന്ന് അഫ്ഗാൻ സർക്കാർ പിന്നീട് മുന്നറിയിപ്പ് നൽകി.
വാസ്തവത്തിൽ, ചൈനയെ നിരീക്ഷിക്കുന്നതിനായി ഈ വ്യോമതാവളത്തിന്റെ നിയന്ത്രണം ഏറ്റെടുക്കാൻ അമേരിക്ക ആഗ്രഹിക്കുന്നു. ബഗ്രാം തിരിച്ചുപിടിക്കാൻ യുഎസ് സൈന്യത്തെ അയക്കുന്നതിനെക്കുറിച്ച് ആലോചിക്കുന്നുണ്ടോ എന്ന് ട്രംപിനോട് ചോദിച്ചപ്പോൾ, ട്രംപ് പറഞ്ഞു, “ഞങ്ങൾ അതിനെക്കുറിച്ച് സംസാരിക്കില്ല, പക്ഷേ ഞങ്ങൾ ഇപ്പോൾ അഫ്ഗാനിസ്ഥാനുമായി സംസാരിക്കുന്നുണ്ട്, ഞങ്ങൾക്ക് അത് തിരികെ വേണം, ഞങ്ങൾക്ക് അത് ഉടനടി തിരികെ വേണം, അവർ അങ്ങനെ ചെയ്തില്ലെങ്കിൽ, ഞാൻ എന്താണ് ചെയ്യാൻ പോകുന്നതെന്ന് നിങ്ങൾക്കറിയാം” എന്നാണ് അദ്ദേഹം മറുപടി നല്കിയത്.
Afghanistan RESPONDS to Trump wanting Bagram Air Base back
'Not even INCH of our land will be negotiated or compromised with anyone'
Chief of Staff of country's armed forces Qari Fasihuddin Fitrat https://t.co/sdNLE4cet7 pic.twitter.com/sAi70WkESb
— RT (@RT_com) September 21, 2025
